“Wakekala Nanami muParadisa”

1. Yesu hadiñayi kwakwihi nakufwa, wamulejeli nindidi kapondu wadiña kwakwihi nayena? (Luka 23:39-43)

YESU niatupondu ayedi adiña kwakwihi nayena akabakeni hampinji yafwileñawu. (Luka 23:32, 33) Atupondu ejima ayedi adiña nakumusupisha Yesu, chinakumwekesha nawu hiyadiña atumbanji twindiku. (Mat. 27:44; Maku 15:32) Ilaña wumu hakachi kawu wahimpili yitoñojoka yindi. Wamwilili nindi: “Yesu, wakañanukaña neyi wuneñili dehi muWanta weyi.” Yesu wamwakwili nindi: “Inakukuleja chalala dalelu nami, wakekala nanami muParadisa.” (Tañenu Luka 23:39-43.) Kwosi wunsahu wamwekeshaña nawu iwu kapondu wetejeli nsañu yahosha ‘haWanta wamwiwulu,’ yashimwinineñayi Yesu. Nawa Yesu hahosheli nindi iwu iyala wukwiñila muWantaku. (Mat. 4:17) Yesu wahosheleña haParadisa yahamaseki kumbidi. Tunahoshelidi mwenimu?

2. Tuneluki ñahi netu ona kapondu wabalumukili mumuchima wadiña kaYudeya?

² Chakadi nikujina, ona kapondu wabalumukili mumuchima wadiña kaYudeya. Ona kapondu wamulejeli mukwawu nindi: “Komana eyi niwoma wakumutiya Nzambi kwosi, kutoña nineyi anakukubabeshela hamu naniwu muntu?” (Luka 23:40) AYudeya adifukwileña kudi Nzambi wumu, ilaña antu akunyuza akuhweleleli mudi anzambi amavulu. (Kwid. 20:2, 3; 1 Kor. 8:5, 6) Neyi ana atupondu adiña amayala akunyuza, hadaha ona kapondu wadi kwihula nindi, “Komana eyi niwoma wakutiya anzambi kwosi?” Kubombelahu, Yesu hiyamutemesheli kwinza kudi antu akunyuzaku, ilaña “kudi anyikoku ajimbala amwitala daIsarela.” (Mat. 15:24) Nzambi wamwekesheli kudi aIsarela nindi wakasañula afu. Hadaha ona kapondu wabalumukili mumuchima welukili iyi nsañu, nawa neyi chinakumwekesha mazu ahosheliyi, welukili nindi Yehova wakamusañula Yesu kulonda akayuuli muWanta waNzambi. Chinamwekani neyi ona iyala wakuhweleleli nindi Nzambi wakamusañula niyena.

3. Chumanyi chatela chenjili muyitoñojoka yanona kapondu hampinji yahosheliyi Yesu haParadisa? Lumbululenu. (Kutachika 2:15)

³ Chineli wadiña kaYudeya, ona kapondu wabalumukili mumuchima watela welukili nsañu yahosha hadi Adama naEva niParadisa yayinkeliwu kudi Yehova. Dichi chinakumwekana neyi ona kapondu welukili chikupu nindi Paradisa yateneniyi Yesu yakekala itempa dalubanji hanu heseki.—Tañenu Kutachika 2:15.

4. Mazu ahosheliyi Yesu kudi ona kapondu wumu anateli kutuletesha kutoñojoka hachumanyi?

⁴ Mazu aYesu amulejeliyi kapondu atela kutusañumuna kutoñojoka hachakekala yuma muParadisa. Chakadi nikujina, kudi yuma yitwatela kudizila kukuwunda kwadiña muchiyuulu chaMwanta Solomoni kutalisha haParadisa. Nawa twatela kwiluka netu Yesu, muntu wamubadika Solomoni, wakazatila hamu nawantu akayulañayi hamu nindi kuwahisha iseki. (Mat. 12:42) Mwamweni, “anyikoku amakwawu” atela kushaku muchima kwiluka yuma yatela kwilawu hakwila akashakami haya nyaaka muParadisa.—Yow. 10:16.

