Munafumi Nsañu Yakuzatisha muChihandilu niMudimu Wanetu AkwaKristu Mukanda waKupompa
NOVEMBER 4-10
YUMA YALEMA YAMWIZU DANZAMBI | 1 YOWANU 1-5
“Bayi Mukeña Kaayi Hela Yuma Yidi muKaayiku”
(1 Yowanu 2:15, 16) Bayi mukeña kaayi hela yuma yidi mukaayiku. Neyi muntu wakeña kaayi, dikwila nawu kukeña kwakumukeña Tata hikudi mudi yenaku; 16 muloña yuma yejima yidi mukaayi, dikwila nawu yuma yafwilaña mujimba, yuma yafwilaña mesu nikudisamba nayuma yikwetiyi muntu, hiyafumaña kudi Tataku, ilaña yafumaña mukanu kaayi.
w05 1/1 10 ¶13
Imbujolenu Yesu
Amakwawu atoñojokaña nawu bayi neyi yuma yejima yidi mukaayi yatamaku. Hela chochu, yuma yidi mukaayi yinateli kutukañesha kumuzatila Yehova. Nawa kwosi yuma yamukaayi yinateli kutukwasha kuswina kwakwihi naNzambiku. Dichi, neyi tusweja nankashi kukeña yuma yamukaayi, niyuma yamwekanaña neyi yayiwahi, tukwikala muwubanji. (1 Timotewu 6:9, 10) Yuma yayivulu yidi mukaayi yatama nawa yinateli kutuluwañesha. Neyi tutalaña mafwilimu hela maprogilamu ahaTv amwekeshaña madombu, maheta, hela yilwilu yawuvumbi, ninetu tukuyikeña nawa tukwila yuma yatama. Neyi tudikunda nawantu afwilaña maheta chikupu, hela akeña kudiñija mubizinisi, ninetu tukujilemesha.—Matewu 6:24; 1 Akorinda 15:33.
(1 Yowanu 2:17) Kubombelahu, kaayi kanakuhita nikufwila kwaku, ilaña muntu welaña nkeñelu yaNzambi watwalekañahu kushakama haya nyaaka nanyaaka.
Dishinshikenu Kulonda Mwiluki Chimwatela Kwikala
Chuma chikwawu chatukwashaña kukaana ‘yuma yamunu mwishina’ hikutoñojoka hamazu aYowanu onenewa akwila nawu: “Mpata yamunu mwishina yikuhita, nikufwila kwayu kwatama, hakwinza muntu welaña muchima waNzambi washakamaña haya nyaka.” (1 Yow. 2:17) Kaayi kaSatana kanakumwekana neyi kwiji kalala nawa kakatwalekahu haya nyaka. Hela chochu, ifuku dimu kakakuma. Kwosi chuma chamukaayi kaSatana chakatwalekahu haya nyakaku. Kwanukaña ichi chikuma chikutukwasha kubula kudimbewa natufuta twaDiyabolu.
Kukeña Yuma Yalema yakuSpiritu
(1 Yowanu 2:7, 8) Enu akwetu itwakeña, hinnakuyisonekela enu lushimbi lwaluhaku, ilaña lwolushimbi lwalukulu lumwekala nalu kufuma kukutachika. Ilu lushimbi lwalukulu, himazu imwatiyili. 8 Cheñi nawa, inakuyisonekela lushimbi lwaluha, lwalala kudi yena nikudi enu, muloña mwidima wunakuhita nawa chejeji chalala, chinakutoñeka.
Yanukishu yaYehova Yalala
Munyikanda yawakwaKristu yachiGriki mwenzala yanukishu yatulejaña nawu twatela kudikeña wumu namukwawu. Yesu wahosheli nindi lushimbi lwamuchiyedi lwalema lwakwila nawu “Keñaku mukwenu neyi chiwadikeña eyi aweni.” (Mat. 22:39) Chochimu, Yakoba mana kwaYesu wakuwanamu wateneni kukeña nindi “lushimbi lwawanta.” (Yak. 2:8) Kapostolu Yowanu wasonekeli nindi: “Enu akwetu twakeña hinukuyisonekela lushimbi lwalwihaku, lwolwalukulu lumwadiñi nalu kufumisha kutachi.” (1 Yow. 2: 7, 8) Indi Yowanu wateneneña chumanyi hahosheliyi nindi “lushimbi lwalukulu”? Wateneneña lushimbi lwakukeña. Lwadiña lushimbi “lwalukulu” hamuloña wakwila Yesu waluheni dehi kuyaaka yakunyima, “kufumisha kutachi.” Ilaña lwadiña cheñi “lwaluha” muloña lwakeñekeleña kudihana hakumwekesha iku kukeña, kwateleleluwu kumwekesha atumbanji hampinji yamweneñawu yuma yashiyashana. Hakwikala atumbanji twaKristu, komana hitwahamekaña kusoñamisha kwatukwashaña kudikiña kulonda tubuli kwikala nayililu yalwisu yinenzali mukanu kaayi, yinateli kutuleñela tubuli kukeña antuñi netuku?
