“Ilenuña Mwenimu” Twakanakana Chanukishu haApril 5
1. Muloñadi kwanakana Chanukishu chikwalemena?
1 “Ilenuña mwenimu muñanakanaña nachu.” (Luka 22:19) Nanawa mazu, Yesu wayilejeli atumbanji twindi kwanakana kufwa kwindi kwakuhana mulambu. Hamuloña wayuma yejima yakoña ifutu damuloña, akwaKristu alemesha chikupu ifuku dakwanakana Chanukishu hachaaka hachaaka. Chineli hitukuswila kwakwihi nakwanakana Chanukishu chachinu chaaka haApril 5, tunateli kumwekesha ñahi netu twamusakililaña Yehova?—Kol. 3:15.
2. Tunateli kumwekesha ñahi kusakilila haChanukishu kuhitila mukudiza nikutoñojoka chikupu?
2 Diloñeshenu: Kakavulu twadiloñeshaña hayuma yitwamonaña netu yalema. Tunateli kudiloñesha mumuchima kwanakana Chanukishu kuhitila mukudizila hamu nachisaka yuma yamwekeni mumafuku akukumishaku akuhanda kwaYesu hanu hamaseki nikutoñojoka chikupu hayuma yeniyi. (Ezera 7:10) Ndandanda yajiNsona jantesha jidi muKalenda nimumukanda waKutalatala muNsona Hefuku Hefuku, nawa ndandanda yejima kushilahu nitupetulu twesekana twamumukanda waUmuntu Wakulisha yidi hamafu 23-24 muKaposhi Kakutalila kaChibemba kaFebruary 1, 2011.
3. Tunateli kumwekesha ñahi kusakilila haChanukishu neyi tuzata nañovu mumudimu wakushimwina?
3 Shimwinenu: Tunateli cheñi kumwekesha netu twasakililaña kuhitila mukuzata nañovu mumudimu wakushimwina. (Luka 6:45) Kampeni kamukaayi kejima kakutambika antu kuChanukishu kakatachika haMposu March 17. Komana munateli kuhimpa ndandanda yenu kulonda mwakazateña mpinji yeneni mumudimu wakushimwina, hadaha nikuzataku wupayiniya wakukwasha? Kwila muhanjekahu nachisaka chenu hampinji yaKudifukula kwaChisaka kwamelela nehi?
4. Tunateli kuhetelamu ñahi hakwanakana Chanukishu?
4 Twahetelañamu nankashi neyi twanakana Chanukishu chahachaaka nichaaka. Twazañalalaña nikumukeña Nzambi hama chitwatoñojoka hachisambu chamwekesheliyi Yehova hakutwinka Mwanindi wumu hohu neyi ifutu danyiloña. (Yow. 3:16; 1 Yow. 4:9, 10) Chumichi chatusañumunaña kubula kudihandila etu aweni. (2 Kor. 5:14, 15) Kwatuleñelaña cheñi kumuhameka Yehova hatooka. (Mas. 102:19-21) Eñañi, etu ambuña aYehova asakililaña tunakutalila chikupu hakukooleka kutwakekala naku hakwanakana Chanukishu haApril 5 kulonda ‘twakatiyakeshi kufwa kwaMwanta.’—1 Kor. 11:26.