Tich Maduong’ie Moloyo
1. Kawo tij lendo mapek biro miyo wachiwre e yore mage?
1 Ang’o momiyo ijiwowa kinde duto ni wachiw thuolowa, tekowa, kod mwanduwa ne tij lendo? Nikech onge tich maduong’ie maloyo mano! Paro matut kuom kaka tijni mulo ngima ji biro jiwowa mondo wamed tiyo tich maok nochak onwoni.—Tich 20:24.
2. Ere kaka tijwa mar lendo miyo nying maduong’ mar Jehova bedo maler?
2 Omiyo Nying Jehova Bedo Maler: Tij lendo jiwo ni Pinyruodh Jehova e lwet Kristo Yesu biro golo sirkande duto mag dhano kendo tieko chandruoge duto momako dhano. (Math. 6:9, 10) Tijno miyo Jehova yudo duong’ kaka jal makende manyalo reso dhano kuom tuoche koda tho. (Isa. 25:8; 33:24) Nikech iluongowa gi nying Jehova, joma neno timbewa mabeyo kod kinda mwatimo nyalo miye duong’. (1 Pet. 2:12) Mano mor manade ma wan-go kuom lando nying Jehova e piny ngima, ma en Jaloch kendo Ruoth!—Zab. 83:18.
3. Gin gweth mage ma jogo marwako wach Pinyruoth yudo?
3 Reso Ngima Ji: Jehova “ok odwar mondo ng’ato otho, to mondo ji duto olok chunygi.” (2 Pet. 3:9) Kata kamano, ka onge ng’ato mapuonjo ji, ere kaka gibiro ng’eyo tim ma Jehova neno ni ber kata rach? (Jona 4:11; Rumi 10:13-15) Ka ji orwako wach maber, ngimagi bedo maber nikech giweyo timbe maricho. (Mika 4:1-4) E wi mano, gibedo gi geno maber mar ngima mochwere. Tijwa mar lendo kod puonjo gi kinda resowa wawegi kendo reso jogo mawinjowa. (1 Tim. 4:16) Mano kaka wan gi migawo makende e tich maduong’ni!
4. Ang’o momiyo owinjore watim duto mwanyalo e tij lando Pinyruoth kod timo jopuonjre?
4 Odong’ kinde matin to masira maduong’ kelo giko mabiro poyo piny marachni. Jogo ma lamo Jehova biro tony. Omiyo, tij lendo kod timo jopuonjre e tich maduong’ie moloyo, makonyo ji kendo monego otim mapiyo e kindegi. Mad wami tijno thuolo mokwongo e ngimawa!—Math. 6:33.