(1 Yowanu 5:16, 17) Neyi muntu yamona manakwindi nakukoña nshidi yabulaña kuleta kufwa, yamulombeliku, nawa Nzambi wukumwinka wumi, dikwila nawu wumi wenkañayi antu abulaña kukoña nshidi yaletaña kufwa. Kwekala nshidi yaletaña kufwa. Dichi hinamulejaña iwu muntu nami yamulombeliku muntu wakoñaña iyi nshidi yaletaña kufwaku. 17 Yuma yejima yabula kuloña hinshidi, hela chochu, kwekala nshidi yabulaña kuleta kufwa.
it-1 862 ¶5
Kwanakena
Chachiwahi kulombelaku amakwawu hela chipompelu chejima kudi Nzambi kulonda yayanakeni. Dicheliliyi Mosi hadi muza waIsarela, washimwini mwavulumwiniwu, walombeli kwanakena nawa Yehova wayanakeneni. (Kuc 14:19, 20) Hahanineñawu tembeli, Solomoni niyena walombeli kudi Yehova nindi yayanakeneña antu jindi neyi anavulumuni nawa aleka mwelañawu mwatama. (1An 8:30, 33-40, 46-52) Ezera wayimeneniku aYudeya afumini muwunkoli kuhitila mukushimuna hatooka nshidi jawu. Kulomba kwindi kwakufuma hamuchima nawa kwakulembelela kwaletesheli antu kuhimpa yilwilu kulonda Yehova ayanakeni. (Ezr 9:13–10:4, 10-19, 44) Yakoba wakolesheli muntu wakata kuspiritu kutambika akulumpi achipompelu amulombeliku nawa “neyi nakoñi nshidi, akumwanakena.” (Yak 5:14-16) Hela chochu, “kwekala nshidi yaletaña kufwa,” nshidi yakusawula spiritu yajila, dikwila nawu nshidi yakukoña mumushikila yabulaña kwanakenawu. MukwaKristu hatela kulombelaku muntu wunakukoña nshidi mumushikilaku.—1Yo 5:16; Mat 12:31; Heb 10:26, 27; talenu NSHIDI, 1; SPIRITU.
Kutaña Bayibolu
(1 Yo 1:1–2:6) Tunakuyisonekela kutalisha hadi owu wadiñaku kufuma kukutachika waleta mazu awumi itwatiyili, itwamweni namesu etu, itunakuhemba nikukwata namakasa etu, 2 (chalala, wumi awusolweli, tunawumoni, tunakushimuna wunsahu hadi wena nawa tunakuyileja enu wumi wahaya nyaaka owu wadiña naTata nawa watusolweleliwu), 3 chuma chitunamoni nikutiya, tunakuyilejachu ninenu kulonda ninenu nawa mudikundeña hamu nanetu. Nawa iku kudikunda kwetu, dikutwadikunda naTata niMwanindi Yesu Kristu. 4 Dichi, tunakusoneka yumiyi kulonda muzañalu wetu wusweji chikupu. 5 Iyi diyi nsañu yitwatiyili kudi yena nawa yitunakukeña kuyileja enu netu: Nzambi hichejeji, nawa mudi yena himwekala mwidima hela wantiku. 6 Neyi tuhosha netu, “Twadikunda nindi,” ilaña iku tunakutwalekahu kwenda mumwidima, dikwila nawu tunakutwamba nawa hitunakwila mwaya chalalaku. 7 Hela chochu, neyi tunakwenda muchejeji neyi chekalayi yomweni muchejeji, dikwila nawu twadikunda wumu namukwawu, nawa mashi aMwanindi Yesu atutookeshaña kunshidi jejima. 8 Neyi tuhosha netu, “Hitukweti nshidiku,” dikwila nawu tunakudidimba etu aweni nawa chalala hichidi mudi etuku. 9 Nzambi washinshika nawa waloña chakwila neyi tushimuna nshidi jetu, wukutwanakena nshidi jetu nikututookesha kuyuma yejima yabula kuloña. 10 Neyi tuhosha netu, “Kanda tuvulumuneñahu dehi,” dikwila nawu tunakumwilisha yena kwikala mukwakutwamba, nawa mazu indi hiyadi mudi etuku.
2 Enu anyanami inakeña, inakuyisonekela yumiyi kulonda mubuli kukoña nshidi. Hela chochu, neyi muntu yakoña nshidi, tukweti nkwashi mukwakuloña wudi naTata, yowu Yesu Kristu. 2 Nawa yena diyi mulambu wakufumishahu nshidi jetu, hela chochu, bayi neyi jetu hohuku, ilaña nijakaayi kejima. 3 Neyi tutwalekahu kuhemba nshimbi jindi, chumichi chikumwekesha nawu tunamwiluki. 4 Muntu wahoshaña nindi, “Ami namwiluka,” ilaña hahembaña nshimbi jindiku, dikwila nawu himukwakutwamba nawa chalala, hichidi mudi iwu muntuku. 5 Ilaña muntu wahembaña mazu indi, dikwila nawu kukeña kwakumukeña Nzambi anakuwanishi kuhitila mudi iwu muntu. Nawa kuhitila muchumichi, tuneluki netu twadikunda nindi. 6 Muntu wahoshaña nindi wadikunda nindi, watela kutwalekahu kuhanda neyi chahandileñayi Yesu.
NOVEMBER 11-17
YUMA YALEMA YAMWIZU DANZAMBI | 2 YOWANU 1–YUDA
“Twatela Kuzata Nañovu Kulonda Twikali muChalala”
(Yuda 3) Enu akwetu itwakeña, hela chakwila nafwilileña chikupu kuyisonekela enu kutalisha hawamwinu wutukweti wejima wetu, ilaña ichi namoni nami chidi chiwahi ami kuyisonekela nakuyikonkomwena enu kulonda mulwili chikupu chikuhwelelu chayinkeliwu akwakujila kamu hohu.
w04 9/15 11-12 ¶8-9
“Tambulenu Ñovu Kufuma Kudi Mwanta”
Hitwamuyamba Satanaku muloña jinsona jashimuna hatooka tufuta twazatishañayi. (2 Akorinda 2:11) Diyabolu waleteli kukala kwakuvulu hadi iyala washinshika Yoba, kudi neyi kwamali, kujimbesha antaña, ikakeja damuchisaka, yikatu, nikumuhosha chatama kudi amabwambu akutwamba. Yoba waneñeli chakwila watiyili neyi Nzambi namumbi chisayikila. (Yob 10:1, 2) Hela chakwila Satana hanateli kutweseka muniyi njilaku, ilaña kukala kwamuchidiwu dikunakumonawu akwaKristu, nawa Diyabolu watiyaña kuwaha.
