Be Isenyiso Ng’ato Kaka Itimo Puonjruok mar Muma e Limbe Mokwongo?

Nitie weg udi ma konyisi ni inyalo tim kodgi puonjruok mar Muma to jowacho ni ok gidwar kata ni gipuonjore Muma e kanisegi. Ginyalo paro ni watimo puonjruok mar Muma e yo machal gi kanise mamoko, omiyo ok gine kaka puonjruok ma kamano nyalo konyogi ng’eyo weche ma gikiya kendo kelonegi mor ahinya. Kuom mano, kar wacho mana ni nitie chenro mar puonjruok Muma gi ji, donge nyalo bedo maber kinyisogi kaka itimo puonjruogno e limbe mokwongo? Par ane ranyisini: Kik iwachnegi mana ni ing’eyo tedo ahinya kendo ni ibiro kelonegi chiemo kiduogo; migi chiemono matin gibil! Maluwoni en achiel kuom yore ma inyalo timogo kamano ka itiyo gi paro mayudore e Huduma Yetu ya Ufalme ma Januar 2006 ite mar 6:

“Be iparo ni kinde nochop ma wechegi biro chopo kare? [Som Isaiah 33:24, kae to irit dwoko.] We anyisie wach moro mabiro mori kuom gima waa somoni.” Mi wuon ot bug Muma Puonjo, kae to iel ite mar 36 paragraf mar 22. Som penjo mayudore piny e iteno, kae to ikwa wuon ot mondo omany dwoko sama isomo paragraf. Kae to nwo penjo, chik iti mondo iwinj paro mochiwo. Somuru ndiko machielo mayudore e paragrafno. Penje penjo ma ibiro dwoko e limbe maluwo, kendo itim chenro maber mar dok timo limbe. Isemana chako puonjruok mar Muma!