Be Ing’eyo Yiero Monego Itim?

Yeng’o maok tiye gi remo itimo kuonde thieth mang’eny e piny mangima. Be ing’eyo yore mag thieth mayudore maok tiye gi remo? Dwarore ni ibed gi ng’eyo ma kamano mondo okonyi timo yiero kuom kit thieth kata yeng’o ma inyalo dwaro. Ng’i vidio mar No Blood​—Medicine Meets the Challenge. Bang’ timo kamano, non gima isepuonjori ka iketo wach yiero midwaro timono e lamo, kendo ka itiyo gi penjo maluwogi mondo okonyi.​—Par wachni: Nikech vidiono oting’o piche moko manyiso ka iyang’o ji e thieta, jonyuol onego oti gi rieko sama gineno vidiono gi nyithindo matindo. Kuonde ma vidioni ok yudre, nonuru “Maswali Kutoka kwa Wasomaji” mayudore e Mnara wa Mlinzi ma Jun 15, 2004 kod Oktoba 15, 2000, kata “Je! Wewe Uko Tayari Kukabili Hali Ngumu ya Kitiba Yenye Kujaribu Imani?” e Huduma ya Ufalme Yetu ma Novemba 1990 kendo unon penjo munyalo dwoko kuom penjo maluwogi.

(1) En wach mane maduong’ mamiyo Joneno mag Jehova ok yie mondo omedgi remo? (2) Kaluwore kod wach thieth, dwaro mar Joneno mag Jehova en ang’o? (3) Jotuwo nigi ratiro mane? (4) Ang’o momiyo en wach mowinjore kendo manyiso ni ng’ato rito ngimane ka oyiero mondo omiye thieth maok tiye gi remo? (5) Ka remo ochwer mang’eny, gin gik mage ariyo ma lakteche onego okwong timo? (6) Gin yore mage ang’wen manyalo chiko lakteche sama gitiyo gi yor thieth maok medie ng’ato remo? (7) Ere kaka lakteche (a) nyalo miyo remo kik chwer mang’eny, (b) kungo ng’injo marokwere, (c) miyo remo omed losore, kendo (d) reso remo sa yeng’o? (8) Ler ane yore mag thieth mong’ere kaka (a) keto remo obed maliw (hemodilution) kod (b) reso remo (cell salvage). (9) En ang’o monego ing’e kuom wach thieth moro amora maok tiye gi remo? (10) Be yeng’o ma kore tek inyalo tim maok omed ng’ato remo? (11) En dongruok mane maber ma timore sani e yore mag thieth?

Yie kod yore moko mag thieth ma inyiso e vidiono en wach ma ng’ato onego oyier en owuon kaluwore gi chuny michiko gi Muma. Be isetimo yiero adimba kuom yore thieth minyalo yie mondo otimni kaachiel gi nyithindi, kae to ipong’o kad mar DPA? Mondo iyud weche malero yoregi e yo matut, ne “Maswali Kutoka kwa Wasomaji” e Mnara wa Mlinzi ma Jun 15, 2004 kod ma Oktoba 15, 2000. Kae to ti kod kalatas madiere mar Tijwa mar Pinyruoth ma Novemba 2006, kama wacho ni, “Aneno Nade Gik Mawuok Kuom Ng’injo Maloso Remo Kaachiel gi Thieth Mitiyoe gi Remba Awuon?,” mondo okonyi timo yiero ma mari iwuon kuom yore thieth minyalo yiego kata dagi. Mogik, ne ni indiko yiero magi e kad mari mar DPA. Jogo ma iyiero mondo owuo e loyi kaachiel kod joodi maok gin Joneno onego onyis malong’o weche duto ma iyiero.