“Chikuru Itu Maber Mondo Uwinj Gima Iwachonu”

CHIKO it en gima dwarore ahinya mondo ng’ato opuonjre. En gima nyalo konyo ng’ato mondo otony e masira. Kane Jehova timo chenro mar reso joge wuok e tuech e piny Misri, nochiko Musa mondo onyis jodongo gima ne nyaka gitim mondo eka malaika kik neg nyithind Jo-Israel makayo. (Wuok 12:21-23) Bang’e jodongogo nokowo wechego ne ot ka ot. Ne gikowo wechego gi dhok. Jo-Israel ne nyaka chik itgi malong’o. Ne gitimo ang’o bang’ winjo wechego? Muma wachonwa kama: “Nyithind Israel duto notimo kamano; kaka Jehova nochiko Musa gi Harun, e kaka ne gitimo.” (Wuok 12:28, 50, 51) To nikech Jo-Israel nowinjo wach ma ne owachnegi, ne oresgi e yo makende.

E kindegi, Jehova ikowa mondo oreswa kuom masira maduong’ moloyo mano. Omiyo, onego wachik itwa maber ahinya ne puonj momiyowa. Puonjgo ichiwo e chokruoge mag kanyakla. Be iyudo puonj kaka dwarore chuth e chokruogego? Mano luwore gi kaka ichiko iti mondo iwinj wach.

Be imako puonj madongo michiwo e chokruoge? Be juma ka juma imanyo yore minyalo tiyo gi puonjgo e ngimani iwuon, kata puonjogo jomamoko bende?

Ket Chunyi Obed Moikore Winjo Wach

Mondo puonj mwayudo e chokruoge mag Jokristo okonywa chuth, dwarore ni waket chunywa obed moikore winjo wach. Gimomiyo mano en gima duong’ nenore e gima ne otimore e kinde loch mar Ruoth Jehoshafat ma Juda. Jehoshafat nochung’ motegno korka lamo madier. ‘Nogolo kuonde moting’ore kod gik maket mag Ashera oa e Juda’ kendo nochiko jodongo, Jo-Lawi, kod jodolo mondo odhi opuonj ji Chik Jehova e mier duto mag Juda. Kata kamano, “kwonde moting’ore e ma ne ok ogol.” (2 Weche 17:6-9; 20:33) Lamo nyiseche manono kendo luwo yore mamoko mag lamo ma Jehova ok ne oyiego ma ne itimo kuonde moting’ore, noyudo ogurore ahinya e ngima ji, mi notamo ruoth gologi duto.

Ang’o momiyo chike ma Jehoshafat nochiwo ok nokelo ber kuom kinde malach? Muma wacho niya: “Oganda ne pok oketo chunygi kuom Nyasach kweregi.” Ne giwinjo chike, kata kamano, ne ok gitimo kaka ne dwarore. Nyalo bedo ni ne gineno ni wuotho dhi e hekalu ma ne ni Jerusalem mondo gichiw misengini, ne tek. Bed ni ne en kamano kata ooyo, ne gionge yie ei chunygi.

Mondo kik wadog e yore mag piny ma Satan oteloeni, nyaka waket chunywa obed moikore mar rwako puonj ma Jehova chiwo e kindegi. Wanyalo timo kamano nade? Yo achiel maduong’ en kokalo kuom lemo. Onego wakwa Nyasaye mondo okonywa bedo gi chuny moikore rwako puonjne. (Zab. 27:4; 95:2) Timo kamano biro konyowa kawo kaka gimaduong’ kinda ma owetewa keto mondo Jehova oti kodgi e puonjo oganda mare, kata obedo ni owetewago orem. Mano biro konyowa dwoko ne Jehova erokamano, ok mana kuom gigo manyien mwapuonjore, to bende kuom thuolo ma wan-go mar medo hero gigo ma ne wasepuonjore motelo. Nikech wan kod siso mar timo dwaro mar Nyasaye chuth, wakwayo niya: “A Jehova, puonja yori. . . . Miya aluor nyingi gi chunya duto.”—Zab. 86:11.

Ket Pachi e Gik Mipuonji

Nitie gik mathoth manyalo monowa chiko itwa adimba. Wanyalo bedo gi parruok mang’eny. Koko mawuok kuom jowinjo wetewa kata joma ni oko koda wuodhe ma koni gi koni, nyalo miyo pachwa otangni. Ka ok wawinj maber e dendwa, mano nyalo miyo keto pachwa e gima iwacho obednwa matek. Joma yudo ni pachgi tangni kinde ka kinde, gin joma nigi nyithindo matindo. Ang’o manyalo konyowa keto pachwa e gima ipuonjo e program?

Gigo mwaneno gi wengewa ywayo pachwa e okang’ malach. Teg wengeni kuom jagol-twak nikech mano biro konyi keto pachi kuom gik mipuonji. Sama ohulo Ndiko monego osom—kata ka en Ndiko ming’eyo—el Mumbi mondo isom kode. Kik iwe koko kata wuodhe ma koni gi koni oywa pachi. Ka iweyo wengeni orwak gik mang’eny magalo pachi, puonj mang’eny michiwo e ndiri biro bayi.

