Februar

Wanyalo luwo ranyisi mar Jehova kuom temo matek mondo wang’e Jokristo wetewa. Tem matek mondo ing’e oweteni gi nyimineni e yo maber. Wuo kodgi ka pok chokruok ochakore kod bang’ chokruok, dhi kodgi e tij lendo, kendo ka nyalore, gwelgi mondo uchiem kodgi. Kitimo kamano, ibiro fwenyo ni kara luoro ma nyaminwa moro nigago e ma miyoga seche moko onenore ka ng’at ma ok ohero ji, kata ni owadwa ma iparoga ni ohero mwandu kara en jachiwo mohero ji, kata ni akwede e ma miyoga joot moro kinde mang’eny biro e chokruoge kodeko. (Ayub 6:29) En adier ni ok onego wabed “jo ma donjore e weche mag jomamoko.” (1 Tim. 5:13) Kata kamano, ok rach ng’eyo weche moko e wi owetewa gi nyiminewa kod gik ma gisekaloe ma samoro miyo ok gitim gik moko kaka dwaher. Sama ikawo thuolo mondo ing’e owadwa kata nyaminwa ma samoro timne chwanyiga, ibiro yudo ka yot keche. Dwarore ni ng’ato otim kinda momedore mondo ong’e Jokristo wetene e yo maber. Ka wayawo ne jowetewa chunywa, wabiro luwo ranyisi mar Jehova Nyasaye mohero “ji duto.”​—1 Tim. 2:3, 4; 2 Kor. 6:11-13. w20.04 16-17 ¶10-12

E otieno mogik ka ne pok Yesu otho, ne oparo ne jopuonjrene ni mondo giherre. Nong’eyo ni hera madier ne dhi konyogi siko kamoro achiel kendo nano sama piny ne dhi sin kodgi. Ne ane ranyisi mar kanyakla mar Thesalonika. Chakre kinde ma ne ochakie kanyaklano, ne osand jo kanyaklano ahinya. Kata kamano, owete gi nyimine ma kanyaklano noketo ranyisi maber kuom nano kendo nyiso hera. (1 The. 1:3, 6, 7) Paulo nojiwogi ni gidhi nyime nyiso hera kendo gidhi nyime “timo kamano moloyo.” (1 The. 4:9, 10) Hera ne dhi konyogi hoyo joma chunygi onyosore kendo tego joma yom-yom. (1 The. 5:14) Ne giluwo gima jaote Paulo nonyisogino nikech e barua mar ariyo ma Paulo nondikonegi bang’ higa achiel kama, Paulo nowachonegi niya: “Hera ma ng’ato ka ng’ato oherogo wadgi medore.” (2 The. 1:3-5) Hera ma ne gin-go e kindgi nokonyogi nano e bwo tembe kod sand. w21.03 22 ¶11

Ka wadwaro yudo mich mar ngima mochwere, nyaka waring e yo ma terowa e ngimano. (Tich 20:24; 1 Pet. 2:21) Kata kamano, Satan kod lange dwaro ni waluw yo mopogore; gidwaro ni ‘wadhi nyime wuotho kodgi.’ (1 Pet. 4:4) Gijaro yo ma waluwo, kendo ginyisowa ni yo ma giringoe e ma ber nikech gineno ni yorno miyo gibedo thuolo. To mano doko miriambo maduong’! (2 Pet. 2:19) Nenore maler ni onego wayier luwo yor ngima. Satan dwaro ni wawe ringo e yo madiny ma “tero ji e ngima,” to waring e yo malach ma ji mang’eny e pinyni luwo. Yo malachno ji ohero kendo oyot ringoe. Kata kamano, en yo “ma tero ji e kethruok.” (Mat. 7:13, 14) Mondo wasik e yor ngima kendo kik wagalre, nyaka wagen kuom Jehova kendo wawinje. w20.04 26 ¶1; 27 ¶5, 7

