Yud Mor Kuom Wach Nyasaye

JAL mogwedhi en jal ma “morne maduong’ en kuom chik Jehova.” Jal ma kamano somo Wach Nyasaye kendo “oparo aming’a kuom chikne odiechieng’ gi otieno.” (Zab. 1:1, 2) Be ijayudo mor ma kamano sama isomo Muma? Inyalo timo ang’o mondo imed yudo mor mabiro nikech somo Wach Nyasaye?

Winj Jehova Sama Owuoyo

Kik isom asoma weche wiye wiye. Tem neno e pachi chal ma ne nitie kinde ma ne indiko wechego. Winj dwond joma wuoyo e Muma. Sama isomo sula mokwongo mag Muma, winj ane kaka Jehova owuon leronwa okenge ma ne okawo mondo omi piny obed kama ber, mowinjore dhano odagie. Winj ane sama onyiso Wuode, Jatich Molony, ni kinde osechopo mar chweyo dhano mokwongo. Tem ane neno pichani: Adam gi Hawa ng’anjo, Nyasaye miyogi kum, kae to oriembogi giwuok e Paradis. (Chakruok, sula mag 1-3) Inyalo hum nono sama isomo kaka dwol moro a e polo kendo nyiso ayanga ni Yesu Kristo en Wuod Nyasaye mohero, ni en e jal ma ne Nyasaye ooro mondo ochiw ngimane ne dhano. (Math. 3:16, 17) Tem paro bende kaka jaote Johana nowinjo e chunye kane Jehova owacho niya: “Neuru! Achueyo gik moko duto obed manyien.” (Fwe. 21:5) Kuom adier, somo Wach Nyasaye e yo ma kama kelo mor gadier!

Dhi nyime somo Wach Nyasaye, kendo mano biro miyo ing’e kaka Jehova en Jal maduong’ mowinjore omi luor. Ibiro bedo gi gombo motegno mar sudo machiegni gi Jalno moherowa, manyisowa ng’wono, makonyowa ka wayie bolore mondo watim dwache, kendo manyisowa kaka yorewa duto nyalo dhi maber.—Josh. 1:8; Zab. 8:1; Isa. 41:10.

Kaka imedo tiyo gi seche mang’eny e somo Muma, e kaka ibiro medo bedo mamor kuom ng’eyo matut dwaro mag Nyasaye. Kata kamano, ibiro bedo mamor moloyo kanyo. Sama ineno kaka somo Muma konyi nyagruok e yo mariek gi chandruoge miyudo, ibiro winjo mana kaka jandik zaburi ma nowacho niya: “Puonj magi lich miwuoro! Omiyo aritogi gi chunya duto.” (Zab. 119:129, The Bible in Luo, 1976) In bende ibiro bedo mamor fwenyo puonj mayudore e Ndiko makonyi bedo gi paro koda gombo mowinjore gi dwaro mar Nyasaye.—Isa. 55:8, 9.

Muma oting’o chike matayo timbewa kendo geng’owa kik wahinyre, nimar onyisowa yo makare monego waluw. Sama wasome, waneno kaka Jehova en Wuoro mong’eyo chandruoge ma wabiro yudo kwaluwo gombo mag ringrewa. Ok odwar ni waywag ang’e nikech chandruoge malit mabironwa nikech chayo goyiem chikene makare. Odewowa kendo odwaro ni wabed gi ngima maber moloyo. Somo Wachne miyo wamedo ng’eyo e yo maber moloyo ni en gweth makende bedo kode kaka Nyasachwa kendo Wuonwa me polo.

Som Muma Pile Pile

Jandik-zaburi nowacho niya kuom jalno masomo Wach Nyasaye pile pile: “Gimoro amora motimo dhi maber.” (Zab. 1:3, Luo, 1976) Kuom adier, kata obedo ni wan-gi nyawo magwa, kata ni wadak e piny marach ma Satan oteloeni, kendo Jachien timo kinda mondo ongamwa, somo kendo tiyo gi Wach Nyasaye e ngimawa pile, biro konyowa timo maber e gik moko duto motudore gi winjruokwa gi Jehova.

Nikech wayudo chandruoge mang’eny madiyowa e piny marachni, rwako pach Nyasaye e chunywa sama wasomo Muma, kata mana kuom dakika matin pile ka pile, nyalo miyowa teko. Moko kuom jogo ma ne otwe e jela nikech yie margi, ne nyalo mana yudo Ndiko achiel achiel mondiki e gasede ming’iewo. Ne ging’adogi, gisomogi ma gimakogi e pachgi, kendo ne gisiko ka giparo matut kuomgi. Jehova nogwedho kinda ma ne gitimono, nikech ne gitimo duto ma ne ginyalo mondo ging’e Wach Nyasaye. (Joh. 17:3) Kata kamano, ng’enywa nigi thuolo moloyo. Kik wapar ni somo Ndiko achiel wiye wiye pile ka pile, biro kelonwa hono moro e ngimawa. Wabiro yudo gweth mana ka watimo lokruok e chenro mar ngimawa mondo wayud thuolo mar somo kamoro ei Muma pile ka pile, paro matut kuom gik mwasomo, kendo tiyo gi puonjgo e ngimawa.

