Twalekenuhu Kwenda naChikuhwelelu

1. Muloñadi kapostolu Pawulu chatiyililiyi kuwaha chanukiliyi yuma yeliliyi muchihandilu chindi?

MPINJI yimu, kapostolu Pawulu welukili nindi katataka amujahi, ilaña chatoñojokeliyi hayuma yelileñayi muchihandilu chindi, wazañaleli chikupu. Chanukiliyi, wahosheli nindi: “Natemuki lufuchi ndo-o nikumufunda, nawa nahembi chikuhwelelu.” (2 Tim. 4:​6-8) Pawulu wafuukwileña chiwahi mumudimu wawakaKristu wazatileñayi, nawa chakadi nikujina welukili nindi Yehova wamutiyileña kuwaha. Ninetu twatela kufuukulaña chiwahi kulonda Nzambi atutiyeña kuwaha. Tunateli kwila ñahi mwenimu?

2. Kwenda nachikuhwelelu kwatalisha mudihi?

² Pawulu wahosheli kutalisha hadi yomwenindi nihadi akwawu akaKristu ashinshika nindi: “Tunakwenda nachikuhwelelu, bayi namesuku.” (2 Kor. 5:7) Pawulu watalishili mudihi? MuBayibolu, “kwenda” mpinji jikwawu kwatalishaña kuyuma yafuukulañayi muntu kwila muchihandilu chindi. Neyi muntu nakwenda namesu hohu, wafuukulaña yuma kushindamena hayuma yinakumonayi, yinakutiyayi nichinakutoñojokayi. Ilaña neyi muntu nakwenda nachikuhwelelu, wafuukulaña yuma kushindamena hanochu chamukuhwelelayi Yehova Nzambi. Yuma yelañayi yamwekeshaña nawu wakuhwelela chikupu nindi Nzambi wakamukiswila, dikwila nawu, mwakafuma yuma yayiwahi neyi alondelaña kufumba kwaYehova kwekala Mwizu dindi.—Mas. 119:66; Heb. 11:6.

3. Yumanyi yayiwahi yafumañamu neyi twendaña nachikuhwelelu? (2 AKorinda 4:18)

³ Hela chochu, wejima wetu mpinji jikwawu twafuukulaña kushindamena hachitunakutoñojoka hayuma. Dichi, neyi tufuukulaña yuma yalema kushindamena hohu hayuma yitunakumona hela yitunakutiya, chakadi nikujina twakamonaña kukala. Muloñadi? Yitoñojoka yetu mpinji jikwawu yinateli kutuluwañesha. Hela neyi yikutuluwañesha wanyi, neyi twendaña hohu namesu, tukutachika kudiwula chakeñañayi Nzambi nindi twileña hela kufumba kwindi. (Mukwa. 11:9; Mat. 24:​37-39) Ilaña neyi twendaña nachikuhwelelu, chikwikala chaswayi kufuukula “yuma yetejañayi Mwanta.” (Efwe. 5:10) Neyi tulondelaña kufumba kwaNzambi, tukwikalaña nakuwunda kwamuyitoñojoka nimuzañalu chikupu. (Mas. 16:​8, 9; Isa. 48:​17, 18) Nawa neyi tutwalekahu kwenda nachikuhwelelu, twakekala nawumi wahaya nyaaka kumbidi.—Tañenu 2 AKorinda 4:18.

4. Muntu nateli kwiluka ñahi neyi chakwila nakwenda nachikuhwelelu indi kwiji namesu?

⁴ Tunateli kwiluka ñahi neyi chakwila tunakwenda nachikuhwelelu indi kwiji namesu? Hakwila twiluki, twatela kudihula netu: Yumanyi yinashindamenañahu hampinji yinnakufuukula? Komana nafuukulaña hohu kushindamena hayuma yinnakumona? Tahindi nafuukulaña kwesekeja nachinamukuhwelela Yehova nikufumba kwindi? Tutalenu chitwatela kutwalekahu kwenda nachikuhwelelu muniyi yuma yisatu yalema: neyi tunakutonda mudimu wakwiñila, neyi tunakutonda muntu wakwiñila nindi muwulu, nawa neyi tunatambwili wunlomboli mukuloñesha kwetu. Muniyi yuma yejima yisatu, tukuhanjeka hayuma yitwatela kutoñojokahu hakwila tufuukuli chachiwahi.

