Wabiro Pogo Wach Pinyruoth Na. 38 e Dwe mar Novemba!
1. Gin penjo mage ma ji penjorega kuom wach tho, to ere kaka wabiro dwoko penjogo e dwe mar Novemba?
1 Tho en jasik ji duto, bed ni ng’ato nigi yie mane. (1 Kor. 15:26) Ji mang’eny penjorega ni to jomotho dhi kanye, kendo giwuoro kabe chieng’ moro gininegi kendo. Omiyo, kuom dwe achiel, kanyakla duto e piny mangima biro timo kampen mar pogo Wach Pinyruoth Na. 38, ma wiye wacho ni, “Be Jomotho Chieng’ Nobed Mangima Kendo?” Kampen makendeni biro chakore Novemba 1. Bang’ tieko kampen, wabiro tiyo gi Wach Pinyruoth Na. 38 mana kaka wajotiyo gi trakt mamoko.
2. Wach Pinyruoth Na. 38 iye chalo nade?
2 Kaka Iye Chalo: Wach Pinyruoth Na. 38 olos e yo ma kobane to nyime nyiso wach mowuoye kaachiel gi penjo mawacho ni “Didwok ni . . . ee? ooyo? koso samoro?” Ka ielo i Wach Pinyruoth Na. 38, ibiro neno dwoko ma Muma chiwo e wi penjo manie nyime koda ndiko ma siro dwokono, kendo e iye kanyo bende nitiere wich malero kaka ng’eyo dwoko ma Muma chiwono nyalo konyo jasomo. Iye kanyo bende lero gimomiyo wanyalo bedo gadier kuom gik ma Muma puonjo. E toke, nitie penjo ma miyo ng’at ma some thuolo mar paro matut kendo bedo gi siso mar ng’eyo weche momedore.
3. Ere kaka wabiro pogo Wach Pinyruoth Na. 38?
3 Kaka Ibiro Poge: Kampenni ibiro tim mana kaka watimoga kampen mag gwelo ji e Rapar koda chokruog-distrikt. Jodongo biro chano kaka ibiro tim kampenni e alworagi te, kaluwore gi barua ma April 1, 2013 ma noornegi. Kanyakla ma nigi alwora matin nyalo chiwore konyo kanyakla man machiegni kodgi ma nigi alwora malach. Sama ikawo Wach Pinyruoth Na. 38, kaw mana moromi tiyogo juma ka juma. Bang’ pogogi e ute duto manie alworawa, wanyalo miyogi ji sama walendo e lela. Kapo ni watiekogi kapok dwe orumo, wanyalo dhi nyime chiwo buge milendogo e dweno. E Ngeso mokwongo mar dwe mitime kampenno, ok wabi chako puonjruok mar Muma gi ji kaka wajotimo. Kar mano, wabiro mana dhi nyime gi kampen. E giko juma, onego wachiw gasede bende ka mano owinjore. Be itimo chenro mondo ibi iriw kampen makendeni lwedo chuth?