Munateli Kwimbujola Ñahi Chanakenañayi Yehova?

1-2. (a) Mpinjinyi sweje-e yinateli kutukalila kumwanakena muntu? (b) Denise wamwekesheli ñahi muchima wakwanakena?

KOMANA chayikalilaña kwanakena akwenu? Etu amavulu chatukalilaña, sweje-e neyi muntu nahoshi hela neyi neli chuma chinatukati kumuchima. Hela chochu, tunateli kuwundisha muchima nakumwanakena. Chakutalilahu, talenu chuma chamumwekeneni muhela wejina daDenise,a wanakeneni chikupu. Mu 2017, Denise nichisaka chindi ayili nakuhempula Kasanji Keneni kaMukaayi Kejima kawaYinsahu jaYehova kafumini tuhu nakushinkulawu. Chafuntileñawu kwitala, ñendeshi wacheñi wayili nakuhuma mumotoka yawu. Denise wahwidilili. Chapwapukiliyi, wawanini anyanindi anadikatishi nankashi nawa nfumwindi, Brian, nafwi. Neyi anuka china chuma chamwekeni, Denise wahoshaña nindi, “Naneñeli nankashi nawa naluwankeni.” Chimwahitili mpinji, muhela welukili nindi ona ñendeshi hasheteli hela kuluwankanaku, dichi wamulombeli Yehova kulonda ekali mukuwunda.

² Ñendeshi wayihumini amukwatili nawa amutwalili kuchota nakumusompesha hamuloña wakujahana. Neyi amuwana namuloña, akumukasa. Hela chochu, chota chamulejeli Denise nawu hakwila iwu iyala amukasi chikushindamena hawunsahu wukushimunayi. Denise wahosheli nindi: “Natiyili tuhu neyi kudi muntu wunatatubuli hachilonda chami nawa nasukwilihu isaka damuñwa, hampinji yanlejeliwu nawu nishimuni yuma yatama yamwekeni muchihandilu chami.” Chimwahitili nyilungu yantesha, Denise washakamini muchota nawa wadiloñesheli kulonda ashimuni wunsahu hadiwu iyala waleteli yihuñu muchisaka chindi. Wahosheli nindidi? Denise wamulejeli iwu nsompeshi nindi amutiyili iwu iyala luwi.b Chamanishiliyi kuhosha, nsompeshi wadilili. Wahosheli nindi: “Hadi yaaka 25 yinnazati neyi nsompeshi, kanda nimoneñahu dehi chuma chamuchidiwu kumwekana muchinu chota. Kanda nimoneñahu dehi chisaka chamuntu aneliwu chatama kulemba muchota nawu amutiyili luwi muntu wunaluwañeshi. Kanda nitiyeñahu dehi mazu akukeña nikwanakena.”

3. Chumanyi chamukwashili Denise kwikala namuchima wakwanakena?

³ Chumanyi chamukwashili Denise kwikala namuchima wakwanakena? Watoñojokeli chikupu hachanakenañayi Yehova. (Mika 7:18) Neyi tumwekeshaña kusakilila hachatwanakenañayi Yehova, ninetu tukwanakenaña akwetu.

4. Yehova wakeñaña nindi twileñadi? (AEfwesesa 4:32)

⁴ Yehova wakeñaña nindi twanakeneña akwetu neyi chatwanakenañayi chakufuma hamuchima. (Tañenu AEfwesesa 4:32.) Wakeñaña nindi twanakeneña antu atuneñeshaña. (Mas. 86:5; Luka 17:4) Muchinu chibaaba tukuhanjeka hayuma yisatu yinateli kutukwasha kwikala namuchima wakwanakena chikupu.

BAYI MUDIWULA CHIMUNAKUTIYAKU

5. Kwesekeja naYishimu 12:​18, tunateli kutiya ñahi neyi muntu atuneñesha?

⁵ Chinateli kutukata nankashi kumuchima hamuloña wayuma yinahoshiyi muntu hela yinatwiliyi, sweje-e neyi owu muntu hiibwambu detu chikupu hela hintaña yetu. (Mas. 55:​12-14) Mpinji yikwawu chinateli kutukata neyi muntu anatapiwu. (Tañenu Yishimu 12:18.) Tunateli kweseka kuwundisha muchima hela kudiwula chitunakutiya. Ilaña kwila mwenimu chidi neyi anatutapi mpoku ilaña tuyilekelamu. Munjila yoyimu, hitwatela kukuhwelela netu kumuchima kukuleka kukata neyi tudiwula chitunakutiyaku.

