Chumanyi Chadizañawu Antu Amakwawu Kuhitila Mukuyitala?
1. Indi atumbanji twaYesu adizili yumanyi kuhitila mukumutala?
1 Yesu wahosheli nindi: “Ditwikenu mpanda yami, mudizili kudami.” (Mat. 11:29) Chakadi nikujina, Yesu wadizishileña amakwawu kuhitila mukwimika chakutalilahu chachiwahi bayi neyi namazu ahosheleñayi hohuku. Toñojokenu yuma yadiziluwu atumbanji kuhitila mukumutala Yesu. Wadiña wakeña antu, wawunda nawa waluwi. (Mat. 8:1-3; Maku 6:30-34) Wadiña wadizoza chikupu. (Yow. 13:2-5) Hampinji yashimwinineñawu naYesu, atumbanji amumweni nawu wadiña wadikita chikupu nawa watañishileña chalala nakushika hanyichima yawantu. (Luka 8:1; 21:37, 38) Chumanyi chadizañawu antu amakwawu kuhitila mukututala hampinji yitunakushimwina?
2. Indi nvwalilu niyililu yetu yayiwahi yakokolaña ñahi enimatala mwiha?
2 Enimatala: Kuvwala chiwahi, kwikala nayililu yayiwahi nikwakamena antu, kunateli kukokola enimatala. (2 Kor. 6:3; Fwi. 1:27) Amonaña nawu twavula kuzatisha Bayibolu. Amakwawu atiyaña kuwaha nawu twatiyililaña nakalemesha hampinji yinakuhoshawu. Ilukenu chikupu nenu kwimika chakutalilahu chachiwahi muniyi yuma kunateli kukokola antu kunsañu yaWanta.
3. Tunateli kwimikila ñahi amana kwetu chakutalilahu chachiwahi?
3 Amana kwetu: Tunateli cheñi kwimikila amana kwetu chakutalilahu chachiwahi. Neyi tudikitaña mumudimu wakushimwina, amana kwetu niwena akwikala neyena dakushimwina. Chikuñu chahotolaña chikuñu, anetu neyi tuloñesha chiwahi hakuya nakushimwina tukukolesha amana kwetu kuwahishaku ntañishilu yawu. (Yish. 27:17) Neyi tusoneka majina awantu amwekeshaña mpwila yakudiza nikufuntilaku swayi-swayi, amana kwetu niwena akufwilaña kwila chochimu. Tukwimikila amana kwetu chakutalilahu chachiwahi kuhitila mukumanisha chikupu mudimu wetu wakushimwina.—2 Tim. 4:5.
4. Muloñadi wutwatela kushinshika hampinji hampinji chakutalilahu chetu?
4 Komana kwila mushinshika hampinji hampinji yuma yimwelaña niyimwahoshaña kulonda mwiluki chimwakwashaña antu amakwawu nachakutalilahu chenu chachiwahi nehi? Chakutalilahu chetu chachiwahi chikumuzañalesha Yehova nawa chikutukwasha kwimbujola mazu akapostolu Pawulu wahosheli nindi: ‘Ikalenu akwakuñimbujola ami, neyi chinamwimbujolaña Kristu.’—1 Kor. 11:1.