Makonu yuma yinateli kutuluwañesha yinakuvulilaku. Antu analemeshi nankashi maheta kubadika yuma yakuspiritu. Maprogiramu amavulu, anakumwekesha nawu wuvumbi waletaña muzañalu bayi chineñiku. Nawa amavulu anekali “akwakukeña jakudizañalesha chatela akeñi Nzambi.” (2 Timotewu 3:1-5) Yuma yamuchidiwu yinateli kutuluwañesha kuspiritu neyi tubula ‘kulwila chikupu chikuhwelelu.’—Yuda 3.
Kukeña Yuma Yalema yakuSpiritu
(Yuda 4) Chuma chinaleteshi niyisonekeli enu, chidi chakwila nawu antu amakwawu anadiñiji mukachi kenu, owu atoñweleliwu dehi kushankulu muNsona nawu akayisompesha naniwu wunsompeshi; hiyantu abulaña kumwakama Nzambi abalumunaña luwi lwasweja lwaNzambi yetu kwikala mwakuleyela kulonda akoñeña yilwilu yawukapwa nsonyi, nawa kuhitila muyilwilu, amukaanaña nkaaka yetu wumu hohu nawa Mwanta, Yesu Kristu.
(Yuda 12) Awa antu adi neyi malola aswama kwishina damenji, anakuda hamu nanenu yawija yenu yakukeña, hiyatubiña adidiishaña awenawu chakadi woma; adi neyi mavu akadi nvula anakuleloka nampepela; adi neyi nyitondu yabulaña kusoña nyikabu mumpinji yakusoñelamu nyikabu yinafwi kayedi nawa yinabwitiliwu kumu nanyiji yayu;
it-2 279
Yawija yaKukeña
Bayibolu hiyalumbulula iyi yawija yakukeña hela chiyadiña nakuyilaku. (Yuda 12) Hiyayilejeli kuyanakana kudi Mwanta Yesu Kristu hela apostolu indiku, nawa hiyadiña yamunshimbiku. Amakwawu ahoshaña nawu kwadiña mpinji yatambikileñawu akwaKristu aheta akwawu akwakwitiya atuzweñi kulonda adiili hamu yakuda. Anshona, anfwila, asamaheta, atuzweñi, wejima wawu adiilileña hamu neyi antu evumu dimu.
it-2 816
Ilola
Izu dikwawu dachiGiriki, daspi·lasʹ, datalisha kwilola damumenji. Yuda wadizatishili hakutena antu eñilili muchipompelu chawakwaKristu nakuluwañesha antu. Neyi chadiña mbopolu muwubanji namalola aswama hamenji, awa amayala niwena aleteleli antu muchipompelu kukala. Washimwini nindi: “Awa antu adi neyi malola aswama kwishina damenji, anakuda hamu nanenu yawija yenu yakukeña.”—Yuda 12.
(Yuda 14, 15) Enoki, muntu wamuchitanu nachiyedi mundonda kufuma hadi Adama, niyena waprofweteli kutalisha hadi awa antu chahosheliyi nindi: “Tiyenu! Yehova wenjili namazaza awañelu jindi ajila nakusompesha nikuhiisha antu ejima abulaña kumwakama Nzambi, muloña wanyidimu yawu yatama yakoñeleñawu munjila yakubula kumwakama Nzambi, niyuma yejima yakuhayamisha yatama yamuhosheleñawu kudi akwanshidi abulaña kumwakama Nzambi.”
‘Wamutiyishileña Nzambi Kuwaha’
Enoki waprofweteli nindidi? Waprofweteli nindi: “Tiyenu, Yehova wenjili namakumi amakombakaji awantu indi ajila, nakwila mudimu wakusompesha nakukonkolola ejima asekeshaña Nzambi, nanyidimu yawu yakusekesha Nzambi yakoñeluwu chakusekesha Nzambi, nayuma yakala yejima yamuhosheluwu akwanshidi asekeshaña Nzambi.” (Yuda 14, 15) Dichi, mwatela kwiluka nenu Enoki wahosheleña muchinyika chakunyima kumwekesha neyi Nzambi wadiña wakoña dehi yuma yashimwinuwu muwuprofwetu. Diyi njila yasonekelamu mawuprofwetu amakwawu alondelelihu. Chikuma chidi chakwila nawu: Kaprofwetu wahoshaña hayuma yikukeña kumwekana katataka, ilaña kuyilumbulula yinateli kutiyakana neyi yamwekana dehi.—Isaya 46:10.
‘Wamutiyishileña Nzambi Kuwaha’
Chikuhwelelu chaEnoki chikutuleñela kudihula neyi tunakumona yuma yidi mukaayi mutunakushakama neyi chayimonañayi Nzambi. Wunsompeshi washimwininiyi Enoki mukuhamuka wuchidi kutwalekahu nimakonu neyi chochichadiña mumafuku indi. Kwesekeja nakusoñamisha kwashimwiniyi Enoki, Yehova waleteli Dibaji hadi antu atama adiñaku mumafuku aNowa. Iku kujilumuka kwajilumukiliwu antu kunakwimenaku kujilumuka kweneni kunakwinza. (Matewu 24:38, 39; 2 Petulu 2:4-6) Neyi chochichadiña, makonu Nzambi nadiloñeshi nawañelu jindi ajila kuleta wunsompeshi waloña hadi antu asekeshaña Nzambi. Wejima wetu twatela kwanukaña mazu awunsompeshi aEnoki nikulejaku antu amakwawu. Yisaka yetu niamabwambu anateli kutushiya. Mpinji yikwawu tunateli kuneña. Ilaña Yehova hamushili Enokiku; nawa hakashiya ambuñindi ashinshika makonuku!