E higni machiegnigi, Russia kod pinje ma riwe lwedo bende osedonjo e “Piny ma Jaber.” (Dan. 11:41) E yo mane? E higa mar 2017, Russia nogoyo tijwa marfuk kendo nomako owetewa gi nyiminewa motueyogi e jela. Bende, osegoyo bugewa marfuk moriwo nyaka Muma mar Loko mar Piny Manyien. E wi mano, osemayowa ofiswa man e piny Russia kaachiel gi Ute Romo kod Ute Chokruok mag Alwora. Nikech wechego, e higa mar 2018, Bura Matayo nowacho ni Russia kod pinje ma riwe lwedo e ruoth ma nyandwat sani. Kata kamano, sama isandoga jotich Nyasaye malit, ok gitemga kedo kata matin, kendo ok gitem loko sirkende mag dhano. Kar mano, giluwoga mana gima Muma wacho ni walem ne “jotelo duto,” to moloyo sama jotelogo ng’ado paro e wi weche ma nyalo mulo ratiro ma wan-go mar lamo Jehova. w20.05 14 ¶9

Jonyuol, mondo nyithindu obed gadier ni giseyudo adiera, dwarore ni gilos osiep e kindgi gi Nyasaye, kendo gibed gadier chuth ni gik ma Muma puonjo e adiera. Ka idwaro ni ipuonj nyithindi adiera ma gisikie, in iwuon nyaka iket ranyisi maber e puonjruok Muma e yo matut. Nyaka ipar matut kuom gik ma ipuonjori. Mano e ka inyalo konyo nyithindi mondo otim kamano bende. Dwarore ni ikony nyithindi ong’e kaka ginyalo tiyo gi bugewa e timo nonro, mana kaka ikonyoga jopuonjre mamoko mag Muma. Kuom timo kamano, ikonyo nyithindi mondo oher Jehova kaachiel gi “jatich mogen kendo mariek” motiyogo e chiwo chiemb chuny. (Mat. 24:45-47) Ng’e ni puonjo nyithindi mana adiera michako ng’ego Wach Nyasaye ok oromo konyogi bedo gi yie motegno. Dwarore ni ipuonjgi “gik matut mag Nyasaye” ka luwore gi hikgi kod nyalogi.​—1 Kor. 2:10. w20.07 11 ¶10, 12-13

E kindegi, dhano adi ma mor bedo osiepe Jehova kata obedo ni gin joricho? Gin ji milionde modhuro. Osiep ma kamano nyalore nikech jogo oketo yiegi kuom misango ma Yesu nochiwo. Misangono e ma miyowa thuolo mar chiwore ne Jehova mi batiswa. Sama wakawo okenge ariyogo, ‘wabedo osiep’ ng’at maduong’ie moloyo e piny gi polo, kendo wabedo e riwruok mar joge ma bende osechiworene mi obatisgi. Ere kaka wanyalo nyiso ni wamor bedo osiepe Jehova? Mana kaka Ibrahim gi Ayub ma nomako osiep gi Jehova kuom higni mang’eny, wan be nyaka wasik ka wamakore gi Jehova kata bed ni wasetiyone kuom higni adi e ndalo mag gikogi. Bende, mana kaka Daniel, onego waket osiep ma ni e kindwa gi Jehova obed motelo e ngimawa. (Dan. 6:7, 10, 16, 22) Jehova biro konyowa rito osiep ma ni e kindwa kode kata sama waromo gi tembe.​—Fil. 4:13. w20.05 27 ¶5-6

Nitie chieng’ moro ma Ruoth Daudi ne oneno dhako moro ka lwokore. Nong’eyo ni Jehova nosechiwo chik niya: “Kik igomb od ng’ato, kata chiege.” (Wuok 20:17) Kata kamano, nenore ni en nodhi nyime rango dhakono. Ne nyaka oyier ni nodhi hero Jehova koso Bathsheba. Kata obedo ni nosebedo ka ohero Jehova ahinya kendo luore, noweyo mondo ringruok ochike. Notimo yiero marach. Timneno noketho nying Jehova, kendo nokelo masira ne jomamoko moriwo nyaka joode owuon. (2 Sa. 11:1-5, 14-17; 12:7-12) Jehova norieyo Daudi mi bang’e ochako obedo gi winjruok maber kode. (2 Sa. 12:13; Zab. 51:2-4, 17) Daudi noparo chandruoge kod masiche ma noyude kinde ma noweyo ma chunye opogore. Be Jehova nokonyo Daudi bedo gi chuny achiel? Ee, nikech bang’ ka ne Daudi osetho, Muma nowacho kuome kama: ‘Ne omakore gi Jehova Nyasache gi chunye duto.’​—1 Ru. 11:4; 15:3. w20.06 11 ¶12-13

