Kaka Wanyalo Puonjre Lendo Kuom Jolendo Molony

Kuom adier, wageno ahinya jolendo molony manie kanyaklawa. Moko kuomgi osebedo ka tiyo ne Jehova kuom higni mang’eny. To moko nyalo bedo ni pok otiyo ne Jehova aming’a to gin be gilony e tij lendo. Jolendogo oseneno kaka Yesu osebedo ka tayo kanyakla mar Jokristo e ndalo mag gikogi, kokelo dongruok e tij lando wach maber kod timo jopuonjre. (Mat. 28:19, 20) Sama gitiyo tij lendo, giyudo “teko mokalo mapile,” ma konyogi kedo gi tembe kod chandruoge ma giromogo. (2 Kor. 4:7) Nitie gik mathoth mwanyalo puonjore kuom jolendo molonygo. Jolendogo bedoga mamor ahinya sama gipuonjo jomamoko gik ma gisepuonjore. (Zab. 71:18) Kuom mano, onego wamany thuolo mondo wapuonjre kuomgi. Ere kaka wanyalo timo mano?

Ka Wan e Tij Lendo. Mondo jolendo manyien kata ma pok olony obed gi lony e tij lendo, dwarore ni mondo otieggi. Wanyalo puonjore mathoth kuom ng’iyo kaka jolendo molony lendo. (Som sula ma wacho ni “Dhi Nyime Timo Kinda e Tij Lendo,” e Ohinga mar Jarito ma Februar 15, 2015, paragraf mar adek e bwo wich ma wacho ni, “Kony Joma Pok Olony Ahinya e Tij Lendo.”) Ber mage ma iseyudo kuom lendo gi joma olony e tij lendo?

Inyalo gwelo jalendo moro molony mondo ulend kode. Kapo ni en jalendo ma ja midekre, donge inyalo dhi gi japuonjreni mar Muma e od jalendono mondo utim puonjruok kuno? Bang’ puonjruok, inyalo kwayo jalendono onyisi kuonde minyalo timoe dongruok.

Many Thuolo mar Budho Kodgi: Inyalo medo ng’eyo jolendo molonygo kuom kawo thuoloni mondo ibudh kodgi. Unyalo gwelo jalendo moro molony e lamo maru mar joot kendo goyo mbaka kode. Kapo ni jalendono en ja midekre, donge unyalo timo chenro utim lamo maru mar joot e ode? Unyalo penje kaka ne oyudo adiera. Jehova oseguedhe e yore mage? Dongruok mage ma oseneno? Gin gik mage ma osemore kuom higni ma osebedo kotiyo ne Jehova?

Kik igen yudo kony mokalo ma jolendo molony nyalo miyi. Waduto wan gi lonyo mopogore opogore e tij lendo. (Rumi 12:6-8) Nitie jolendo moko molony ma ok nyal budho kodwa kuom seche mang’eny nikech koro hikgi oniang’. Kata kamano, wanyalo puonjre mathoth kuomgi nikech lony mang’eny ma gin-go e tij Jehova.