Yikatu Yabulaña Kumana​—Komana Bayibolu Yinateli Kuyikwasha?

Ñakwilu yamuBayibolu

Eña. Nzambi wayakamenaña ambuñindi akata. Bayibolu yahosha hadi ambuñindi ashinshika nawu: “Chakakamujokayi hakadidi nakuzeya Yehova wakamukwashaku.” (Masamu 41:3) Neyi mwakata chikatu chabulaña kumana, yuma yisatu yinalondelihu yinateli kuyikundeja:

1. Lombenu ñovu yikuyikwasha kuumika. Munateli kwikala nakuwunda “kwaNzambi kwabadika maana ejima,” kunateli kuyikwasha kuumika hela chakwila munakumona kukala.​—Afwilipi 4:6, 7.

2. Kwakamenaña nehi. Bayibolu yahosha nawu: “Muchima wazañajala hiyitumbu yayiwahi; ilaña muchima wabaluka womishaña mafwaha.” (Yishimu 17:22) Twalekenuhu kwikala namuzañalu, wunateli kuyikwasha kubula kusweja kuneña nikwikala namujimba wakola.

3. Talilenuña yuma yakumbidi. Kuchiñeja kunateli kuyikwasha kwikala namuzañalu hela chakwila munakuhita muyikatu. (Aroma 12:12) Bayibolu yashimwineñahu dehi nawu kumbidi “mwenimbu hakahosha nindi Ami nakataku.” (Isaya 33:24) Nzambi wakooka yikatu yabulaña kumana yinakañanyi kuukawu antu makonu. Chakutalilahu, Bayibolu yashimuna nawu atushinakaji akafunta cheñi kuwansi nawa akekala nanyijimba yayiwahi, nawu: “Mujimba windi wukwila se-ne-ne, chakubadika wamwana wanyanya; wukufunta cheñi muwukwenzi windi.”​—Yoba 33:25.

Ilukenu nenu: Hela chakwila aYinsahu jaYehova atambulaña wukwashu wayinkañayi Nzambi, ayaña kuchipatela kulonda atambuli yitumbu yawundishaña yikatu yabulaña kumana. (Maku 2:17) Ilaña, hitwetejaña njila jejima jakukilamuku; hela chochu, tweluka netu muntu himuntu watela kudifuukwila njila yakumukilamu.