Mwinkenu Yehova Kalemesha

1. Antu amavulu makonu asha muchima hachumanyi?

KOMANA mukwiteja wanyi nenu antu amavulu makonu anakudilemesha hohu aweni? Chakutalilahu, amakwawu anakuyaña nihaintaneti nakudimwekesha aweni nawu alema niyuma yinakwilawu. Hela chochu, antesha hohu makonu diwu anakumulemesha Yehova Nzambi. Muchinu chibaaba, tukuhanjeka mwatalisha kumwinka Yehova kalemesha nichitunateli kwila mwenimu. Tukuhanjeka cheñi chitunateli kumwinka Nzambi kalemesha kamutelela chikupu nawa nichakalemeshayi yomweni ijina dindi katataka.

KUMWINKA YEHOVA KALEMESHA KWATALISHA MUDIHI?

2. Yehova wamwekesheli ñahi kulema kwindi kuMpidi yaSinayi? (Talenu cheñi mwevulu wudi hakava.)

² Kalemesha katalisha mudihi? MuBayibolu, izu dakwila nawu “kalemesha” dinateli kutalisha kuchuma chidi chejima chaleteshaña muntu kwikala wabadika. Yehova wamwekesheli kalemesha kindi kabadika hanyima yakwila muza waIsarela awusubuli kuwuduñu muEjipitu. Fwikijenu chuma chamwekeni: AIsarela amavulu nankashi anapompi kwishina daMpidi yaSinayi kulonda adibulakani naNzambi yawu. Ivu diyila dinabuti mpidi. Hohenohu, kunenzi mutentashi weneni, hadaha munadibombeli nivokano, wunakankishi iseki hanemaniwu nawa kudi nzaji, kudidima niyivumina yinakutiyakana neyi mpuña mwiwulu. (Kwid. 19:16-18; 24:17; Mas. 68:8) Toñojokenu ana aIsarela chatiyiliwu chelili Yehova amwekeshi ñovu yakulema kwindi.

3. Kumwinka Yehova kalemesha kwatalisha mudihi?

³ Indi etu antu? Komana mwamweni tunateli kuleta kalemesha hadi Yehova? Eña, tunateli. Njila yimu mutunateli kumulemeshela Yehova hikuleja antu hañovu jindi jabadika nihayilwilu yindi yayiwahi. Tunateli cheñi kumulemesha Nzambi neyi tumwinka kalemesha hayuma yitunazati nañovu jindi. (Isa. 26:12) Mwanta Davidi hichakutalilahu chamuntu wamulemesheli Yehova. Kulomba kwalombeliyi hamesu achipompelu chaIsarela, Davidi wamulejeli Nzambi nindi: “Eyi Yehova, kutoha niñovu nilubanji nikuwaha niwukeleñi jeyi, muloña yuma yejima yekala mumawulu nihanu hamaseki jeyi.” Chelili Davidi akunkululi kulomba, “chipompelu chejima chamuhamekeli Yehova.”​—1 Kushi. 29:11, 20.

4. Yesu wamwinkeli ñahi Yehova kalemesha?

⁴ Yesu chenjiliyi hamaseki, wamulemesheleña Tata yindi nanochu chahosheleñayi hadi Yena nindi diyi wamwinkeleña ñovu yakukoña yihayamisha. (Maku 5:18-20) Yesu waleteli cheñi kalemesha hadi Yehova nanochu chahosheleñayi hadi Tata yindi nichelileñayi nawantu. Mpinji yimu, Yesu watañishileña musinagogi. Hakachi kawantu amutiyilileña hadiña mumbanda wumu wadiña nandemoni hadi yaaka 18. Iwu ndemoni wamukojejeli kuha mujimba wejima chakwila wakañenyeña nikwinuka. Wakabakeni nankashi! Muloña wawushona, Yesu wayili kudi iwu mumbanda nawa wahosheli nindi mumesu awunda nindi: “Eyi mumbanda, wufwayi weyi wunamani.” Wamunañikili makasa nawa hohenohu wemeni “nakutachika kumulemesha Nzambi,” wamusakilili Yehova nankashi hakumuuka! (Luka 13:10-13) Iwu mumbanda welili chiwahi hakumulemesha Yehova, ninetu dichi twatela kwila.

YUMANYI YATUSAÑUMUNAÑA KUMWINKA YEHOVA KALEMESHA?