YUMA YAKEKALA ÑAHI MUPARADISA?

5. Munakutoñojoka nenu yuma yakekala ñahi muParadisa?

⁵ Munakutoñojoka nenu yuma yakekala ñahi muParadisa? Hadaha mwafwikijaña iluña dadiwahi neyi chadiña itempa daEdeni. (Kutach. 2:7-9) Munateli kwanuka mazu awuprofwetu asonekeliyi Mika nindi antu jaNzambi “muntu-himuntu wakashakama mwishina damuvinyu windi nimwishina dachikuyu chindi.” (Mika 4:3, 4) Munateli cheñi kwanuka chahosha Bayibolu nawu yakuda yakavula. (Mas. 72:16; Isa. 65:21, 22) Dichi munateli kudifwikija mudi mwitempa dadiwahi munashakami kumesa kudi yakuda yayiwahi yayivulu. Hadaha munateli cheñi kufwikija munakwona mpepela yayiwahi, yinakwepuka ivumba dadiwahi danyitondu ninkenu. Kuhiñahu mutiya mazu awantu anakuseha hampinji yinakuzañalelawu hamu ataña, amabwambu kushilahu niantu anasañuliwu. Bayi neyi yuma yejimiyi hichilota hohuku. Chakadi nikujina, yuma yejimiyi yakamwekana hanu heseki. Hela chochu, muParadisa cheñi mwakekala nyidimu yayiwahi.

6. Nyidimwinyi yitwakazataña muParadisa? (Talenu mwevulu.)

⁶ Yehova watuleña munjila yakwila tudiluñisheña nanyidimu yetu. (Mukwa. 2:24) Sweje-e muChiyuulu chaKristu chaYaaka Ikombakaji, twakekala nanyidimu yayivulu. Antu akapuluka halukadi lwasweja kushilahu niantu amavulu akasañulawu, akakeñekaña yakuvwala, yakuda niiluña dakushakamahu. Hakwila twakatweshi kwila yuma yejimiyi, chakakeñekaña kuzata nyidimu yayivulu yayiwahi. Neyi chochayilejeliwu aAdama naEva kudima itempa mwashakamineñawu, ninetu twakazataña mudimu wawuwahi wakwilisha iseki kwikala Paradisa. Fwikijenu cheñi muzañalu wutwakatiya hakudizisha antu amavulu akasañulawu abula kumwiluka Yehova ninkeñelu yindi, nichitwakakwashaña antu ashinshika adiñaku henohu Yesu kanda enzi kulonda akeluki yuma yayivulu!

7. Yumanyi yitwatela kukuhwelela, nawa muloñadi?

⁷ Twatela kukuhwelela chikupu netu muParadisa twakashakamaña mukuwunda, twakekala nayuma yejima yitwakakeñaña nawa twakashakama mukunuñañana. Muloñadi? Muloña Yehova watumwekeshelahu yuma yimu yamwekeshaña chakekala yuma muchiyuulu chaMwanindi. Tukumona yumiyi munsañu yahosha hachiyuulu chaMwanta Solomoni.

CHIYUULU CHAMWANTA SOLOMONI CHAMWEKESHAÑA CHAKEKALA YUMA MUPARADISA

8. Mazu ekala haIsamu 37:10, 11, 29, ashikijeweli ñahi hanyima yakuyisoneka kudi Mwanta Davidi? (Talenu “Malwihu Kufuma Kudi Antañi” mukanu Kaposhi Kakutalila.)