En adier ni e ngimawa mapile, kata mana chenro maber mwasebedo ka waluwo nyalo rochore. Pile kapo ni mano otimore, wakwongo timo gigo mochunowa. Kuom ranyisi, ok wanyal ng’ado ni ok wabi modho pi kuom odiechienge moko mana nikech wadich ahinya. Kata ang’o matimre e ngimawa, onego wadhi nyime kawo kinde mondo wamodh pi mag adiera.—Tich 17:11.

Som Mitiek Muma Mangima

Be in iwuon isesomo mitieko Muma mangima? Jomoko osebedo gi luoro ka giparo ni somo Muma kochakore bug Chakruok nyaka Fweny en tich matek ahinya. Omiyo, ji mathoth ma ne dwaro somo Muma mangima, nokwongo chako gi somo Ndiko mag Dho-Grik mag Jokristo. Nikech ang’o? Samoro nikech ne gineno mayot kaka weche manie bugego mulo ngimagi kaka jogo madwaro luwo ranyisi mar Kristo. Kata nyalo bedo ni ne gineno ni bugego ok ng’eny ahinya—bugego gin mana pasent 25 kama mar Muma mangima. Bang’ tieko somo bugego ma gin 27, ne gineno ni gichak somo buge 39 mag Ndiko mag Dho-Hibrania bende, kendo ne giwinjo ka somogi mit. Bang’ somo mago bende, noyudo giseloso chenro maber mar somo Muma pile, omiyo ne gidhi nyime ma ginwoyo somo kendo Ndiko mag Dho-Grik mag Jokristo, to ok giseweyo chenrono nyaka chil kawuono. Mad in bende iket somo Wach Nyasaye pile pile obed timni mosiko.

Be nitie ng’ato e odu kata e kanyaklau maok nyal somo? Donge inyalo chiwori mondo isomne Muma kinde ka kinde? Koparo matut kuom puonj mowinjo, kendo tiyo kodgi e ngimane, mano biro konye, to in bende ibiro yudo gweth.—Fwe. 1:3.

Bang’ kinde, inyalo dwaro timo nonro momedore kaluwore gi somo Muma ma itimo iwuon. Moko kuom nonrogo biro miyo imed neno tudruok mantie e kind kuonde mopogore opogore ei Muma. Ka Mumbi nigi kar Ndiko motudi, Ndiko mosiemnigo nyalo konyi ng’eyo histori koda weche ma gichalrego. Ginyalo konyi ng’eyo chal manomiyo ondik zaburi mopogore opogore kaachiel gi barupe ma joote Yesu Kristo nondiko. Bug Insight on the Scriptures chiwo weche momedore kendo mogundho e wi jomoko, e wi kuonde moko, koda kido ma Muma wuoyoe. Chat moketi nyiso kaka weche ma ne okor ei Muma nochopo, ginyiso ruodhi koda jonabi ma nodak e tieng’ achiel, kendo gichiwo tarige ma dibed ni gik moko ma Muma owuoyo kuomgi ne otimore.

Kaka imedo paro matut kuom gigo mipuonjori, ibiro ng’eyo gimomiyo chal mar oganda Nyasaye ne lokore. Bende ibiro ng’eyo gimomiyo Jehova ne kawonegi okang’ ma ne okawo. Ibiro neno kaka Jehova nono timbe mag sirkande, timbe oganda mangima koda timbe dhano achiel achiel. Mano biro miyo ing’e kaka oneno gik moko.

Histori mar Muma biro nenoreni maler ka itemo neno e pachi kuonde ma ne gitimore. Map mag Muma nyiso alwora ma Muma wuoyo kuomgi, koda bor manie kind kuonde mopogore opogore. Kuom ranyisi, Jo-Israel nong’ado Nam Makwar gi kar kanye? Piny Manosingi ne duong’ maromo nade? Yesu ne wuotho mabor maromo nade e tije mar lendo? Paulo ne okalo kuonde mage kane en e wuodhene kaka jamisonari? Map koda weche malero kuonde mopogore opogore konyowa mondo gik ma wasomo odonjnwa maber. Inyalo yudo map kanye manyiso pinje ma Muma wuoyo kuomgi? Moko yudore e loko mar Muma mar Biblia Takatifu—Tafsiri ya Ulimwengu Mpya. Bug Insight nigi map chiegni 70, kendo nitie indeks manyiso kama map yudore e giko buk mokwongo. Ti kod Fahirisi mondo iyud map mamoko. Kapo ni bugegi ok yudre, inyalo tiyo gi map mayudore e Ohinga mar Jarito mondo okonyi e somo Muma.

E Ndiko mag Dho-Hibrania, Ruoth Daudi nopako Jehova kowacho niya: “A Nyasaye, weche miparo bende berna ahinya! Kar rombgi ng’eny ahinya!” (Zab. 139:17) E Ndiko mag Dho-Grik mag Jokristo, jaote Paulo nopako Jehova kowacho ni Jehova ema ‘osemiyo ler orieny e chunywa mondo okelnwa ler mar ng’eyo duong’ mar Nyasaye mineno e wang’ Yesu Kristo.’ (2 Kor. 4:6, Luo, 1976) Daudi koda Paulo nodak e tienge mopogore ahinya; kata kamano, giduto ne giyudo mor kuom Wach Nyasaye. In bende inyalo yudo mor kuom Wach Nyasaye kamano, ka ikawo thuolo mar somo weche duto ma Jehova oseketoni e Muma.