‘Gima Nyasaye Dwaro Mondo Otimre’
1. Wi chokruok makende mar alwora ma higa 2012 mar tijwa en mane, to ang’o momiyo owinjore wanon wachno ahinya?
1 Jehova nochweyowa nikech dwache. (Fwe. 4:11) Omiyo, ok wanyal chopo gimomiyo nochwewa ka ok wapuonjore kendo timo dwaro mar Nyasaye. Timo mano ok yot kaka samoro wanyalo paro, nikech nyaka walo “gombo mag ringruok gi mag paro” kata kedo gi ‘timo gima joma ok oyie dwaro.’ (Efe. 2:3; 1 Pet. 4:3; 2 Pet. 2:10) Ka Nyasaye ok okonyowa, nyalo bedo mayot mondo ‘obadho mar Satan omakwa mondo watim dwarone.’ (2 Tim. 2:26) Program mar chokruok makende mar alwora ma higa mar 2012 mar tijwa biro konyo ng’ato ka ng’ato kuomwa mondo odag kaluwore gi kwayoni, “gi midwaro mondo otimre,” ma en achiel kuom kwayo adek madongo mayudore e lamo mar Ruoth.—Math. 6:9, 10.
2. Wabiro yudo dwoko mag penjo mage e chokruogni?
2 Penjo Mwabiro Yudo Dwokogi: Seche ma ichiko iti ne program, tem yudo dwoko mag penjogi: Mopogore gi winjo Wach Nyasaye, ang’o ma bende dwarore? Ere kaka wanyalo dhi nyime ng’eyo dwaro mar Nyasaye kuomwa? Ang’o momiyo dwarore ni waikre lendo ne kit ji duto? Ere kaka inyalo yudo ngima maber? Un rowere, ang’o ma kutimo to Jehova bedo mamor kodu? Gweth mage mayudore kuom timo dwaro mar Nyasaye? Ang’o momiyo dwarore ahinya e kindegi mondo wager kendo jiwo jomoko?
3. Ere kaka wanyalo yudo ber chuth kuom programni?
3 Tem matek ichop e chokruogni kendo ichik iti malong’o ne program duto. Samoro owadwa moro moa e Bethel kata jarit malworo ema biro bedo jagol-twak ma ofis ooro. Inyalo wuoyo kode kapok program ochako kata bang’ program, kaachiel gi jaode kapo ni osekendo. Bang’ dok ot, kik ibed ng’at mawinjo to “wiye wilgo,” kar mano non programno ka in kendi kata kaka joot mondo une kaka unyalo dak kaluwore gi dwaro mar Nyasaye chuth.—Jak. 1:25.
4. Ang’o momiyo dwarore ahinya ni waket dwaro mar Nyasaye obed mokwongo ne dwarowa?
4 E kinde mokayo machiegni, ibiro keth jogo maluwo dwachgi kendo modagi bolore ne dwaro mar Nyasaye. (1 Joh. 2:17) Omiyo, wagoyo erokamano ahinya ne Jehova kuom ikonwa programni e kinde mowinjore mondo okonywa keto dwaro mar Nyasaye mokwongo e ngimawa!