5. Yumanyi yaleteshaña tumulemesheña Yehova?

⁵ Twamulemeshaña Yehova muloña twamulemesha chikupu. Kudi yuma yayivulu yaleteshaña tumulemesheña. Yehova wañovu jejima; wekala nañovu jabulaña kumana. (Mas. 96:4-7) Maanindi abadika amwekenaña chikupu muyuma yaleñayi. Diyi Nsulu yawumi nawa diyi wawuhembaña. (Chim. 4:11) Washinshika. (Chim. 15:4) Yuma yejima yelañayi yashikijewaña, nawa mpinji yejima welaña munashiikiyi. (Yosh. 23:14) Dihafumini kaprofwetu Yeremiya ahoshi kutalisha hadi Yehova nindi: “Hakachi kawakamaana ejima amunyuza nihakachi kamawanta awu ejima, hosi hela wumu wudi neyi eyiku”! (Yere. 10:6, 7) Mwamweni, kudi yuma yayiwahi yikuletesha tumulemesheña Tata yetu wamwiwulu. Ilaña, kudi yuma yayivulu yelañayi Yehova yaleteshaña tumulemesheña nikumukeña chikupu.

6. Muloñadi chitwamukeñela Yehova?

⁶ Twamulemeshaña Yehova muloña twamukeña nankashi. Toñojokenu hayilwilu yayivulu yikwetiyi Yehova yaleteshaña tumukeñeña. Wekala naluwi niwushona. (Mas. 103:13; Isa. 49:15) Watiyaña neyi chitwatiyaña; neyi kudi chuma chinakutukata, niyena chamukataña. (Zek. 2:8) Watupeleshelañaku yuma kulonda tuswineña kwakwihi nayena hamu neyi Ibwambu detu. (Mas. 25:14; Yilw. 17:27) Nawa wadizoza; “wanoñamaña kulonda atali iwulu niiseki, nakunyamuna wakehelamu kufuma mulunkuñu.” (Mas. 113:6, 7) Hinyi wukubula kulemesha Nzambi yetu muneni?​—Mas. 86:12.

7. Kukoolekanyi kwadimena kutukweti?

⁷ Twamulemeshaña Yehova muloña twakeñaña antu amwiluki. Antu amavulu hiyamwiluka Yehovaku. Muloñadi? Muloña Satana naputishi yitoñojoka yawu nanochu chinataandishiyi makudi atama hadi Yena. (2 Kor. 4:4) Satana naleteshi antu kukuhwelela nawu Yehova wafuntishaña katama nakatama, wakamenaña wanyi, nawa diyi ­wunakojeji makabi anavuli mukaayi. Ilaña tweluka netu dichekalayi Nzambi yetu wanyi! Tukweti kukooleka kwakumuhakwilaku nawa chumichi chikuletesha amulemeshi. (Isa. 43:10) Isamu 96 dahosha hohu hakumulemesha Yehova. Chitukuhanjekaña hamazu onenewa adi munidi isamu, toñojokenu hanjila jimunateli kumwinkelamu Yehova kalemesha kamutelela chikupu.

TUNATELI KUMWINKA ÑAHI YEHOVA KALEMESHA KAMUTELELA?

8. Njilanyi yimu mutunateli kumulemeshela Yehova? (Isamu 96:1-3)

⁸ Tañenu Isamu 96:1-3. Tunateli kumulemesha Yehova nayuma yitwahoshaña hadi yena. Munawa mavasi, antu jaYehova anayitambiki kulonda ‘amwimbili Yehova,’ ‘ashimeki ijina dindi,’ “[ashimuni] nsañu yayiwahi yawamwinu,” kushilahu “[nikushimuna] kulema kwindi hakachi kanyuza.” Yejima iyi hinjila mutunateli kumulemeshela Tata yetu wamwiwulu. AYudeya ashinshika niakaKristu adiñaku mumafuku awapostolu hiyashintajalileña kuleja antu yuma yayiwahi yejima yayilililiwu kudi Yehova nikuhakwilaku ijina dindiku. (Dan. 3:16-18; Yilw. 4:29) Ninetu tunateli kwila ñahi mwenimu?

9-10. Yumanyi yitunakudizila kudi Angelena? (Talenu cheñi mwevulu.)

⁹ Talenu chuma chamumwekeneni Angelena,a muhela washakamaña kuUnited States. Wahamukili nakuhakwilaku ijina daYehova kukampani kwazatañayi. Hampinji yeñililiyi hohu, amutambikili kukubulakana kwadiña akwawu afumini hohu nakwiñijawu kukampani nawa ayinkeli kukooleka kwakudilumbulula kudi akwawu. Angelena waloñesheli nyevulu yamwekesheli muzañalu wadiñayi nawu hakwikala Chinsahu chaYehova. Hela chochu, henohu yena kanda ahoshi, mukwawu mwazatilileñawu wadilumbulwili nindi amukulishili muchisaka chawaYinsahu jaYehova. Watachikili kuhosha chatama hayuma yitwakuhwelela. Angelena wahosheli nindi: “Muchima wami weteli. Ilaña nadihoshesheli mumuchima nami: ‘Komana nukwiteja muntu amutwambili Yehova? Tahindi natela kumuhakwilaku?’”