Muma pimo hera ma Jehova oherogo jotichne gi tol. Hera mar Jehova chalo nade gi tol? Ne ane ranyisini: Par ane ni ilwar e nam ma apaka gerie to pi bende ng’ich dhi. Ichiegni nimo. Kae to ng’at moro ma ni e yie machielo dironi gimoro ma nyalo konyi mondo ilewri e wi pi. Kuom adier, ibiro goyo ne ng’atno erokamano. Kata kamano, pod nitie gima nyaka itim mondo e ka itony. Dwarore ni iwuog e pi kanyo. Omiyo, biro dwarore ni joma ni e yie machielocha odirni tol imaki mondo giywayigo nyaka e yieno. Mana kaka Jehova nowacho e weche ma ni e ndiko ma kawuono, nosiko koywayo Jo-Israel ma noweye. Mano e gima Jehova timoga e kindewagi bende sama ng’ato odok chien kendo ochako nimo e chandruoge kod parruok mang’eny. Odwaro ni joma kamago ong’e ni oherogi ahinya, kendo oikore ywayogi ire. Jehova nyalo tiyo kodi e nyisogi hera ma kamano. Dwarore ni wanyis joma odok chien ni Jehova oherogi kendo wan be waherogi ahinya. w20.06 27 ¶12-13

Ka ne oneg Stefano ma bende ne en japuonjre, thoth Jokristo ma ne ni Jerusalem noringo ‘mokere e gwenge te mag Judea gi Samaria,’ kendo moko kuomgi nochopo nyaka alwora maboyo mag Saipras kod Antokia. (Tich 7:58–8:1; 11:19) Jopuonjrego noromo gi pek mang’eny. Kata kamano, pod ne gidhi nyime lando wach maber gi kinda kamoro amora ma ne gidhiye, kendo nochak kanyakla mang’eny e alwora duto ma ne ni e bwo loch mar Rumi. (1 Pet. 1:1) Kata kamano, pod nitie pek mang’eny ma noritogi. Kuom ranyisi, e higa mar 50 kama, jatend Jo-Rumi miluongo ni Klaudio nogolo chik mondo Jo-Yahudi duto owuog Rumi. Omiyo, Jo-Yahudi ma nosebedo Jokristo ne nyaka dar e miechgi kendo gidhi gidag kuonde mamoko. (Tich 18:1-3) E higa mar 61 kama, jaote Paulo nondiko ni nosand Jokristo wetene, notuegi e jela, kendo noyak nyaka gigegi. (Hib. 10:32-34) Kendo mana kaka jomamoko, Jokristogo bende ne nyaka nyagre gi dhier kod tuoche.​—Rumi 15:26; Fil. 2:25-27. w21.02 26-27 ¶2-4

Kata Satan gi lange tim ang’o, ok ginyal mono Jakristo wuotho e adiera ka Jakristono osetimo duto monyalo mondo oteg yiene. (2 Joh. 8, 9) Ok onego wahum sama jopinyni osin kodwa. (1 Joh. 3:13) Johana paronwa ni “piny duto ni e teko mar ng’at marach.” (1 Joh. 5:19) Kaka giko mar pinyni medo kayo machiegni, e kaka mirimb Satan be medo bedo mager. Nitie yore mamoko motiyogo e monjowa mopogore mana gi terruok kod miriambo mag joma ong’anjo ne adiera. Kuom ranyisi, onyalo tiyo bende gi sand. Satan ong’eyo ni odong’ gi kinde machuok monyalo temo chochogo tijwa mar lendo kata ketho yiewa. Mano e momiyo pinje moko ogoyo tijwa marfuk. To mano ok mon owetewa gi nyiminewa ma ni e pinjego dhi nyime nano. Kinda margi nyiso maler ni kata Jachien sandwa manade, pod wanyalo loye! w20.07 24 ¶12-13

Jehova ne dwaro ni dhano odag gi mor e piny ma jaber ma nosechueyo. To ka ne Adam gi Hawa ong’anjo ne Wuon-gi ma noherogi, richo kod tho nodonjo e piny. (Rumi 5:12) Jehova nokawo okang’ mane? Mapiyo piyo, nowacho kaka nodhi reso oganda dhano. (Cha. 3:15) Noloso chenro mar rawar mondo obi ogol nyikwa Adam gi Hawa e tuech mar richo kod tho. Mano ne dhi yawo ne ng’ato ang’ata ma dwaro tiyone yor ngima ma nyaka chieng’. (Joh. 3:16; 1 Kor. 15:21, 22) E kinde ma Jehova biro tiyo gi Yesu e chiero ji tara gi tara, nenore ni ok obi chierogi giduto riat. Ang’o momiyo wawacho kamano? En nikech ka ji omedore e piny apoya kamano, mano nyalo kelo chochni mang’eny. To Jehova ok nyal timo gik moko e yo ma ok ochanore. Ong’eyo ni mondo kue obedie, nyaka ket chenro maber.​—1 Kor. 14:33. w20.08 14 ¶3; 15 ¶5