Kutaña Bayibolu
(2 Yowanu 1-13) Ami mukulumpi, inakusonekela mama watondewa nianyanindi inakeña chikupu, nawa bayi neyi yami nayikeña hohuku, ilaña ayikeña nikudi antu ejima aneluki chalala. 2 Twayikeña enu muloña wachalala chidi mudi etu nawa tukwikalaña nachu haya nyaaka. 3 Luwi lwasweja, wushona nikuwunda jafumaña kudi Nzambi Tata nikudi Yesu Kristu Mwana kaTata, hamu nachalala nikukeña, jikwikalaña nanetu. 4 Natiyi kuwaha nankashi muloña nawani anyanenu amu anakwenda muchalala, neyi chochitwatambwili lushimbi kufuma kudi Tata. 5 Dichi, inakukulembelela eyi mama watondewa nami, tukeñañanenuña wumu namukwawu. (Hinnakukusonekela lushimbi lwaluhaku, ilaña lwolushimbi lutwadiña nalu kufuma kukutachika.) 6 Nawa imu dimwatalisha kukeña, nawu twendeña kwesekeja namwaya nshimbi jindi. Ilu hilushimbi neyi chimwatiyili dehi kufuma kukutachika nawu mutwalekihu nakumwekesha kukeña. 7 Muloña akwakudimbana amavulu anapalañeni mukaayi abulaña kwiteja nawu Yesu Kristu wenjili mumujimba wawuntu. Yeniwu diyi mukwakudimbana nawa diyi mukwakumudimbulula Kristu. 8 Babalenu nayuma yimwakoñaña, kuchiina mwakenda kakisañana yuma yitunazatili nañovu hakwila twiikali nayu. Neyi mwila mwenimu, mwakatambwila wufwetu wenu wejima wunayiloñesheliyi Nzambi. 9 Muntu wejima wabulaña kulondela ntañishilu yaKristu nawa watañishaña nsañu yacheñi, hiyamutiyaña kuwaha kudi Nzambiku. Hakwila muntu watwalekañahu kulondela iyi ntañishilu, amutiyaña kuwaha kudi Tata nikudi Mwana. 10 Neyi muntu yenza kudi enu nawa hanakutañisha nsañu yesekana naniyi ntañishiluku, bayi mumutambwila mumatala enu hela kumwimushaku. 11 Muloña muntu wukumwimusha iwu muntu, dikwila nawu nakudikunda nindi munyidimu yindi yatama. 12 Hela chakwila nikweti yuma yayivulu yinatela kuyisonekela enu, ami hinnakukeña kuyisoneka hachipapilu ninawulombuku, ilaña nakuhweleli nami nakenza kudi enu nakahanjeki nenu mesu-namesu, kulonda mwakasweji kuzañalala chikupu. 13 Anyana kamuheleyi watondewa, anakwimushi.
NOVEMBER 18-24
YUMA YALEMA YAMWIZU DANZAMBI | CHIMWEKESHU 1–3
“Neluka Nyidimu Yeyi”
(Chimwekeshu 1:20) Imu dimwatalisha yuma yajila yakujinda yatutumbwa 7 tuwamona muchikasa chami chachidiilu nijakutentekahu manoñu awuru 7: Tutumbwa 7, tunakwimenaku añelu adi muyipompelu 7, nawa jakutentekahu manoñu jawuru 7, jinakwimenaku yipompelu 7.
Mwamwekeshaña Spiritu Yamuchidinyi?
Hakwila nawu tutondolweli spiritu yamuchidiwu, twatela kwanuka netu Yesu amushimuna muBayibolu nawu “muchikasa chindi chachidiilu mudi tutumbwa tutanu natuyedi.” “Tutumbwa” tunakwimenaku ankoñi awayishewa niankoñi ejima amuyipompelu. Yesu nateli kulombola “tutumbwa” tudi muchikasa chindi mwejima munakeñiyi. (Chim. 1:16, 20) Dichi chineli diyi Mutu wachipompelu chawakwaKristu, Yesu walombolaña mazanvu awaeluda. Neyi chakwila eluda wumu hezanvu wudi nakawufwayi, Yomweni wukweti ‘mesu neyi amuzuzu wakesi’ wakamukwasha hampinji Yindi yatelela nawa munjila yayiwahi. (Chim. 1:14) Chayinu mpinji, tukutwalekahu nakulemesha antu atondewa naspiritu yajila, muloña Pawulu wasonekeli nindi: “Ovwahilenu anlomboli jenu nakuyitiyilila, muloña ahembaña nyichima yenu, nawu twamba kashimunamu; kulonda eli mwenimu namuzañalu bayi nakuneñaku, muloña neyi akuneña hichikuyikwasha enuku.”—Heb. 13:17.
(Chimwekeshu 2:1, 2) “Sonekelaku kañelu wachipompelu chamuEfwesesa neyi: Owu wakwata tutumbwa 7 muchikasa chindi chachidiilu nawa wendujolaña hakachi kajakutentekahu manoñu jawuru, iyi diyuma yinahoshiyi nindi: ‘Neluka nyidimu yeyi, kukabakana kweyi nikuumika ninochu chiwabulaña kwiteja antu atama, nawa neluka nami wayesekaña antu adifwikijaña nawu hiyapostolu henohu hiyapostoluku, nawa wayimonaña neyi hiyakwakutwamba.