NEYI TUNAKUTONDA MUDIMU WAKWIÑILA

5. Yumanyi yitwatela kutoñojokahu hampinji yitunakutonda mudimu wutwatela kwiñila?

⁵ Wejima wetu tukweti mudimu wakudikeñela yuma yitunakukeña etu aweni niamuchisaka chetu. (Mukwa. 7:12; 1 Tim. 5:8) Nyidimu yikwawu akanyidimu ayifwetaña mali amavulu. Nyidimu yikwawu yinateli kumukwasha muntu wunakuzata kwikala namali amavulu akumukwasha kwakamena yuma yinakukeña chisaka chindi nikuhembahu amakwawu akuzatisha kumbidi. Ilaña nyidimu yikwawu, kawufwetu kanateli kwikala kantesha, kanateli kuzatishayi hohu muntu kukwasha chisaka chindi muyuma yalema. Hampinji yitunakutonda mudimu wutwatela kwiñila, twafwilaña kwiluka mali itwakatambulaña. Ilaña neyi iyi diyuma yitunakutoñojokahu hohu, dikwila nawu tunakufuukula kwesekeja nayuma yitwamonaña.

6. Tunateli kwenda ñahi nachikuhwelelu hampinji yitunakutonda mudimu wutwatela kwiñila? (AHeberu 13:5)

⁶ Neyi tunakwenda nachikuhwelelu, tukutoñojoka cheñi neyi chakwila owu mudimu wunateli kuluwañesha wubwambu wetu naYehova. Tunateli kudihula netu: ‘Komana iwu mudimu wukunletesha nitachiki kwila yuma yahelayi Yehova?’ (Yish. 6:​16-19) ‘Komana wukunkañeshaña kudifukula chiwahi nikunletesha nishiyeña chisaka chami hadi mpinji yayilehi?’ (Fwili. 1:10) Neyi ñakwilu yenu yidi nawu eña, mukwila chiwahi kubula kwiteja owu mudimu, hela chakwila nyidimu yinakali. Chineli twendaña nachikuhwelelu, yuma yitwafuukulaña yamwekeshaña nawu twakuhwelela netu Yehova wukutwakamenaña muyuma yitunakukaankila.—Mat. 6:33; tañenu AHeberu 13:5.

7-8. Manakwetu wumu wakuSouth America wendeli ñahi nachikuhwelelu? (Talenu cheñi mwevulu.)

⁷ Talenu Javier,a manakwetu wakuSouth America, chelukiliyi nindi chalema kwenda nachikuhwelelu. Wahosheli nindi: “Nasonekeleli kukampani kunakeñeleña kwiñila mudimu wadi kunyinkaña mali amavulu kubadika inatambwileña kumudimu wunazatileña, nawa chumichi chadi kuntiyisha kuwaha nankashi.” Hela chochu, Javier wakeñesheleña kuzata wupayiniya. Watwalekelihu nindi: “Anlejeli nawu akuñihujola kudi mukulumpi watalileña iyi kampani yejima mwituña detu. Henohu kanda añihujoli, nalombeli wukwashu kudi Yehova, muloña nelukili nami yena diyi welukili yuma yadi kunkwasha. Nakeñeleña kuzata mudimu wukunyinkaña mali amavulu, ilaña bayi wukunkañeshaña kumukalakela Yehova chiwahiku.”

⁸ Javier wahosheli nindi: “Hañihujoleleñawu, mukulumpi wamudimu wanlejeli nindi kakavulu nukuzataña maora amavulu. Namulejeli nakalemesha nami nukutwesha wanyi kuzata iwu mudimu muloña wamudimu wami wakushimwina.” Dichi Javier wakaanini kwiñila iwu mudimu. Chimwahitili nyilungu yiyedi, watachikili wupayiniya. Nawa mukuhita kwampinji muchochina chaaka, wawanini mudimu wakuzata hohu mafuku antesha. Wahosheli nindi: “Yehova watiyili kulomba kwami nawa wankwashili kuwana mudimu wanshilileñaku mpinji yakuzata wupayiniya. Nidi namuzañalu chikupu muloña nawana mudimu wanshilañaku mpinji yeneni yakumukalakela Yehova niamanakwami.”