Japuonjre onego ong’e ni puonjruokne onego okonye bedo Janeno mar Jehova. Mosmos, japuonjre Muma mohero puonjruok biro timo dongruok mochop e batiso. Mokwongo, japuonjreno nyaka ng’e Jehova, ohere, kendo oket yie kuome. (Joh. 3:16; 17:3) Kae to obiro bedo gi winjruok maber gi Jehova, kendo chako makore gi kanyakla. (Hib. 10:24, 25; Jak. 4:8) Gikone, japuonjreno biro weyo timbe maricho kendo loko chunye gadier. (Tich 3:19) E kindego, yie ma en-go biro chwale mondo oland ne jomoko gik ma opuonjore. (2 Kor. 4:13) Kae to obiro chiwo ngimane ne Jehova kendo nyiso mano kokalo kuom batiso. (1 Pet. 3:21; 4:2) To mano kaka chieng’ batisono en odiechieng mor ne ji duto! Sama japuonjre kawo okenge ma nyiso ni otimo dongruok mondo ochop e batiso, pwoye kendo jiwe mondo omed dhi nyime timo dongruok. w20.10 17-18 ¶12-13

Kipimori gi jomamoko e kanyakla, inyalo chako paro ni in ng’ama nono. E kanyakla, jomoko nigi mich mar puonjo, moko to ong’eyo chano gik moko, to moko be olony e tij kwath. Samoro ineno ni joma kamago oloyi. Mano nyiso mana ni ibolori, kendo ing’eyo ni nitie kama iremie. (Fil. 2:3) Kata kamano, ber tang’! Ka po ni kinde duto ipimoriga mana gi joma nigi nyalo makende, chunyi biro jok. Inyalo kata paro ni onge gima inyalo konyogo kanyakla kata matin, to mano e ma jaote Paulo nokwero. E kinde Jokristo mokwongo, Jehova nomiyo Jokristogo mich mag roho maler, kata kamano, ne ok omiyogi mich ma chalre. (1 Kor. 12:4-11) To pod ng’ato ka ng’ato kuomgi ne konyo kanyakla e yo moro. E kindewagi, ok miwa mich mag roho maler e yor hono. Kata kamano, puonj ma wayudo e wachno to pod chal achala: Kata obedo ni wan gi nyalo mopogore opogore, Jehova ogenowa waduto. w20.08 23 ¶13-15

Kikwayo Jehova mondo omiyi chir, obiro dwoko lamoni kendo ok obi jwang’i ngang’. (Tich 4:29, 31) Oikore siri kinde duto. Par kaka osekonyi mondo inyagri gi chandruoge mopogore opogre, kod kaka osemiyi teko mar timo lokruoge ma dwarore e ngimani. Kuom adier, ka Jehova nokonyo jotichne machon ma ging’ado Nam Makwar, onge kiawa ni in bende obiro konyi mondo ibed jalup Kristo. (Wuok 14:13) Bed gadier mana kaka jandik-zaburi ma nowacho weche ma yudore e ndiko ma kawuono. Jehova nyalo konyo jolendo manyien mondo gibed gi chir. Ne ane ranyisi mar Nyaminwa Tomoyo. Chieng’ ma nohango lendo ot ka ot, ng’at ma nokwongo romogo nokokne niya: “Ok adwar wach Joneno mag Jehova!” kae to oloro dhoot matek. Tomoyo nonyiso ng’at ma ne gilendogo niya: “Iwinjo gima ng’atno owacho? Onge kata gima asenyise, to osemana fwenyo ni an Janeno mar Jehova. Mano mora malich!” Sani Tomoyo en painia mapile. w20.09 6 ¶13-14