6. Tunateli kwila ñahi neyi muntu atuhilisha?

⁶ Neyi muntu atuneñesha, kakavulu twashikenaña kuhila. Bayibolu yeteja nawu tunateli kuzuwa. Hela chochu, yatusoñamishaña nawu bayi tutwalekahu kuzuwaku. (Mas. 4:4; Efwe. 4:26) Muloñadi? Muloña chitunakutiya dichakojejaña tukoñihu chuma. Nawa kakavulu mukuzuwa himwafumaña yuma yayiwahiku. (Yak. 1:20) Anukenuña nenu, kuhila tunateli kuhila, ilaña muntu yomweni nateli kufuukulahu kutwalekahu kuhila hela nehi.

7. Twatiyaña ñahi neyi muntu atwila chuma chatama?

⁷ Neyi anatwili chuma chatama, chinateli kutukata muyitoñojoka. Chakutalilahu, muhela wejina daAnn wahosheli nindi: “Hinachidiña kansi, atata ayishili amama nawa asumbwili muntu wanhembeleña. Natiyili neyi kwiji nashali nkawami. Chavwaliliwu anyana, natiyili neyi kwiji anansinsishi nawena. Nadimweneña nami ankeña wanyi.” Muhela wejina daGeorgette walumbulwili chatiyiliyi chelili nfumwindi abuli kwikala washinshika kudi yena, wahosheli nindi: “Twadiña amabwambu kufuma tuhu kuwansi. Twazatilileña hamu wupayiniya! Chankatili kumuchima nankashi.” Muhela wejina daNaomi wahosheli nindi: “Nakuhweleli wanyi nami nfumwami wakelahu chuma chikankatisha kumuchima. Dichi chanlejeliyi nindi watalaña nyevulu yanzekesi nawa wanswekaña, naneñeli nankashi nawa namweni nami hashinshika kudi amiku.”

8. (a) Yumanyi yikuletesha twanakeneña akwetu? (b) Yumanyi yayiwahi yafumañamu neyi twanakena? (Talenu chikasha chinakwila nawu “Indi Neyi Kudi Muntu Wunaleteshi Nawu Tukabakaneña naYitoñojoka?”)

⁸ Hitunateli kukañesha yuma yinateli kuhoshawu antu hela kutwilawuku, ilaña tunateli kudiyuula chitunateli kwila. Nawa kakavulu chuma chachiwahi chitwatela kwila hikwanakena. Muloñadi? Muloña twamukeña Yehova nawa wakeñaña nindi twiikali namuchima wakwanakena. Neyi tutwalekahu kuhila nawa tubula kwanakena, tunateli kukoña chuma chawusupi nawa hadaha tunateli kudikatisha kumujimba. (Yish. 14:​17, 29, 30) Talenu chuma chamumwekeneni muhela wejina daChristine. Wahosheli nindi: “Neyi kumuchima kunakunkata nankashi, navula wanyi kutumba chimwemweta. Nalekaña kuda yakuda yinateli kunkwasha kwikala wakola kumujimba. Nakañanyaña kukaama, nawa kakavulu chankalilaña kudiyuula, chumichi chaleteshaña muwulu wetu mwiikali kukala nawa natiyañanaña chiwahi wanyi nawakwetu.”

9. Muloñadi chitwatela kulekela kuhemba nkunyi?

⁹ Hela chakwila muntu wunatwili chuma chatama nakudikaña nindi yena hidiyi wachikojejaku, tunateli kukeheshaku kutoñojoka hayuma yatama yinatukoñiyi. Munjilanyi? Georgette, itwashimuna hakusambila, washimwini nindi: “Hahitili mpinji, ilaña nalekeli kumuhilila wadiña nfumwami. Nawa chafuminimu, nekalili mukuwunda kwakweni.” Neyi tubula kuhemba nkunyi, tukutondolwela kusukwila ndulu hadi antu acheñi. Tukudilila cheñi etu aweni chuma chachiwahi, dikwila nawu, tukuleka kutoñojoka haniyi nsañu nawa tukutwalekahu kwikala namuzañalu cheñi muchihandilu. (Yish. 11:17) Ilaña munateli kwila ñahi neyi mutiya nenu munadiloñeshi wanyi kwanakena?

