Kaka Inyalo Tieg Jopuonjre Mondo Olendi
1. Ne iwinjo nade e kinde ma ne ihangoe dhi lendo?
1 Be iparo chieng’ ma ne ihangoe dhi lendo mar ot ka ot? Nyalo bedo ni ne iluor ahinya. Kapo ni ne idhi lendo gi japuonjni mar Muma kata jalendo machielo, nyaka bed ni ne imor ahinya gi kony ma nochiwo. Bedo ni tinde ilony, in bende inyalo tiego jomamoko ma eka hango tiyo tij lendo.
2. Ang’o ma jolendo manyien onego opuonjre?
2 Dwarore ni jolendo manyien opuonjre kaka ginyalo chako wuoyo gi weg udi, tiyo gi Muma, dok timo limbe, kod kaka ginyalo chako kendo tayo puonjruok mar Muma. Bende onego gipuonjre kaka ginyalo lendo e yore mopogore opogore, kaka lendo e yore kod kuonde ohala. Inyalo konyogi lendo e yoregi kuom ranyisi miketo kendo kuom paro michiwonegi.
3. Ere kaka ranyisi mwaketo nyalo konyo jomoko?
3 Ketnegi Ranyisi: Yesu noketo ne jopuonjrene ranyisi kaka nonego gilendi. (Luka 8:1; 1 Pet. 2:21) Ka itimo chenro mar lendo gi jalendo manyien, ik yo moro mayot chakogo lendo ma jalendono nyalo luwo, inyalo tiyo gi yo moro mayot lendogo mayudore e bugewa. Kae to ichiwri mar lendo e ot achiel kata udi ariyo mondo jalendono owinj kaka itiyo gi yorno. Seche ma ulendo, inyalo kwayo jalendono mondo owach ane kaka oneno yo mitiyogono. Mae biro konye mondo one ber mar lendo gi jolendo mamoko kendo biro bedone mayot rwako paro ma ichiwone bang’ lendo ne ng’ato.
4. Ere kaka wanyalo konyo jalendo manyien bang’ winjo kaka olendo?
4 Chiw Paro: Yesu bende nowacho ne jopuonjrene weche ma ne dhi konyogi e lendo. (Math. 10:5-14) In bende inyalo konyo jalendo manyien e yo machalo kamano. Chik iti malong’o seche ma olendo. Bang’ ae odno, puoye gi chunyi duto kuom gima otimo maber kata obedo ni podi nitie kuonde monego otimie dongruok. Kapok ichiwone paro, inyalo weyo mondo ikwong ine e ot machielo ka dotim lokruok kuom gima ne ok otimo maber. Samoro luoro ema ne omone timo maber ahinya. Ket e paro bende ni nyalo ma jolendo nigo opogore, kendo ni nitie yore mang’eny mag timo gimoro.—1 Kor. 12:4-7.
5. Ang’o minyalo wacho kapo ni idwaro chiwo ne jalendo manyien paro?
5 Seche moko jalendo manyien nyalo gombo mondo ikonye gi paro. To kata ka ok otimo kamano, in ema ichiwri mar konye. Ere kaka inyalo timo mano maok ichwanye? Jolendo moko molony osebedo kawacho kama, “Donge anyalo konyie gi paro moro?” kata ni, “Ineno nade yo mane ilendogo?” Gimachielo minyalo wacho en, “An kane pod awendo e tij lendo, nayudo ka tekna . . . , to gima nokonya en. . . . ” Seche moko nyalo bedo maber ka unono kode bug Kutoa Sababu. Mondo omi kik ijoge, ber ka ichiwone paro kuom wach achiel moa tiyogo e lendo.
6. ‘Nyinyo piago nyinyo’ nade kodok korka tij lendo?
6 Nyinyo Piago Nyinyo: Paulo nojiwo Timotheo ma ne en jalendo molony, mondo oketre ne somo ne ji wach Nyasaye kendo e timo dongruok. (1 Tim. 4:13, 15) Kata obedo ni higini mathoth nyalo bedo ni osekalo chakre odiechieng’ ma ne ichakoe tij lendo, pod dwarore ni imed lony mari e tij lendo. Puonjri kuom jolendo mamoko mulendogo, ma oriwo nyaka jolendo maok olony ahinya e lendo, bende ikri konyo jomoko e yor muolo, to moloyo, jolendo manyien mondo gilony e lando wach maber.—Nge. 27:17.