⁸ Mwanta Davidi amoneneni kusoneka hachakekala yuma kumbindi hampinji yakela mwanta wamaana nawa washinshika nashakami dehi hetanda. (Tañenu Isamu 37:10, 11, 29.) Kakavulu twatañaña Isamu 37:11 neyi tunakuhanjeka nawantu haParadisa yakumbidi. Chumichi chinateleli muloña Yesu wahosheli hanawa mazu muMpanji yindi yahaMpidi, nakumwekesha nindi awa mazu akashikijewa kumbidi. (Mat. 5:5) Ilaña mazu aDavidi amwekesheli cheñi yuma chiyadi kwikala mumafuku aMwanta Solomoni. Hampinji yayuulileñayi Solomoni muIsarela, antu jaNzambi adiluñishileña kuwunda chikupu nawa adiña nayuma yayivulu mwituña “dasweja mayeli niwuchi.” Nzambi wahosheli nindi: “Neyi mukutwalekahu kwovwahila nshimbi jami . . . , nakaleta kuwunda mwituña nawa mwakashakamaña chakadi wakuyitiyisha woma.” (Lev. 20:24; 26:3, 6) Iyi yikaninu yashikijeweli hayuulileñayi Solomoni. (1 Kushi. 22:9; 29:26-28) Nawa Yehova wakanini nindi antu atama “hiyakekalaku nawa cheñiku.” (Mas. 37:10) Dichi, mazu ekala haIsamu 37:10, 11, 29 ashikijeweli kunyima nawa akashikijewa cheñi kumbidi.

9. Mwanta wamumbanda wakuSheba wahosheli nindidi kutalisha hachiyuulu chaMwanta Solomoni?

⁹ Mwanta wamumbanda wakuSheba watiyili nsañu yakuwunda niyuma yayiwahi yadiluñishileñawu aIsarela muchiyuulu chaSolomoni. Iwu mwanta wafumini kwituña dakwakulehi nakuya kuYerusalema nakudimwena yomweni yuma chiyadiña. (1 Anya. 10:1) Hanyima yakutalatala mwahita wanta waSolomoni, wahosheli nindi: “Nsañu yanlejeliwu yadiña yantesha hohu. . . . Antu jeyi adi namuzañalu niambuñeyi emanaña mpinji yejima kumesu eyi nakutiyilila kumaana eyi, adi namuzañalu!” (1 Anya. 10:6-8) Ilaña yuma yamwekeneña muchiyuulu chaSolomoni yadiña hohu yuma yantesha hayuma yakelilayi Yehova muchidi wamuntu muchiyuulu chaMwanindi, Yesu.

10. Munjilanyi Yesu munamubadikiliyi Solomoni?

¹⁰ Yesu wamubadika Solomoni muyuma yejima. Solomoni wadiña muntu wabula kuwanina waluwañesheleña nankashi hakusompa nakuletesha antu jaNzambi kukabakana. Ilaña Yesu, hiNyuuli wawanina wabulaña kuluwañesha. (Luka 1:32; Heb. 4:14, 15) Yesu watwalekelihu kwikala washinshika kudi Nzambi hela chakwila wahitili mukweseka kweneni kwafumineña kudi Satana. Kristu wamwekesheli nindi hakakoñahu nshidi hela kwila chuma chidi chejima chinateli kukatisha antu jindi ashinshikaku. Nashikilimu chikupu kwikala Mwanta wetu.

11. Anyi akayuula hamu naYesu?

¹¹ Yesu wakazatila hamu nawa 144,000 kwakamena antu nikushikija nkeñelu yaYehova kutalisha kwiseki. (Chim. 14:1-3) Awa amweni kweseka nimakabi amavulu hampinji yadiñawu hamaseki, dichi akekala anyuuli akweti wushona. Mudimwinyi waweni wakazatañawu awa anyuuli?

MUDIMWINYI WAKAZATAÑAWU AWAYISHEWA?

12. Mudimwinyi wakayinkawu a 144,000 kudi Yehova?

¹² Yesu niantu akayuulañayi nawu akweti mudimu weneni wakazatañawu kubadika wadiña naSolomoni. Ona mwanta wawaIsarela wakameneneña antu amavulu adiña mwituña dimu hohu. Ilaña, awa akayuulaña muWanta waNzambi akakamenaña antu amavulu akashakamaña mwahita kaayi kejima. Iwu himudimu weneni chikupu wayinkawu 144,000 kudi Yehova!