Yehova Watuhembaña Kulonda Yakatwamwini
Muchimwenu chasonekawu muChimwekeshu kapetulu 2 ni 3, Yesu Kristu walemesheluwu wahempwili yipompelu yitanu nayiyedi yakuAsia Minor. Ichi chimwenu chamwekeshaña nawu Kristu wamonaña yaaku yawantu ejima hamuntu-hamuntu. Mpinji jikwawu watenaña niyuma yinakuzatika nawa watenaña antu nikuyihameka hela kuyifumba mwatelela. Chumichi chamwekeshañadi? Ichi chimwenu chalumbuluka nawu, yipompelu yitanu nayiyedi yemenañaku akwaKristu awayishewa kufuma mu 1914, nawa kufumba kwafumbiluwu iyi yipompelu kwakwashaña yipompelu yejima yawantu jaNzambi makonu mwahita iseki dejima. Dichi tunateli kuhosha netu Yehova nakulombola antu jindi chikupu kuhitila mudi Mwanindi. Tunateli kuhetelamu ñahi muniwu wunlomboli?
w01 1/15 20-21 ¶20
Twalekenuhu Kwendela Hamu naKuloñesha kwaYehova
Hakwila twendeleña hamu nakuloñesha kwaYehova chiña twiluka mudimu wamwinkawu Yesu Kristu kudi Nzambi wakwikala “mutu wachipompelu.” (Aefwesesa 5:22, 23) Chuma chikwawu chekala haIsaya 55:4, hahoshaña nawu: “Tiya namuhani ekali chinsahu chanyuza yawantu ekali nlomboli yanyuza yawantu nimukwakuyileja mwakwila.” Yesu weluka chikupu chakulombola. Nawa weluka nyikoku yindi ninyidimu yawu. Hampinji yendeleliyi yipompelu 7 yamu Asia Minor, wahosheli kapampa katanu nindi: “Neluka nyidimu yeyi.” (Chimwekeshu 2:2, 19; 3:1, 8, 15) Kufwana tata yindi Yehova, Yesu weluka cheñi yuma yitwakeñaña. Henohu kanda yalombi kulomba kwachitalilu, Yesu wahosheli nindi: “Tata yenu neluki yuma yimunakaankili henohu kanda mumulombi”—Matewu 6:8-13.
Kukeña Yuma Yalema yakuSpiritu
(Chimwekeshu 1:7) Talenu! Yena nakwinza namavu, nawa mesu ejima akamumona, nawa antu ejima amupwikili yena; ninyichidi yejima yahamaseki yakadila makumbu muloña wayena. Chalala chumichi chakamwekana. Ameni.
Wanta waNzambi Wunafumishihu Ayilumbu aWanta
Mbila yakusompesha. Ayilumbu jaWanta waNzambi ejima akayikanjikija kulonda akadimweni yuma yikayileñela akakabi nankashi. Yesu wahosheli nindi: “Akamona Mwana kamuntu nakwinza mumavu nañovu yasweja nikulema.” (Maku 13:26) Yinjikijilu yakamwekesha nawu Yesu nenzi nakusompesha. Muwuprofwetu wowumu wahosha hamafuku akukuminina, Yesu wahosheli nsañu yayivulu kutalisha hawunsompeshi wakashimunawu haniyi mpinji. Iyi nsañu twayiwanaña muchishimu chawanyikoku niampembi. (Tañenu Matewu 25:31-33, 46.) Antu ahakwilañaku Wanta waNzambi akayisompesha nawu “anyikoku” nawa ‘akabandula nyitu yawu,’ nakwiluka nawu ‘wamwinu wawu wunaswini kwakwihi.’ (Luka 21:28) Ilaña antu adikañaña naWanta akayisompesha nawu “ampembi” nawa ‘akadineña makumbu’ chakelukawu nawu ‘akayijilumuna haya nyaka.’—Mat 24:30; Chi 1:7.
(Chimwekeshu 2:7) Dichi muntu wukweti matu, yatiyi chinakuhosha spiritu yajila kuyipompelu nayu: Muntu wemikaña mushindu nakamwiteja kuda kumutondu wawumi wudi muparadisa yaNzambi.’
Yikuma Yamaneni Kufuma muMukanda waChimwekeshu—I
2:7—Indi ‘paradisa yaNzambi’ hichumanyi? Chineli awa mazu atalisha kudi akwaKristu awayishewa, paradisa yatenawu hanu yatela kwikala paradisa yamuwanta wamwiwulu—mwamweni mwashakamayi Nzambi. AkwaKristu awayishewa akashinshi akayinka wuloku wakudya “kumutondu wawumi.” Akatambwila wumi wakabulaña kufwa.—1 Kor. 15:53.