Asa nonyiso oganda ni Jehova e ma ‘nosemiyogi kue kuonde duto.’ (2 We. 14:6, 7) Asa ne ok oneno kinde mag kuego kaka kinde mag yueyo ayueya. Kar mano, ne otiyo gi thuolono e gero taonde, ohingni, kuonde ma jorit bedoe, kod rangeye. Nonyiso Jo-Juda kama: “Pinyni en marwa.” Ang’o ma Asa ne temo wacho? Gima nowacho en ni ji ne ni thuolo wuotho koni gi koni e piny ma Nyasaye nosemiyogi kendo gero ute. Onge ng’ato ang’ata ma ne kwedogi. Nojiwo ji mondo oti maber gi kinde mag kue. Asa notiyo bende gi kinde mag kue e medo jolwenyge teko. (2 We. 14:8) Be mano nyiso ni ne ok ogeno kuom Jehova? Ooyo. Kar mano, Asa nong’eyo ni kaka ruoth, ne en gi migawo mar neno ni oiko joge maber ne chandruok moro amora ma ne ginyalo romogo e kinde ma biro. Asa nong’eyo ni kinde mag kuego ne ok dhi siko nyaka chieng’. To adier mano e gima notimore! w20.09 15 ¶4-5

Jaduong’-kanyakla nyalo dewo joma ni e kanyakla ahinya, kendo onyalo keto chike mondo orit rombe mag Nyasaye!’ Kata kamano, nitie pogruok moko madongo e wi ting’ ma jodong-kanyakla nigo kod ma wiye udi nigo. Kuom ranyisi, Jehova oseketo jodong-kanyakla mondo obed jong’ad bura, kendo osemiyogi ting’ mar golo joricho motamore loko chunygi e kanyakla. (1 Kor. 5:11-13) Mopogore gi mano, Jehova osemiyo wiye udi teko ma ok omiyo jodongo. Kuom ranyisi, wi ot nigi ting’ mar keto chike ne joode kendo neno ni joode oluwo chikego. (Rumi 7:2) Wi ot nyalo keto ne nyithinde chik e wi seche monego giduog ot. Bende, en gi ting’ mar miyo nyithinde kum ka po ni ok giluwo chikego. (Efe. 6:1) Dichwo ma jahera biro winjo pach chiege ka pok oketo chike ma tayo ode. Timo kamano en gima ber nikech dichwo gi dhako gin “ringruok achiel.”​—Mat. 19:6. w21.02 16-18 ¶10-13

Achiel kuom gik momiyo adiera ma ni e Wach Nyasaye gin adiera makende en ni Jehova elogi mana ne joma obolore kendo ma ‘chunygi ni kare.’ (Tich 13:48) Joma kamago oyie gi yo ma Jehova tiyogo e puonjo ji adiera e ndalowagi. (Mat. 11:25; 24:45) Ok wanyal puonjore adierago kendwa wawegi ma wawinj tiendgi, to bende, onge gimoro amora ma dipim gi adierago. (Nge. 3:13) Wan bende Jehova odhialowa gi migawo mar puonjo jomamoko adierane kod dwache. (Mat. 24:14) Adiera ma wapuonjo ji gin adiera makende ahinya nikech gikonyo ji mondo gibi e riwruok mar oganda Jehova kendo giyud thuolo mar dak nyaka chieng’. (1 Tim. 4:16) Bed ni walendo kuom thuolo malach kata matin, waduto wasiro tich maduong’ moloyo tije te mitimo sani. (1 Tim. 2:3, 4) To mano kaka en thuolo makende tiyo kanyachiel gi Nyasaye!​—1 Kor. 3:9. w20.09 26-27 ¶4-5

E kinde ma ne jaote Paulo dhi Rumi, Jehova nokonye nyadinwoya kotiyo gi Jokristo wetene. Kuom ranyisi, Aristarko gi Luka noramo ni nyaka gidhi gi Paulo Rumi. Ne ging’ado ni gibiro dhi gi Paulo kata ang’o ma timrenegi kata obedo ni Yesu ne pok osingo ne ng’ato ang’ata kuomgi ni ne gidhi chopo Rumi ka gingima. Ne gifwenyo mana bang’e ka koro meli ma ne gintiere oromo gi apaka mager ni gidhi chopo ka ngima. Ka ne gichopo e taon mar Sidon, Julio noyie ne Paulo “odhi ir osiepene mondo gikonye.” (Tich 27:1-3) Kendo bang’e ka ne gidhi Puteoli, Paulo gi jowetene noyudo owete kuno, kendo ‘owetego nokwayogi ni gibed kodgi kuom ndalo abiriyo.’ Seche ma owete man kuondego ne konyo Paulo gi jowetene gi gige ringruok, Paulo to ne jiwogi kuom nyisogi weche mabeyo ma nosetimorenegi.​—Pim gi Tich Joote 15:2, 3. w20.11 15-16 ¶15-17