9. Yumanyi yimunadizili kuchuma chamumwekeneni Trésor?

⁹ Chumanyi chimwatela kwila neyi mumona nenu mudimu wumunakuzata wunakuyikañesha kwenda nachikuhwelelu? Talenu chuma chamumwekeneni Trésor, wakuCongo. Wahosheli nindi: “Mudimu wuneñilili dimudimu wunakeñeleña nankashi muchihandilu chami. Mali inatambwileña kumudimu wakusambila, eñilileñamu kapampa kasatu mumali inatachikili kutambula kuniwu mudimu wunatachikili kuzata, nawa anlemesheleña nankashi.” Hela chochu, Trésor kakavulu wajiñileña kukupompa muloña wakuzata maora amavulu. Amukanjikijileña cheñi kubula kushimuna yuma yatama yamwekeneña hakampani. Trésor wakeñeleña kuleka, ilaña wakameneni neyi chakwila wakawanahu cheñi mudimu wukwawu. Chumanyi chamukwashili? Wahosheli nindi: “Habakuki 3:​17-19 yankwashili kwiluka nami hela chakwila nukuleka iwu mudimu nawa nukwikalaña hohu namali antesha, Yehova wukuñakamenaña. Dichi nalekeli iwu mudimu.” Wakunkulwili nindi: “Antu amavulu eñijaña nyidimu atoñojokaña nawu neyi owu mudimu wakutambula mali amavulu, muntu nateli kudihana nakushiya yuma yejima, kushilahu chisaka chindi nikudifukula kwindi. Nidi namuzañalu hakwiluka nami nahembeli wubwambu wami naYehova ninachisaka chami. Chimwahitili chaaka, Yehova wankwashili kuwana mudimu wankwashili kwikala nachihandilu chapela nimpinji yeneni yakuzata nyidimu yetu yawakaKristu. Neyi tumutwamijaku Yehova muchihandilu chetu, tunateli kukabakana hohu hakapinji kantesha, ilaña wakatwakamenaña.” Mwamweni, neyi tukuhwelelaña mukufumba kwaYehova niyikaninu yindi, tukutwalekahu kwenda nachikuhwelelu nawa wakatukiswila.

NEYI TUNAKUTONDA MUNTU WAKWIÑILA NINDI MUWULU

10. Yumanyi yikutuletesha kwenda namesu hampinji yitunakutonda muntu wakwiñila nindi muwulu?

¹⁰ Wulu hichawaana kufuma kudi Yehova, nawa chidi hohu chiwahi neyi tunakukeña kwiñila muwulu. Neyi muhela nakutoñojoka hadi manakwetu watelela atela kwiñilayi nindi muwulu, nateli kushinshika hayilwilu yikwetiyi manakwetu, chamwekenañayi, chamwilukawu antu, chazatishañayi mali, yuma yelañayi hakukwasha chisaka, kushilahu nichamuzañaleshañayi muhela.b Yuma yejimiyi yalema. Hela chochu, neyi ashinshikaña hohu haniyi yuma, dikwila nawu nakwenda namesu.