Kutaña Bayibolu
(Chimwekeshu 1:1-11) Ichi dichimwekeshu chamwekesheliyi Yesu Kristu, chamwinkeliwu kudi Nzambi kulonda yamwekeshi kudi anduñu jindi yuma yikukeña kumwekana katataka. Yesu watemesheli kañelu kindi, nawa wamumwekesheleli nduñu yindi Yowanu ichi chimwekeshu kuhitila muyinjikijilu, 2 yeniwu washimwini wunsahu wamazu aNzambi niwunsahu washimwiniyi Yesu Kristu, niyuma yejima yamweniyi. 3 Wudi namuzañalu yowu muntu watañaña nezu dahewulu, ninowu atiyaña mazu aniwu wuprofwetu ninowu alondelaña yuma yiyasonekamu, muloña mpinji yatoñolawu yidi dehi kwakwihi. 4 Ami Yowanu, inakusonekela yipompelu 7 yekala mukabeta kaAsiya nami: Luwi lwasweja nikuwunda jiikali nanenu, jafumaña kudi “Owu wudiku, wadiñaku nawa wunakwinza,” nawa jafumaña nikudi aspiritu 7 adi kumbidi yetanda dindi, 5 jafumaña nikudi Yesu Kristu, “Chinsahu Washinshika,” “wedi watachi kusañuka kufuma mudi afu,” nawa “Nyuuli yawanyanta ahamaseki.” Kudi yena watukeña nawa watusubwili kunshidi yetu kuhitila mumashi indi yomweni, 6 nawa watwilishili etu kwikala wanta, niatupristu kudi Nzambi yindi nawa Tata, chalala, kudi yena kwiikali kulema niñovu haya nyaaka nanyaaka. Ameni. 7 Talenu! Yena nakwinza namavu, nawa mesu ejima akamumona, nawa antu ejima amupwikili yena; ninyichidi yejima yahamaseki yakadila makumbu muloña wayena. Chalala chumichi chakamwekana. Ameni. 8 Yehova Nzambi nahoshi nindi, “Ami yami Alefwa nawa yami Omega, yami Owu wudiku, wadiñaku nawa wunakwinza, Wañovu Jejima.” 9 Ami Yowanu, manakwenu nawa mukwenu mumwamwenaña hamu lukadi lwolumu, imukayuulila hamu nindi muwanta nawa womikaña neyi chimwomikaña enu hakudikunda naYesu, nadiña hachituutu chatenañawu nawu Patamosa muloña nahosheleña hadi Nzambi nikushimuna wunsahu hadi Yesu. 10 Chañoneneniwu naspiritu yajila, nakashimukili nidi dehi mwifuku daMwanta, nawa natiyili kunyima yami izu dañovu neyi chivumina champuña, 11 nadu: “Yuma yiwunakumona, yisoneki mumuvuñilu, wuyitemeshi kuyipompelu 7: muEfwesesa, muSimirina, muPerigamu, muTiyatira, muSaradisa, muFiladelifiya nimuLayodikeya.”
NOVEMBER 25–DECEMBER 1
YUMA YALEMA YAMWIZU DANZAMBI | CHIMWEKESHU 4–6
“Ñendelu Yawakwakwendela Hatuwalu Awana”
(Chimwekeshu 6:2) Chinelili nami nitali, namweni kawalu katooka, nawa owu washakamini hanaka kawalu wadiña nawuta wamukunji; amwinkeli nichibaaba nawa wayileña iku nakwimika mushindu kulonda yamanishi kwimika mushindu kwindi.
Akwakwendela Hatuwalu Awana Hiyanyi?
Mukwakwendela hakawalu katooka hinyi? Chuma chinateli kutukwasha kumwiluka chekala muBayibolu, mumukanda waChimwekeshu, amulumbulula iwu mukwakwendelahu wamwiwulu nawu “Izu daNzambi.” (Chimwekeshu 19:11-13) Iyi nkumbu yakwila nawu, Izu, yakundama kudi Yesu Kristu, muloña diyi mukwakumuhoshelaku Nzambi. (Yowanu 1:1, 14) Kubombelahu, amutenaña cheñi nawu “Mwanta wawanyanta nawa Nkaaka yawankaaka,” amulumbulula cheñi nawu “Washinshika nawa Walala.” (Chimwekeshu 19:16) Mwamweni, wukweti wuswa wakuzata neyi mwanta wañovu nawa hazatishaña ñovu jindi chatama hela munjila yaheñaku. Ilaña, antu anateli kwihula nawu.
wp17.3 4 ¶5
Akwakwendela Hatuwalu Awana Hiyanyi?
Mpinjinyi yatachikiliwu akwakwendela hatuwalu kwenda? Ilukenu nenu, mukwakwenda watachi, Yesu, watachikili kwenda mpinji yatambwiliyi chibañula. (Chimwekeshu 6:2) Mpinjinyi yamuvwikiliwu Yesu chibañula neyi Mwanta mwiwulu? Hiyadiña mpinji yafuntiliyi mwiwulu hanyima yakufwa kwindiku. Bayibolu yashimunaña nawu chafuntiliyi mwiwulu wachiñililili. (Aheberu 10:12, 13) Yesu wayikwashili atumbanji twindi kwiluka hakumini kuchiñilila kwindi nimpinji yatachikili kuyuulayi mwiwulu. Wahosheli nindi hakatachikayi kuyuula, yuma mukaayi yakataminaku chikupu. Kwakekala njita, nzala yakapwelendendi niyipupu yasweja. (Matewu 24:3, 7; Luka 21:10, 11) Chelili Njita yaKaayi yatachi yitachiki mu 1914, chamwekeni hatooka to-o nawu antu aneñili dehi muniyi mpinji yayihuñu hamaseki yatenawu muBayibolu nawu “mafuku akukuminina.”—2 Timotewu 3:1-5.
(Chimwekeshu 6:4-6) Kawalu kakwawu kachinana kedikili, nawa owu washakamini hanaka kawalu amwinkeli wuswa wakufumishahu kuwunda hamaseki kulonda antu adijaheña wumu namukwawu, nawa amwinkeli mpoku yakabali yeneni. 5 Chalamwiniyi chilamiku chamuchisatu, natiyili chileñaleña wamumi wamuchisatu nakuhosha nindi: “Inzaku!” Nawa chinelili nami nitali, namweni kawalu keyila, nawa owu washakamini hanaka kawalu wadiña napezu muchikasa chindi. 6 Mukachi kayileñaleña yayumi yiwana, natiyilimu chuma chatiyakeneña neyi izu dahosheleña nadu: “Kwati yimu yatidiku, wuseya wayu hidenari yimu, nawa makwati asatu abali, wuseya wawu hidenari yimu; nawa bayi wukisañana manji amuolivi nivinyuku.”