Jonyuol onego opuonj nyithindgi hero Jehova gi chunygi duto kokalo kuom wechegi kod timbegi. Ng’e ni mich maberie mogik minyalo miyo nyithindi en konyogi giher Jehova. Kae to bende, konygi ng’eyo kaka ginyalo bedo gi chenro mar somo Wach Nyasaye, lemo, dhi e chokruoge ma ok gibare, kod tij lendo. Timo gigo biro konyogi bedo osiepe Jehova. (1 Tim. 6:6) En adier bende ni nyaka imi nyithindi gik ringruok. (1 Tim. 5:8) Kata kamano, par ni winjruok maber ma ginyalo bedogo gi Jehova e ma biro miyo gitony e piny marachni ma gidonj e piny manyien mar Nyasaye, to ok gik ringruok. (Eze. 7:19) En gima morowa neno kaka jonyuol mang’eny ma Jokristo timo yiero mabeyo ne nyithindgi mondo gibed gi winjruok maber gi Jehova! Nyithindo modongo e ute ma chalo kaka mago, bedoga nyithindo ma timbegi beyo kendo ok giywagga ang’e kata matin!​—Nge. 10:22. w20.10 28-29 ¶10-11

Jaote Petro seche moko ne nyaloga rikni wuoyo kata timo gimoro ka pok oparo. Mano ne miyoga oywago ang’e kinde mang’eny. Kuom ranyisi, ka ne Yesu onyiso jootene ni ne idhi sande ma nege, Petro nokwere kowachone weche manie ndiko ma kawuono. (Mat. 16:21-23) Yesu norieyo Petro. Ka ne oganda moro obiro mako Yesu, Petro nomwomore mong’ado it misumba jadolo maduong’. (Joh. 18:10, 11) Kanyo bende Yesu norieye. E wi mago, Petro nopakore ni kata obedo ni joote mamoko mag Yesu ne dhi ringo, en to ne ok odhi weyo Yesu ngang’! (Mat. 26:33) Chunye ne wuonde ni notegno ahinya, kendo mano nomiyo odonjo e obadho mar luoro dhano mi okwedo Yesu nyadidek. Wachno nonyoso chuny Petro, kendo “nowuok oko mi noywak malit ahinya.” (Mat. 26:69-75) Nyaka bed ni noparore ka be Yesu ne dhi ng’wonone. Gima ber en ni Petro ne ok oyie mondo gik ma notimorego onyos chunye chuth. Bang’ kwedo Yesu nyadidek noloko chunye mi oduogo moriwore gi joote wetene e tij Jehova.​—Joh. 21:1-3; Tich 1:15, 16. w20.12 20 ¶17-18

Nitie yore mang’eny ma wi ot nyalo nyisogo ni obolore. Kuom ranyisi, ok ogen ni chiege gi nyithinde biro timo gik moko e yo makare chuth. Ochiko ite maber ne paro ma joode chiwo kendo neno ka be onyalo tiyo gi parogo kata ka dipo ni ok oyie gi parogo duto. E wi mano, dichwo mobolore, oyie kata mana konyo e tije moko mag ot, kata ka ogandagi okawo tijego kaka mag mon. Mano seche moko ok yotga. Nikech ang’o? Nyaminwa moro ma nyinge Rachel wacho kama: “Korwa, ka dichwo okonyo chiege e weche mag ot kaka luoko sende kata timo ler, jirende kod wede nenoga ni ok en dichwo, kendo ni dhako oloye.” Ka po ni mano e paro ma ji nigo koru, pair ni Yesu noluoko tiende jopuonjrene, kata obedo ni mano ne en tich ma wasumbni e ma nonego obed ni timo. Wi ot maber ok odich gi moro jomamoko, to gima duong’ moketo motelo en moro chiege gi nyithinde. w21.02 2 ¶3; 4 ¶11