CHIMUNATELI KULEKA KUTIYA CHIMUNAKUTIYA

10. Muloñadi chitwatela kudinkela mpinji kulonda tuwundishi muchima? (Talenu cheñi nyevulu.)

¹⁰ Munateli kuleka ñahi kutoñojoka hachuma chatama chinayikoñiwu? Njila yimu hikudinka enu aweni mpinji yakuwundishilamu muchima. Hanyima yakumwinka yitumbu, muntu wunadikatishi nankashi wakeñekaña mpinji hakwila akoli. Munjila yoyimu, twakeñekaña mpinji kulonda tuwundishi muchima henohu kanda twanakeni muntu.—Mukwa. 3:3; 1 Pet. 1:22.

11. Kulomba kunateli kuyikwasha ñahi kwikala namuchima wakwanakena?

¹¹ Mulombenu Yehova kulonda ayikwashi mwiikali namuchima wakwanakena.c Ann, itwashimuna hakusambila, walumbulwili kulomba chikwamukwashili. Wahosheli nindi: “Namulombeli Yehova nami atwanakeni wejima wetu muchisaka hayuma yitwabulili kwila chiwahi. Kuhiñahu, nayisonekeleli atata niañodawu amaha mukanda nakuyileja nami nayanakeneni.” Ann wetejeli nindi chadiña chapela wanyi kwila mwenimu. Ilaña wahosheli nindi: “Nakuhweleli nami neyi nimbujolaña chanakenañayi Yehova, chinateli kuyisañumuna atata niañodawu kudiza chalala hadi Yehova.”

12. Muloñadi chitwatela kumukuhwelela Yehova bayi chitunakutiyaku? (Yishimu 3:​5, 6)

¹² Mukuhwelelenu Yehova, bayi chimunakutiyaku. (Tañenu Yishimu 3:​5, 6.) Yehova mpinji yejima welukaña yuma yayiwahi yinateli kutukwasha. (Isa. 55:​8, 9) Nawa hanateli kutuleja kwila chuma chinateli kutukatishaku. Dichi, neyi atuleja nindi twanakeneña, twatela kukuhwelela netu mukwila mwenimu munateli kufuma yuma yayiwahi. (Mas. 40:4; Isa. 48:​17, 18) Munjila yikwawu, neyi tushindamena hachitunakutiya chikutukalilaña kwanakena. (Yish. 14:12; Yere. 17:9) Naomi ashimunawu hakusambila, wahosheli nindi: “Hakusambila, namweneña nami hinatela kumwanakena nfumwami nanochu chatalileñayi nyevulu yanzekesiku. Nachiinineña nami wukufuntishahu cheñi hela nami wukujimbala chankatishiliyi kumuchima. Nawa natoñojokeleña nami Yehova neluki chinnakutiya. Ilaña natachikili kwiluka nami neyi Yehova neluki chinnakutiya, hichinayi mukwila nawu neteji chinnakutiyaku. Neluki chinnakutiya, nawa weluka nindi hatela kuhita mpinji hakwila niwundishi muchima, ilaña nakukeña nindi niikali namuchima wakwanakena.”d

CHITUNATELI KUTOÑOJOKA MUNJILA YAYIWAHI

13. Kwesekeja naARoma 12:​18-21, chumanyi chitwatela kwila?

¹³ Neyi twanakena muntu wunatukatishi chikupu kumuchima, kudi yuma yikwawu yitwatela kwila kubombela hakubula kuhosha hachuma chamwekeni. Neyi muntu wunatuneñeshi himanakwetu hela muhela mukaKristu, twatela kuzata nañovu kulonda tuleti kuwunda. (Mat. 5:​23, 24) Twatela kutondahu kumutiyila luwi bayi kumuhilila, nawa twatela kumwanakena bayi kumuhembela nkunyiku. (Tañenu ARoma 12:​18-21; 1 Pet. 3:9) Chumanyi chinateli kutukwasha kwila mwenimu?

