Sama Ng’at Mwahero Otho?

Bebe nohero wuon-gi ahinya. Kata obedo ni ng’at ma ne hoye gi wechego ne en osiepgi ahinya. Bebe nowinjo ka wechego medone mana lit. Nosiko kowacho e chunye ni, “Litna ni baba otho.” Higni moko bang’e ka nondiko wach ma notimoreno, weche ma notiyogo ne nyiso ni pod ne en gi kuyo e chunye.

Mana kaka ne otimore ne Bebe, kinde malach nyalo kalo ka ng’ato pod nigi kuyo e chunye, to moloyo ka ng’at ma othono ne giherorego ahinya. Muma wacho ni tho en “jasigu mogik.” (1 Jo-Korintho 15:26) Tho japore e ngimawa sama ok wapar, kae to omayowa jogo mwageno. Onge ng’ama nyalo dak ma ok ng’ate moro amora othoe. Omiyo, ok onego okawwa gi wuoro ka piny ochamowa nikech walalo ng’atwa mwageno e tho.

Nyalo bedo ni isegapenjori niya: ‘Kawoga kinde marom nade ka pok ng’ato oloyo kuyo ma tho kelo? Ere kaka ng’ato nyalo nyagore gi lit ma tho kelo? Ere kaka anyalo hoyo joma joggi otho? Be jomotho chieng’ nobed mangima kendo?’