Onego Wasik ka Wan gi Kinda e Tij Lendo
1 Higa ka higa chakre 1992, Joneno mag Jehova osetimo kinda e tiyo gi seche mokalo bilion achiel e tij lando Pinyruoth kod timo jopuonjre. Mano kaka wasebedo mamor kuom thuolo matin mar tiyo tich maber miwuorono!—Math. 28:19, 20.
2 Ka kuom adier, erokamano gi pak onego mi Jehova, moseritowa e tijwa mar lendo e ndalogi ma gin “kinde mag chandruok.” (2 Timo. 3:1) Ang’o madwarore kuomwa mondo wasik ka wan gi kinda e tich maduong’ni?
3 Gima Miyowa Kinda: Hero Nyasaye kod dhano wadwa e yo matut, kaachiel gi gombo manie chunywa mar chopo chiwruokwa, gin gik majiwowa e tijwa mar Pinyruoth. (Math. 22:37-39; 1 Joha. 5:3) Hera miyo wachiwore mondo mi watim duto ma wanyalo e tij lendo.—Luka 9:23.
4 Rit Kinda Ma In-go: Jasikwa ma en Jachien timo duto monyalo mondo onyos kinda ma wan-go e tij lendo. Ng’ichng’ich mar joma nie alwora ma walendoe, gik manie pinyni magalo ji, gik mochuno mag ngima, kod parruok nikech tuwo gin mana moko kuom gik ma Jachien tiyogo mondo otem nyoso godo kinda ma wan-go.
5 Kuom mano, nyaka wati matek mondo mi wasik ka wan gi kinda. En gima dwarore ni mondo wabed gi ‘herawa mokwongo.’ Mano oriwo somo matut kendo mapile kuom Wach Nyasaye ma en Muma, kendo tiyo gi gigo duto ma “jatichno mogen, kendo mariek” chiwonwa.—Fwe. 2:4; Math. 24:45; Zab. 119:97.
6 Mana kaka weche mokor manie Muma nyiso maler, odiechieng’ ma Jehova nokethgo joma ok luor Nyasaye kayo machiegni ahinya. (2 Pet. 2:3; 3:10) Ka wachno nie pachwa, watiuru matek mondo omi wasik ka wan gi kinda, ka watimo duto ma wanyalo e tich ma sani dhi nyime e piny mangima mar lando Pinyruoth kod timo jopuonjre!