14. Yumanyi yitwatela kufwilaña kwila, nawa muloñadi?

¹⁴ Twatela kuzata nañovu kulonda tumumoneña muntu wunatuhilishi neyi chamumonañawu kudi Yehova. Wamonaña yuma yayiwahi mudi antu. (2 Kushi. 16:9; Mas. 130:3) Kakavulu tunateli kuwana yuma yitunakukeña mudi antu, chili yayiwahi hela yatama. Neyi tumonaña yuma yayiwahi mudi akwetu, chikutupelelaña kuyanakena. Chakutalilahu, manakwetu wejina daJarrod wahosheli nindi, “Champelelaña kumwanakena manakwetu wunankoñi chuma chatama neyi nesekeja chiluwa chindi nakuvula kwayuma yayiwahi yinakeña hadi yena.”

15. Chalemenadi kumuleja muntu nenu wunamwanakeni?

¹⁵ Chuma chikwawu chalema chimwatela kwila hikumuleja ona muntu nenu munamwanakeni. Muloñadi? Talenu chuma cheliliyi Naomi, ashimunawu hakusambila, wahosheli nindi: “Nfumwami wañihwili nindi, ‘Wunañanakeni?’ Chelili nihoshi nami, ‘Nakwanakeni,’ nasweneni. Nelukili nami namwanakeni chakufuma hamuchima wanyi. Chimwahitili mpinji natwesheli kuhosha chakufuma hamuchima nami, ‘Nakwanakeni.’ Chinamwanakeneni, mumesu anfumwami mwenzeli madilu, nahayamini chatiyiliyi kuwaha nawa twadikundili chikupu. Kufuma haniyi mpinji namukuhweleli cheñi nawa tudi amabwambu adikunda chikupu.”

16. Yumanyi yitunadizi kutalisha hakwanakena?

¹⁶ Yehova nakukeña nindi twiikali namuchima wakwanakena. (Kol. 3:13) Hela chochu, chinateli kutukalila kwanakena amakwawu. Ilaña tunateli kutwesha neyi tubula kudiwula chitunakutiya nawa tuzata nañovu kulonda tuleki kuhila. Kuhiñahu, tuzata nañovu kulonda tutoñojokeña munjila yayiwahi.—Talenu chikasha chinakwila nawu “Njila Jisatu Jinateli Kutukwasha Kwanakena.”

SHENU MUCHIMA HAYUMA YAYIWAHI YAFUMAÑA MUKWANAKENA

17. Yumanyi yayiwahi yafumañamu neyi twanakenaña?

¹⁷ Kudi yuma yayivulu yaleteshaña twanakeneña. Talenu yuma yantesha. Chatachi, twamwimbujolaña nikumutiyisha kuwaha Tata yetu wukweti luwi, Yehova. (Luka 6:36) Chamuchiyedi, twamwekeshaña kusakilila nanochu Yehova chatwanakenayi chikupu. (Mat. 6:12) Nawa chamuchisatu, twekalaña akola kumujimba nawa twekalaña nawubwambu wawuwahi nawakwetu.

18-19. Yumanyi yayiwahi yinateli kufumamu neyi tumwekesha muchima wakwanakena?

¹⁸ Neyi twanakena akwetu, mwafumaña yuma yayiwahi yitwabula nikukuhwelela. Chakutalilahu, talenu chuma chamumwekeneni Denise, ashimunawu hakusambila. Iwu muhela hela chakwila welukili wanyi hayina mpinji, ona iyala watoñojokeleña jakudijaha hanyima yakumusompesha. Hela chochu, chamwanakeneniwu kudi Denise chaletesheli atachiki kudiza Bayibolu nawaYinsahu jaYehova.

¹⁹ Tunateli kumona netu kwanakena muntu hichuma chasweja kukala chitunateli kwila, ilaña munateli kufuma yuma yayiwahi nankashi. (Mat. 5:7) Dichi, tuzatenu nañovu kulonda twanakeneña neyi chanakenañayi Yehova.