¹⁰ Mukwawu chamanishiliyi kuhosha, Angelena walombeli muwihi, wumweneni. Dichi wamulejeli mumesu awunda nindi: “Nkulilu yami yinaambuki wanyi nayeyi. Ninami nakulilili muchisaka chawaYinsahu jaYehova, nawa natwalekihu kwikala Chinsahu kushika nikulelu.” Yuma yadiña chiwahi wanyi; ilaña, Angelena watwalekelihu kudiwunjika hampinji yamwekesheleñayi nyevulu yayiwahi yakupompa kweneni kwayiliyi, nawa wahakwililiku yuma yakuhwelelayi mukubabala. (1 Pet. 3:15) Yumanyi yafuminimu? Angelena chamanishiliyi kumwekesha nyevulu, ona iyala walekeli kuhilashana. Wetejeli nikwiteja nindi wanukaña yuma yayiwahi yamwekeneña hakulilileñayi muchisaka chawaYinsahu jaYehova. Angelena wahosheli nindi: “Yehova watelela kumuhakwilaku. Hikukooleka kuhakwilaku ijina dindi.” Ninetu tukweti kukooleka kwakumushimeka Yehova nikumulemesha hela chakwila antu amakwawu hiyanakumulemeshaku.

11. Kufuma tuhu kunyima, akakudifukula alala alondelaña ñahi chishina chekala haIsamu 96:8?

¹¹ Tañenu Isamu 96:8. Tunateli kumulemesha Yehova nayuma yetu yalema. Akakudifukula alala amulemeshaña Yehova muniyi njila. (Yish. 3:9) Chakutalilahu, aIsarela ahanineña yawaana yakutuña nachu tembeli nikuyiwahisha. (2 Anya. 12:4, 5; 1 Kushi. 29:3-9) Atumbanji twaKristu amakwawu amukalakeleleña niapostolu indi “[kuzatisha] yuma yawu.” (Luka 8:1-3) AkaKristu amumafuku awapostolu niwena ahanineña yuma yakukwasha amanakwawu niahela akuspiritu adiña mukukaankila. (Yilw. 11:27-29) Makonu, ninetu tunateli kumulemesha Yehova nayawaana yitwahanaña chakudikeñela.

12. Yawaana yetu yinateli kuleta ñahi kalemesha hadi Yehova? (Talenu cheñi mwevulu.)

¹² Talenu chakutalilahu chimu chinakumwekesha nawu yawaana yetu yamulemeshaña Yehova. Lipoti yamu 2020 yashimwini yuma yafuminimu muloña wachaaña chabulili kumana swayi muZimbabwe. Antu amavulu nankashi adiña munzala yeneni, kushilahu nimuhela wejina daPrisca. Hela chakwila kwadiña chaaña, Prisca watwalekelihu kushimwina Hachisatu niHachitanu nimumpinji yakudima. Antu muchituñilu amuseheleña nanochu chayileñayi nakushimwina chatela ayeña nakudima, nakumuleja nawu, “Wakafwa nanzala.” Prisca waakwileña nakuhamuka nindi, “Yehova hakañanyaña kukwasha ambuñindiku.” Hashimbwili wanyi, watambwilili wukwashu wahanineña kuloñesha kwetu. Ayina yuma atwesheli kuyihana muloña wayawaana yitwahanaña. Antu muchituñilu ahayamini nankashi, nawa amulejeli Prisca nawu, “Nzambi wakukwashaña, dichi tunakukeña kumwiluka chachiwahi.” Antu 7 hakachi kawu atachikili kwinza kukupompa kwachipompelu.

13. Yilwilu yetu yinateli kuleta ñahi kalemesha hadi Yehova? (Isamu 96:9)

¹³ Tañenu Isamu 96:9. Tunateli kumulemesha Yehova nayilwilu yetu. Atupristu akalakeleleña hatembeli yaYehova ateleli kwikala awunyonji kumujimba. (Kwid. 40:30-32) Hela chochu, chuma chalema nankashi kubadika wunyonji wakumujimba hikwikala nayilwilu yayiwahi. (Mas. 24:3, 4; 1 Pet. 1:15, 16) Twatela kuzata nañovu ‘kuvuula wuntu wawukulu,’ dikwila nawu yilwilu niyaaku yatama, ‘nakuvwala wuntu wawuha,’ dikwila nawu kutoñojoka nikwila yuma munjila yamwekeshaña yilwilu yayiwahi yikwetiyi Yehova. (Kol. 3:9, 10) Nawukwashu waYehova, niantu akweti yilwilu yatama nankashi nawa yamadombu anateli kuhimpa nakuvwala wuntu wawuha.