Akwakwendela Hatuwalu Awana Hiyanyi?
Iwu mukwakwendelahu nakwimenaku njita. Ilukenu nenu wafumishaña kuwunda bayi neyi hamatuña antesha hohuku, ilaña heseki dejima. Mu 1914, kwavulumukili njita yatachi yakaayi kejima. Halondeleli njita yakaayi yamuchiyedi, yajilumwini antu chikupu. Esekeja nawu mumaluña amakwawu antu akubadika ha 100 miliyoni anafwi nanjita kufuma tuhu mu 1914. Cheñi, antu amavulu anayikatishi chikupu.
wp17.3 5 ¶4-5
Akwakwendela Hatuwalu Awana Hiyanyi?
“Chinelili nami nitali, namweni kawalu keyila, nawa owu washakamini hanaka kawalu wadiña napezu muchikasa chindi. Mukachi kayileñaleña yayumi yiwana, natiyilimu chuma chatiyakeneña neyi izu dahosheleña nadu: ‘Kwati yimu yatidiku, wuseya wayu hidenari yimu, nawa makwati asatu abali, wuseya wawu hidenari yimu; nawa bayi wukisañana manji amuolivi nivinyuku.’”—Chimwekeshu 6:5, 6.
Iwu mukwakwendela hakawalu nakwimenaku nzala yakapwelendendi. Haniyi nsona anatuleji nawu wuseya wayakuda wunakutohelaku chakwila kwati yimu (1.08 L) yatidiku wuseya wayu hidenari yimu, nfwetu yamwinkeleñawu muntu kunyima neyi nazati ifuku dejima! (Matewu 20:2) Denari yimu wunateli kulandamu makwati asatu (3.24 L) abali, mbutu yamweneñawu nawu yaholoka wuseya kubadika tidiku. Munateli kwikala namadenari añahi hakwila mudiishi chisaka? Antu ayisoñamishili nawu anzeña yakuda, elileña mwenimu nayuma yejima yadiñawu nayu chidi neyi manji amuolivi nivinyu.
(Chimwekeshu 6:8) Nawa chinelili nami nitali, namweni kawalu katookoloka, owu washakamini hanaka kawalu wadiña nejina dakwila nawu Kufwa. Nawa Ijamu damulondeleleña mukamwihi. Dichi ayinkeli wuswa hachibalu chimu chamuchiwana cheseki kulonda ajaheña antu nampoku yakabali yayilehi, nanzala yakapwelendendi, nachipupu chajahanaña ninawanyama amwisaña ayisumi.
wp17.3 5 ¶8-10
Akwakwendela Hatuwalu Awana Hiyanyi?
Mukwakwendelahu wamuchiwana nakwimenaku kufwa muloña wayipupu niyuma yikwawu. Chamanini tuhu chaaka cha 1914, chikatu chaSpanish flu chajahili antu amavulu. Hadaha antu akushika ku 500 miliyoni akatili, dikwila nawu muntu wumu hadi antu asatu wakatili.
Ilaña ichi chikatu chaSpanish flu chadiña hohu neyi ntachikilu. Ankuluñaña esekejeli nawu antu amavulu afwili nachikatu chakusaluka mabobela muyaaka nkulakaji yamuma 20. Nimakonu, antu amavulu anakufwa nachikatu chaAIDS, TB nimaleriya, hela chakwila akwakusandujola anakuzata nañovu nawu amanishi iyi yikatu.
Wejima wawu anakufwa, hela anakufwa nanjita, nzala yakapwelendendi hela yipupu. Ijamu dinatwalekihu kuloñejeka antu anakufwa, chakwila hiyakweti kuchiñejaku.
Kukeña Yuma Yalema yakuSpiritu
(Chimwekeshu 4:4) Kwitanda denidi kwanyeñumukili matanda 24, namweni akulumpi 24 anashakami hamatanda wenawa iku anavwali yakuvwala yitooka nawa kunyitu yawu kwadiña yibaaba yawuru.
(Chimwekeshu 4:6) Kumbidi yanidi itanda kwadiña chuma chafwana ijiya damwekeneña neyi igilasi, iku neyi ilola dakrisitali. Mukachi ketanda nikunyeñumuka itanda dejima, kwadiña yileñaleña yayumi yiwana yadiña namesu kwejima, kumbidi nikunyima.
re 76-77 ¶8
Lubanji Lwakulema Kwetanda daYehova daMwiwulu
Yowanu welukili nindi atupristu diwu akalakeleleña mutabanaka kushankulu. Watela wahayamini hakumona yuma yashimwiniyi munawa mazu: “Kwitanda denidi kwanyeñumukili matanda 24, namweni akulumpi 24 anashakami hamatanda wenawa iku anavwali yakuvwala yitooka nawa kunyitu yawu kwadiña yibaaba yawuru.” (Chimwekeshu 4:4) Chatela ekali atupristu, adiña akulumpi 24, ashakamini hamatanda nawa avwalili jawanta. Indi awa akulumpi hiyanyi? Hiyawayishewa amuchipompelu chawakwaKristu, asañulañawu nakuya mwiwulu nakushakama mumaluña ayikaniniyi Yehova. Tuneluki ñahi mwenimu?