11. Tunateli kwenda ñahi nachikuhwelelu hampinji yitunakutonda muntu wakwiñila nindi muwulu? (1 AKorinda 7:39)

¹¹ Wenowu muzañalu watiyañayi Yehova hakumona amanakwetu niahela anakulondela kufumba kwindi hampinji yinakutondawu muntu wakwiñila nindi muwulu! Chakutalilahu, alondelaña kukonkomwena kwahosha hakuhembelela sampu “[anahiti] dehi muyaaka yawansi” henohu kanda atachiki kudiluka namuntu. (1 Kor. 7:36) Neyi anakutoñojoka hadi muntu watelela atela kwiñilawu nindi muwulu, ashinshikaña nankashi hayilwilu yashimunayi Yehova nindi diyatela kwikala neyala wamuwahi hela mumbanda wamuwahi. (Yish. 31:​10-13, 26-28; Efwe. 5:33; 1 Tim. 5:8) Neyi muntu wabula kwikala Chinsahu nakuyifwila, ovwahilaña kufumba kwahosha hakusumbuka hela kusumbula “chiña hohu mudi Mwanta,” neyi chashimunawu ha 1 AKorinda 7:39. (Tañenu.) Atwalekañahu kwenda nachikuhwelelu, nakukuhwelela nawu Yehova hohu diyi wukuyikundejaña muyitoñojoka kwesekeja nachinakutiyawu.—Mas. 55:22.

12. Yumanyi yimunadizili kuchuma chamumwekeneni Rosa?

¹² Talenu chuma chamumwekeneni Rosa, payiniya wakuColombia. Mudimu wazatileñayi wamuletesheli adikundeña neyala wabulili kwikala Chinsahu, watachikili kumumwekeshela kukeña. Rosa niyena watachikili kumukeña. Wahosheli nindi: “Wamwekeneña neyi hiiyala wukweti muchima wawuwahi nankashi. Wakwashileña antu amuchituñilu chawu nawa wadiña nachihandilu chachiwahi. Natiyileña kuwaha nayuma yañililileñayi. Wamwekesheleña yilwilu yinakeñeleña yatela kwikala nanfumwami, hela chakwila wadiña Chinsahu wanyi.” Wabombelelihu nindi: “Chankalilili kumukaana muloña dichuma chinakeñesheleña. Hayina mpinji, natiyileña wuudi nawa nakeñeleña muntu wakwiñila nindi muwulu, ilaña nachidiña kanda niwani iyala wudi muchalala.” Hela chochu, Rosa hashili hohu muchima hayuma yamweneñayiku. Watoñojokeli hayuma yikufuukulayi chiyadi kuluwañesha wubwambu windi naYehova. Dichi, walekeli kuhanjeka naniwu iyala nawa watachikili kusha muchima hakuzata nyidimu yaNzambi. Hashimbwili wanyi, amutambikili kuya kuShikola Yawakakushimwina aWanta, nawa ichi hipayiniya wadimena. Rosa wahosheli nindi: “Yehova nenzeshi muchima wami namuzañalu chikupu.” Chaswayi wanyi kwenda nachikuhwelelu neyi ochu chuma wunakuchikeñesha nankashi, ilaña neyi tunakwila kwesekeja nachatoñojokañayi Yehova, mwafumaña yuma yayiwahi.

NEYI TUNATAMBWILI WUNLOMBOLI MUKULOÑESHA KWETU

13. Yumanyi yikutuletesha kwenda namesu neyi tunatambwili wunlomboli mukuloñesha kwetu?

¹³ Twatambwilaña wunlomboli kufuma kudi akulumpi, nkoñi wañinza, kasanji kamutayi, hela kudi Izanvu Dalombolaña, watukwashaña mukudifukula kwetu. Hanu dinu tukwila ñahi neyi mpinji yikwawu tunatiyishishi wanyi munatalishi wunlomboli wutunatambwili? Hadaha tukutachika hohu kumonamu yuma yatama muwunlomboli wutunatambwili. Indi kwiji tukutachika cheñi kusha maana kuyiluwa yawamanakwetu anahani wunlomboli.

14. Yumanyi yikutukwasha kwenda nachikuhwelelu neyi tunatambwili wunlomboli mukuloñesha? (AHeberu 13:17)

¹⁴ Neyi twendaña nachikuhwelelu, tukukuhwelela netu Yehova nakutulombola nawa weluka yuma yitunakuhitamu. Chikufumamu, tukunyakalaña kwovwahila, nawa tukwilaña mwenimu chakufuma hamuchima. (Tañenu AHeberu 13:17.) Tweluka netu kwovwahila kwetu kwatukwashaña kwikala anuñañana muchipompelu chetu. (Efwe. 4:​2, 3) Twakuhwelela netu hela chakwila amanakwetu anakulombola awanina wanyi, Yehova wukutukiswila neyi tuyovwahilaña. (1 Sam. 15:22) Mumpinji yindi yatelela, wakwolola yuma yidi yejima yinakukeñeka kuyolola.—Mika 7:7.