Gik mabeyo ma notimore e ngimawa chon gin gueth ma wuok kuom Jehova; kata kamano, ok nyal pimgi gi gueth ma wabiro yudo e piny manyien. Jomoko nyalo chwanyowa, kata kamano, ka wayiero ng’wononegi to wabiro dhi nyime tiyo ne Jehova ka wamor. Ka waweyo mondo chunywa ochandwa mokalo tong’ e wi richo ma ne watimo chon, mano biro monowa dhi nyime tiyo ne Jehova. Kata kamano, mana kaka Paulo, onego wabed gadier ni Jehova nyalo ng’wononwa. (1 Tim. 1:12-15) Wageno dak nyaka chieng’ e paradiso. Kendo, e piny manyien, ok wabi parore e wi gik machon. Muma wacho kama ka owuoyo e wi wachno: “Ji ok nopar gik machon.” (Isa. 65:17) Parie wachni: Jomoko kuomwa osetiyo ne Jehova kuom higni mang’eny kendo koro giseti, kata kamano, e piny manyien gibiro bedo rowere. (Ayub 33:25) Kuom mano, wang’aduru e chunywa ni ok wabi keto pachwa kuom gik mosekalo. Kendo wadhiuru nyime chomo wang’wa tir kuom gik man nyime kendo timo duto ma wanyalo mondo wamor Jehova! w20.11 24 ¶4; 29 ¶18-19

Ang’o ma oritowa nyime ka? E kinde masira maduong’, Jehova biro resowa e yore moko ariyo madongo ahinya. Mokwongo, obiro reso jotichne momakore kode e kinde ma obiro chwalo ruodhi mag pinyni mondo oketh Babulon Maduong’, ma en, dinde duto mag miriambo. (Fwe. 17:16-18; 18:2, 4) Kae to mar ariyo, obiro reso jotichne e kinde ma obiro tieko piny Satan e Har–Magedon. (Fwe. 7:9, 10; 16:14, 16) Ka wasiko ka wamakore gi Jehova, onge hinyruok moro amora mosiko ma Satan nyalo kelonwa. Kar mano, en e mobiro yudo hinyruok ma biro tieke chuth. (Rumi 16:20) Omiyo, sik kirwako gige lweny, kendo kik ilonygi. Kik item kedo kendi, kar mano, yie mondo oweteni gi nyimineni okonyi. Bende, luw kaka Jehova tayi. Kitimo kamano, inyalo siko ka in gadier ni Wuonu ma jahera ma ni e polo biro dhi nyime tegi kendo riti.​—Isa. 41:10. w21.03 30 ¶16-17

Ere kaka wanyalo nyiso ni wageno kuom Jehova? Wanyalo timo kamano kuom luwo kaka ochikowa. Muma oting’o sigendni ma nyalo konyowa ng’eyo kaka wanyalo bedo gi chuny mokuwe kendo geno kuom Jehova. Sama isomo sigendnigo, tem neno gima nokonyo jotich Jehova machon-go bedo gi chuny mokuwe kata obedo ni ne gikalo e akwede. Kuom ranyisi, ka ne Sanhedrin okwero joote ni kik gichak gilendi, joote ne ok oyie gi wachno. Kar mano, ne giwacho gi chir niya: “Nyasaye e ma nyaka wawinj nikech en e jalochwa, kar winjo dhano.” (Tich 5:29) Kata mana bang’ ka nosechwadgi, chuny jootego ne ok onyosore. Nikech ang’o? En nikech ne ging’eyo ni Jehova ne konyogi. Jehova ne mor kodgi, omiyo, ne gidhi nyime yalo wach maber. (Tich 5:40-42) Kuom ranyisi, Stefano ne okuwe mos ka nochiegni nege, kendo ‘lela wang’e ne chal gi mar malaika.’ (Tich 6:12-15) Nikech ang’o? En nikech nong’eyo ni Jehova ne mor kode. w21.01 4 ¶10-11

Mano nyiso ni gin gi chuny maler e nyim Jehova, kendo osekwan-gi kaka joma kare ma Jehova morgo. (Isa. 1:18) Gisechiwore mobatisgi, kendo gisenyiso yie motegno e misango mar Yesu, kendo gin gi winjruok maber gi Jehova. (Joh. 3:36; 1 Pet. 3:21) Omiyo, giwinjore chung’ e nyim kom-loch mar Nyasaye kendo ‘tiyone odiechieng’ gotieno’ e laru mar hekalu ma ni e piny ka. (Fwe. 7:15) Kata gie kindegi, gilando wach Pinyruoth gi kinda kendo loko ji obed jopuonjre ka giketo Pinyruoth obed mokwongo e ngimagi. (Mat. 6:33; 24:14; 28:19, 20) Oganda mang’ongo ma biro tony e masira maduong’ ni gadier ni Nyasaye biro ritogi nikech ‘Jal mobet e kom-loch biro yaro hemane kuomgi.’ Singo ma rombe mamoko osebedo ka rito gi siso biro chopo kare. Singono wacho ni, ‘Nyasaye noywe pi wengegi duto.’​—Fwe. 21:3, 4. w21.01 16 ¶9-10