re 80 ¶19
Lubanji Lwakulema Kwetanda daYehova daMwiwulu
Indi iyi yileñaleña yayumi yinakwimenaku yumanyi? Chimwenu chamweniyi cheñi kaprofwetu mukwawu Ezekeli, Chatukwashaña kuwana ñakwilu. Ezekeli wamweni Yehova wudi hekalu dindi damwiwulu, nawa wudi nayileñaleña yadifwanaku nayamweni Yowanu muchimwenu chindi. (Ezekeli 1:5-11, 22-28) Nkuminina, Ezekeli wamweni cheñi ikalu didi hanu nayileñaleña yayumi. Hela chochu haniyi mpinji, iyi yileñaleña yayumi wateneneña akerubi. (Ezekeli 10:9-15) Yileñaleña yayumi yiwana yamweniyi Yowanu atela adiña akerubi aNzambi, yileñaleña yikweti yifulu yamaneni mukuloñesha kwindi kwakuspiritu. Yowanu wahayamini wanyi hakumona akerubi anemani kwakwihi naYehova, muloña mutabanaka yakushankulu, emikileña akerubi ayedi awuru hewulu dachimbañu chachitiyañenu, emeneneñaku itanda daYehova. Hakachi kanawa akerubi ayedi dihafuminineña izu daYehova neyi nakuhana nshimbi kudi muza.—Kwidika 25:22; Masamu 80:1.
(Chimwekeshu 5:5) Ilaña wumu hakachi kanowu akulumpi wanlejeli nindi: “Lekaku kudila. Tiyaña! Mutupa wakumuchidi waYuda, muji waDavidi, nemiki mushindu kulonda yavuñululi iwu muvuñilu nikulamuna yilamiku 7 yaniwu muvuñilu.”
“Tala, Mutupa waKumuchidi waYuda”
Mutupa kakavulu amushimunaña nawu wukweti wulobu. Komana mwamonahu dehi chambilawunyenzi mesu namesu? Neyi mwamumonahu dehi, chakadi kujina mutupa wadiña mwikoli mwahembelañawu atunyama. Hela chochu mwatiyili woma hakumumona. Chimwamushinshika iwu kanyama wasweja ñovu hamesu niyena yayitala, mukwiluka nenu mutupa hatiyaña woma chuma chidi chejimaku. Bayibolu yahosha nawu mutupa “wabadika anyama ejima ñovu hafuminaña akwawu munjilaku.” (Yishimu 30:30) Kristu wukweti wulobu neyi mutupa.
6 Tuhanjekenu njila jisatu mwamwekesheleliyi Yesu wulobu neyi mutupa: hakwimenaku nsañu yalala, hakuleta wuñaji, nikuumika makabisha. Chitwadiza iyi nsañu tukwiluka netu wejima wetu tunateli kumwimbujola Yesu hakwikala omika, chili twekala omika hela nehi.
Kutaña Bayibolu
(Chimwekeshu 4:1-11) Hanyima yayumiyi, chinelili nami nitali, namweni chenzelu chakwenzununa mwiwulu, nawa izu datachi dinatiyili datiyakeneña neyi mpuña iku dinakunleja nadu: “Inzaku munu mwiwulu kulonda nukuleji yuma yikumwekana.” 2 Hanyima yachumichi, hohenohu nekalili muñovu yaspiritu, namweni niitanda mwiwulu dadiña mwiluña dadu nawa hetanda denidi hadiña washakaminihu. 3 Owu washakaminihu wamwekeneña neyi ilola dajasiperi nawa neyi ilola dasaridini, nawa kwitanda denidi kwanyeñumukili kansuluñunda kamwekeneña neyi ilola daemarodi. 4 Kwitanda denidi kwanyeñumukili matanda 24, namweni akulumpi 24 anashakami hamatanda wenawa iku anavwali yakuvwala yitooka nawa kunyitu yawu kwadiña yibaaba yawuru. 5 Kunidi itanda kwafumineña nzaji, mazu nikudidima; nawa kunidi itanda kwadiña manoñu 7 abutukileña kesi, awa manoñu emenañaku aspiritu 7 aNzambi. 6 Kumbidi yanidi itanda kwadiña chuma chafwana ijiya damwekeneña neyi igilasi, iku neyi ilola dakrisitali. Mukachi ketanda nikunyeñumuka itanda dejima, kwadiña yileñaleña yayumi yiwana yadiña namesu kwejima, kumbidi nikunyima. 7 Chileñaleña watachi wamwekeneña neyi mutupa, chileñaleña wamuchiyedi wamwekeneña neyi mwana kañombi wachizamba, chileñaleña wamuchisatu, kumesu indi kwamwekeneña neyi kwamuntu, nawa chileñaleña wamuchiwana wamwekeneña neyi mbuulu watuukaña. 8 Dichi iyi yileñaleña yayumi yiwana yadiña nampuula iwu 6, iwu 6; nawa iji mpuula jadiña namesu kwejima nimwishina. Nawa mpinji yejima, mwaana niwufuku yahoshaña nawu: “Wajila, wajila, wajila Yehova Nzambi, Wañovu Jejima, wadiñaku, wudiku nawa wunakwinza.” 9 Mpinji yejima yahanaña iyi yileñaleña yayumi kulema, kalemesha nikumusakilila Owu washakama hetanda, Owu wahandaña haya nyaaka nanyaaka, 10 awa akulumpi 24 adibukaña heseki kumesu aNowu washakama hetanda nikudifukula kudi Owu wahandaña haya nyaaka nanyaaka, nawa anatilaña yibaaba yawu kumbidi yetanda nakuhosha nawu: 11 “Yehova Nzambi yetu, watelela kutambwila kulema, kalemesha niñovu, muloña yeyi waleñeli yuma yejima nawa muloña wankeñelu yeyi, dichiyekalililiku nawa dichiwayileñeleli.”