13. Mumudimu wakazatañawu antu akayuulaña hamu naYesu munabombeli mudimwinyi walema?

¹³ A 144,000 akekala anyanta niatupristu neyi Yesu. (Chim. 5:10) MuNshimbi jaMosi, atupristu diwu adiña hohu namudimu wakukiña antu kumujimba nikuyikwasha kwikala nawubwambu wakola naNzambi. Nshimbi jadiña “mwevulu wayuma yayiwahi yakenza,” dichi chidi hohu chiwahi kukunkulula netu antu akayuulaña naYesu akazataña mudimu walema wakwakamena antu jaNzambi kumujimba nikuyikwasha kwikala nawubwambu wakola nayena. (Heb. 10:1) Tukutalilaña kulonda twakamoni awa anyanta niatupristu chakahanjekawu naenimbu amuWanta adi hanu hamaseki. Tuneluki wanyi Yehova chakaloñeshayi yuma, ilaña twatela kukuhwelela netu muParadisa, antu akashakamaña heseki akatambwila wunlomboli wakakeñekaña.—Chim. 21:3, 4.

YUMANYI YATELA KWILAWU “ANYIKOKU AMAKWAWU” HAKWILA AKASHAKAMI MUPARADISA?

14. Kunuñañananyi kwekala hakachi “[kawanyikoku] amakwawu” nawamanakwaKristu?

¹⁴ Yesu wayiteneni antu akayuulaña hamu nayena nindi “mukanka wanyanya wanyikoku.” (Luka 12:32) Wahosheli cheñi hadi mukanka wamuchiyedi, wateneniyi nindi “anyikoku amakwawu.” Iyi nyikanka yiyedi yatuña mukanka wumu wanuñañana. (Yow. 10:16) Iyi nyikanka yiyedi yatachika dehi kuzatila hamu, nawa yakatwalekahu kuzatila hamu neyi iseki anadilishi dehi Paradisa. Hela chochu, hayina mpinji, ana “[amumukanka] wanyanya wanyikoku” akekala mwiwulu nawa ana amumukanka “[wawanyikoku] amakwawu” akekala nakuchiñeja kwakudiluñisha wumi wahaya nyaaka hamaseki. Ilaña kudi yuma yatela kwila “anyikoku amakwawu” chayinu mpinji hakwila akashakami muParadisa.

15. (a) “Anyikoku amakwawu” azatilaña ñahi hamu nawamanakwaKristu? (b) Tunateli kumwimbujola ñahi manakwetu wudi musitolu? (Talenu mwevulu.)

¹⁵ Ona kapondu wabalumukili mumuchima wafwili henohu kanda amwekeshi chikupu nindi wasakilili hachuma chamwilililiwu kudi Kristu. Ilaña, etu twekala mumukanka “wawanyikoku amakwawu” kudi yuma yayivulu yitwatela kwila chayinu mpinji hakwila tumwekeshi chitwatiyaña hachuma chatwililayi Yesu. Chakutalilahu, twamwekeshaña chitwamukeña kuhitila muyuma yitwelilaña amanakwindi awayishewa naspiritu. Yesu wahosheli nindi wakasompesha anyikoku kushindamena haniyi yuma. (Mat. 25:31-40) Tunateli kuyikwasha amanakwaKristu neyi tuzataña nañovu mumudimu wakushimwina niwakwilisha atumbanji. (Mat. 28:18-20) Dichikuletesha tuzatisheña nyikanda yakudizisha nachu antu Bayibolu yatuloñeshelañawu, chidi neyi mukanda waMunateli Kwikala naMuzañalu Haya Nyaaka! Neyi kanda mwikalihu nakadizi waBayibolu, kwila muzata nañovu kulonda mutachiki kudizisha antu amavulu Bayibolu nehi?