14. Yumanyi yimunakudizila kuchuma chamumwekeneni Jack? (Talenu cheñi mwevulu.)

¹⁴ Talenu chuma chamumwekeneni Jack, iyala wadiña mukamadombu nawa kapondu, ateneneñawu nejina dikwawu nawu Ndemoni. Muloña wayuma yatama yakoñeliyi Jack, muloña windi awuketwili nawu akumujaha. Hela chochu, hampinji yahembeleleñayi kumujaha, Jack wetejeli kumudizisha Bayibolu kudi manakwetu wayili nakushimwina mukaleya mwamukasiliwu Jack. Hela chakwila chihandilu chindi chadiña chiwahi wanyi kunyima, Jack wavuulili wuntu windi wawukulu nawa mukuhita kwampinji washikilihu nakupapatishewa. Jack wahimpili nankashi chakwila hefuku damujahileñawu, akakuhemba kaleya amakwawu awulumwini madilu chamweniwu hiyakuya nakumujaha. Kapokola wumu wazatilileña kunaka kaleya wahosheli nindi: “Kunyima, Jack wadiña kayili watama chikupu mukanu kaleya. Ilaña ichi wudi hakachi kawatuyili akweti yilwilu yayiwahi nankashi.” Mulungu wahiñilihu kufuma hamujahiliwu Jack, amanakwetu ayili nakulombola kupompa kwamukachi kamulungu awanini kayili wenjili nakupompa katachi. Chumanyi chaletesheli enzi nakupompa? Watiyili kuwaha nanochu chamweniyi Jack chahimpiliyi yilwilu yindi nawa wakeñeleña kwiluka yuma yatela kwilayi hakwila adifukuleña kudi Yehova. Mwamweni, yilwilu yetu yinateli kuleta kalemesha hadi Tata yetu wamwiwulu!​—1 Pet. 2:12.

YEHOVA WUKULEMESHA ÑAHI IJINA DINDI KATATAKA?

15. Yehova wukulemesha ñahi chikupu ijina dindi katataka? (Isamu 96:10-13)

¹⁵ Tañenu Isamu 96:10-13. Awa mavasi akukumishaku amuIsamu 96 amulumbulula Yehova nawu hiNsompeshi nawa Mwanta woloka. Yehova wukulemesha ñahi ijina dindi katataka? Wakazatisha wunsompeshi windi. Katataka ajilumuni Babiloni Muneni nanochu chinakuletayi kasawuntu hejina dindi dajila. (Chim. 17:5, 16; 19:1, 2) Antu amakwawu akamona kujilumuka kwaBabiloni Muneni hadaha akafuukulahu kudibomba nanetu mukudifukula kwalala. Nkumininaku, haAmagedoni, Yehova wakakisañana chiyuulu chaSatana chejima, wakajilumuna ejima adikañaña nayena nawa atamishaña ijina dindi, ilaña wakamwina antu ejima amukeña, amwovwahilaña nawa atiyaña kuwaha kumulemesha. (Maku 8:38; 2 Tes. 1:6-10) Hanyima yakweseka kwakukumishaku kwakalondela haChiyuulu chaKristu chaYaaka Ikombakaji, Yehova wakajilika chikupu ijina dindi. (Chim. 20:7-10) Hanoyu mpinji, “iseki dejima dakenzala nakwiluka kwakwiluka kulema kwaYehova neyi chabutaña menji hakaluñalwiji.”​—Hab. 2:14.

16. Mukufwilaña kwiladi? (Talenu cheñi mwevulu.)

¹⁶ Chikawaha nankashi hampinji yakela antu ejima amomi akamwinkeña Yehova kalemesha katelela ijina dindi! Ilaña sampu adina ifuku dinashiki, tunateli kuzata hakumina ñovu jetu kumulemesha Nzambi yetu mpinji yidi yejima. Hakwila amwekeshi kulema kwaniyi nsañu, Izanvu Dalombolaña dinatondi Isamu 96:8 kwikala nsona yetu yachaaka cha 2025, yinakuhosha nawu: “Mwinkenu Yehova kalemesha katelela ijina dindi.”