15-16. Chumanyi chamukwashili manakwetu wumu kwenda nachikuhwelelu hela chakwila wajinokeleña hawunlomboli watambwililiwu? (Talenu cheñi mwevulu.)

¹⁵ Talenu chuma chamwekeni chinakumwekesha yuma yayiwahi yafumaña mukwenda nachikuhwelelu. MuPeru, hela chakwila idimi daSpanish didahoshañawu antu amavulu, hamatala amavulu antu azatishaña madimi awu achisemwa. Idimi dimu hanawa madimi hiQuechua. Hadi yaaka yayivulu, amanakwetu niahela ahoshaña idimi daQuechua, ayileña mwiluña dakushimwina nakukeñakeñamu hohu antu ahosheleña idi idimi. Hela chochu, hakwila ovwahili nshimbi janfulumendi, kwenjili kuhimpika kwahosheleña hanjila yakushimwina antu ejima. (Rom. 13:1) Chafuminimu, amakwawu atachikili kujinoka neyi chakwila chumichi chikukañesha mudimu wakushimwina mwiluña dawu. Chineli amanakwetu ovwahilili iku kuhimpika, Yehova wayikiswilileña chazatileñawu nañovu kuya nakukeñakeña antu amavulu ahoshaña idimi daQuechua.

¹⁶ Kevin, mukulumpi muchipompelu chahoshaña idimi daQuechua, wadiña hakachi kanawa ajinokeleña. Walumbulwili nindi: “Natoñojokeli nami, ‘Hanu dinu tukuwanaña ñahi antu ahoshaña idimi daQuechua?’” Chumanyi cheliliyi Kevin? Wahosheli nindi: “Nanukili chahosha Yishimu 3:5. Nawa natoñojokeli hadi Mosi. Amulejeli kulombola aIsarela kufuma muEjipitu nakuyitwala kwiluña kwamwekenaña neyi hiyakutwesha kupuluka mumakasa awaEjipitu ayikumpishileñaku. Hela chochu, wovwahilili nawa Yehova wamukiswilili munjila yakuhayamisha muloña wakwovwahila kwindi.” (Kwid. 14:​1, 2, 9-11, 21, 22) Kevin wafuukwilihu kuwahishaku njila yindi yakushimwinamu. Chumanyi chafuminimu? Wahosheli nindi: “Nahayamini Yehova chatukiswililiyi. Henohu iku kuhimpika kanda, twendeleña ntampu jajilehi nawa mpinji jikwawu twawanineña hohu muntu wumu hela ayedi ahoshaña idimi daQuechua. Chayinu mpinji, tunakusha nankashi muchima kushimwina mumaluña mwekala antu amavulu ahoshaña idimi daQuechua. Chinafumimu, twahanjekaña nawantu amavulu, tudi nakufuntila kwakuvulu niatudizi aBayibolu amavulu. Ichi tunakuvulaña hakupompa.” Eña, neyi twendaña nachikuhwelelu, Yehova wukutukiswilaña mpinji yejima.

17. Yumanyi yimunadizi muchinu chibaaba?

¹⁷ Tunahanjeki hachitwatela kutwalekahu kwenda nachikuhwelelu muyuma yisatu yalema. Ilaña twatela kutwalekahu kwenda nachikuhwelelu muyuma yejima yitwelaña muchihandilu, chidi neyi hampinji yitunakutonda yisela hela yuma yitwatela kwila hampinji yakunooka nihampinji yitunakufuukula shikola yitwatela kudiza nichakukulisha anyana. Muyuma yejima yitukufuukulaña, bayi tushindameneña hohu hakumona namesuku, ilaña tushindameneña nihawubwambu wetu naYehova, hakufumba kwindi nichatushiikayi nindi wukutwakamenaña. Neyi twilaña mwenimu, “twakendaña mwijina daYehova Nzambi yetu haya nyaaka nanyaaka.”—Mika 4:5.