16. Yumanyi yitwatela kwila hakwila twiikali enimbu amuWanta waNzambi?

¹⁶ Hitwatela kuhembelela sampu tunatachiki kushakama muParadisa hakwila dinu twakekali nayilwilu yamuntu wunakukeñayi Yehova nindi akashakami mwenomuku. Ayinu diyi mpinji yitwatela kuzata nañovu kulonda tubuleña kutwamba, twiikali nayilwilu yayiwahi nichihandilu chapela. Nawa twatela kwikala ashinshika kudi Yehova, enikwetu nikudi akwetu akaKristu. Neyi twovwahilaña chikupu nshimbi jaNzambi hampinji yitunakushakama mukanu kaayi katama, chakatupelela kujovwahila hitwakekala muParadisa. Twatela cheñi kwiluka nyidimu niyuma yikumwekesha nawu tunakudiloñesha kushakama muParadisa. Talenu chibaaba chinakwila nawu “Komana Munadiloñeshi ‘Kuswana Iseki’?” chidi mukanu Kaposhi Kakutalila.

17. Komana twatela kusweja kuneña hanshidi jitwakoñeli kunyima? Lumbululenu.

¹⁷ Twatela cheñi kuleka kudinka nyiloña hanshidi yeneni yitwakoñeli kunyima. Hela chochu, hitwatela kumonaña ifutu danyiloña netu hinjila ‘yakukoñelamu nshidi mumushikilaku.’ (Heb. 10:26-31) Ilaña twatela kukuhwelela chikupu netu neyi tunabalumuki mumuchima nakuleka nshidi yeneni yitwakoñeli, tunalombi wukwashi kudi Yehova niakulumpi, nawa tunahimpi yilwilu yetu, dikwila nawu natwanakeni chikupu. (Isa. 55:7; Yilw. 3:19) Anukenu mazu aYesu ayilejeliyi aFwarisi nindi: “Nenjili nakutambika akanshidi, bayi aloñaku.” (Mat. 9:13) Mulambu wefutu danyiloña wukweti ñovu chikupu yakubuta hanshidi jetu jejima.

MUNATELI KUSHAKAMA HAYA NYAAKA MUPARADISA

18. Yumanyi yimwakakeña kuhanjeka nanona kapondu wafwilili hamu naYesu?

¹⁸ Difwikijenu mudi muParadisa, munakuhanjeka nanona kapondu wahosheli naYesu? Chakadi nikujina, wejima wenu ayedi mukuhosha mazu akusakilila hamulambu waYesu. Hadaha mukukeña kumwihula kulonda ayileji yuma yamwekeni hamaora antesha akukumishaku achihandilu chaYesu hanu heseki nichatiyiliyi chamwakwiliwu kudi Yesu hachuma chalombeliyi. Hadaha niyena wukuyihula yuma chiyadiña mumafuku akukuminina achiyuulu chaSatana. Ochitwakadiluñisha kudiza Izu daNzambi nawantu adi neyi ona iyala!—Efwe. 4:22-24.

19. Tukuhosheladi netu yuma muParadisa yakawaha? (Talenu mwevulu wudi hakava.)

¹⁹ Yuma muParadisa yakawaha. Mpinji yejima twakadimonaña nawantu akweti yilwilu yayiwahi nawa twakazataña nyidimu yayiwahi. Chabadika hayuma yejimiyi, hefuku-hefuku twakamwilukilañaku chikupu Tata yetu wamwiwulu nawa twakadiluñishaña yuma yakatwinkañayi. Mpinji yejima twakekalaña nayuma yayivulu yitwatela kudiza hadi yena nihayileñaleña. Twakaswejelañaku kumukeña Nzambi mukuvula kwayaaka yitwakashakamaña. Twamusakililaña nankashi Yehova niYesu hakutukana nawu twakashakamaña muParadisa haya nyaaka!