Wamor bedo e kind jotich Jehova kendo watemoga luwo chenro mar wich ma Jehova oseketonwa. Muma nyisowa ni Jehova ogeno mon mana kaka ogeno chwo bende. Kuom ranyisi, Muma nyisowa ni e kinde Jokristo mokwongo, Jehova nomiyo mon kod chwo rohone maler ma nokonyogi timo honni kaka wuoyo e dhok mopogore opogore. (Tich 2:1-4, 15-18) Mon gi chwo bende osewal gi roho maler mondo obi oloch gi Kristo. (Gal. 3:26-29) Joma biro yudo ngima e piny ka bende gin mon kod chwo. (Fwe. 7:9, 10, 13-15) Bende, osemi chwo gi mon migawo mar lando wach maber kendo loko ji obed jopuonjre Yesu. (Mat. 28:19, 20) Kuom ranyisi, bug Tich Joote wuoyo e wi nyaminwa moro miluongo ni Priskila kaachiel gi jaode miluongo ni Akula, ma nokonyo Apolo, jal ma nosomo ahinya winjo tiend Ndiko maler.​—Tich 18:24-26. w21.02 14 ¶1; 15 ¶4

Jodongo, un gi ting’ maduong’ mar konyo jolendo duto mondo obed molony e tijgi mar yalo kod puonjo. Ka ng’ato oluor tayo japuonjre sama un kode, inyalo konye tayo japuonjreno. Jodongo nyalo konyo ahinya e jiwo jolendo mondo ginan e tij puonjo. (1 The. 5:11) Kata obedo ni samoro waonge gi japuonjre mar Muma, pod wanyalo konyo ng’at machielo ma otim dongruok kendo ochop e batiso. Wanyalo konyo jalendo ma tayo puonjruok Muma kuom chiwo paro moik maber, ma ok wawuoyo ahinya. Wanyalo mako osiep gi jopuonjre mag Muma sama gibiro e Od Romo, kendo ketonegi ranyisi maber. Jodongo bende nyalo jiwo jopuonjre ka gichano mondo gibed e puonjruok margi, kendo ginyalo jiwo jopuonj kuom pwoyogi kendo tiegogi. Kuom adier, wabiro bedo mamor ka wang’eyo ni ne wakonyo ng’ato, kata mana e yo moro matin mondo oher Jehova kendo tiyone. w21.03 13 ¶18-19

Daudi nonyiso ni nong’eyo ting’ ma ne en-go kendo ni ne inyalo gene. Kuom ranyisi, ka ne pod orawera, norito rombe wuon-gi gi kinda ahinya. Mano ne en tich ma ne nyalo kelone hinyruok moko. Nitie kinde ma nonyiso Ruoth Saulo kama: “Asebedo ka akwayo rombe wuora kendo chieng’ moro sibuor ne obiro mokawo rombo, to chieng’ machielo ondieg dubu bende ne obiro motimo kamano. Ne alawo ondiegno mi agoye piny kendo areso rombo e dhoge.” (1 Sa. 17:34, 35) Daudi nong’eyo ni nonego orit rombe wuon-gi maber. Owete ma pod tindo nyalo luwo ranyisi mar Daudi kuom bedo gi kinda sama gitimo migawo moro amora momigi. Daudi noloso winjruok machiegni ahinya gi Jehova ka ne pod en rawera. Winjruok ma ne en-go gi Jehova ne en gima duong’ moloyo kata chir ma ne en-go kod lony ma ne en-go e goyo thum. Daudi ne neno Jehova kaka Nyasache kendo Osiepne mogeno ahinya. Un owete ma pod tindo, gima duong’ moloyo munyalo timo en tego winjruok ma ni e kindu gi Jehova Wuonu ma ni e polo. w21.03 3 ¶4-5