Kapo ni ‘weche mang’eny miparo’ miyo bedoni matek keto pachi te e program, kwa Jehova e lamo mondo omiyi paro koda chuny mokuwe madwarore mondo ichik iti maber. (Zab. 94:19; Fili. 4:6, 7) Tim kamano nyadinwoya ka dwarore. (Math. 7:7, 8) Chokruoge mag kanyakla gin chenro mawuok kuom Jehova. Inyalo bedo gadier ni odwaro ni mondo chokruogego okonyi.—1 Joh. 5:14, 15.

Chiko It ne Twege

En adier ni inyalo paro weche mabeyo misewinjo e twege. Kata kamano, chiko it ne twak ok en mana mako weche moko moyiedhi. Twak chalo gi dhi wuoth moro mabor. Kata obedo ni ibiro neno gik mabeyo sama in e wuodhno, gima duong’ en chopo kama idhiye, matiende ni ng’eyo gima twagno dwaro chopo. Nyalo bedo ni jagol-twak dwaro konyo jowinjo mondo ong’e wach moro kata mondo gikaw okang’ moro.

Kuom ranyisi, ne ane twak ma Joshua nogolo ne oganda Jo-Israel, mayudore e bug Joshua 24:1-15. Gima nodwaro chopo e twagno ne en konyo ji okaw okang’ motegno korka lamo madier ka gipogore chuth gi lamo mag miriambo ma ne ni e pinje molworogi. Ang’o momiyo mano ne en wach maduong’ ahinya? Lamo ma miriambo ne onya ahinya, to mano ne nyalo miyo winjruok e kind ogandano gi Jehova okethre. Oganda nowinjo kwayo mar Joshua ma giwacho kama: “Chutho to kik mondo wawe Jehova, mar tiyo ni nyiseche mamagi. . . . Wanati ni Jehova.” Kendo kamano e kaka ne gitimo!—Josh. 24:16, 18, 31.

Sama iwinjo twak, tem ng’eyo gima twagno dwaro chopo. Ne kaka weche ma jagol-twak tiyogo konyo e chopo gima twagno dwaro. Penjri ane gima twagno temo jiwi mondo itim.

Chiko It Sa Wuoyo Moriwo Jowinjo

Puonjruok mar Ohinga mar Jarito, Puonjruok Muma e Kanyakla, koda migepe moko mag Chokruok mar Tijwa, itimo e yor penjo gi dwoko kitiyo gi weche mogo malero Muma.

Chiko it sama itimo wuoyo moriwo jowinjo, seche moko nyalo chalo gi nywako mbaka. Mondo iyud kony chuth, dwarore ni ichik iti maber ahinya. Tem ng’eyo ni mbaka ochomo kanye. Tem ng’eyo kaka jal matayo puonjruogno jiwo wach maduong’ miwuoyoe koda puonj madongo. Dwok penjo mopenjgo e pachi. Chik iti sama jomoko lero kata nyiso kaka wechego nyalo tiyo. Ng’eyo kaka jomoko neno wach moro, nyalo puonji gima nyien mopogore gi ma ne isepuonjori e wi wachno motelo. In bende jiw jomoko kuom chiwo paro ma in-go manyiso yie mari.—Rumi 1:12.

Nono motelo gigo mochan mibiro puonjruok e chokruok, biro konyi keto pachi e puonjruogno, kendo miyo iluwri gi paro ma jomoko chiwo. Kapo ni ok inyal yudo thuolo mar nonogi motelo e yo matut, tem ikaw dakika matin mondo ikal e wechego e yo machuok. Timo mano biro miyo puonjruogno okonyi e yo momedore.

Chiko It e Chokruoge mag Alwora kod mag Distrikt

Kuonde mitimoe chokruoge mag alwora kod mag distrikt nyalo bedo gi gik mang’eny matango pach ji moloyo mago mayudore kuonde mitimoe chokruoge mag kanyakla. Nikech mano, chiko it ok bed mayot. Ang’o manyalo konyowa?

Gima duong’ madwarore ahinya en ni ng’ato onind moromo. Pile, kapok program ochakore, gur e pachi wach maduong’ ma idhi wuo kuome e odiechieng’no. Ng’i moro ka moro kuom wi twege, kendo tem paro ni puonj mage ma gibiro jiwo. Ti malach gi Mumbi. Ji mathoth yudo ni ndiko weche manok kuom puonj mijiwo konyogi keto pachgi kuom program. Ndik piny weche michano tiyogo e ngimani iwuon koda e tiji mar lendo. Pile ka pile sama idhi kata ia e chokruok, wuo gi jomoko kuom weche ma ne ipuonjori. Mano biro konyi guro wechego e pachi.

Tiego Nyithindo Mondo Ochik Itgi

Jonyuol ma Jokristo nyalo konyo nyithindgi—kata mana nyithindo matindo—mondo oyud “riekono ma kelo warruok” kuom biro kodgi e chokruoge mag kanyakla, mag alwora, koda mag distrikt. (2 Tim. 3:15) Nikech nyithindo kitgi opogore, kendo nyalo margi mar chiko itgi bende opogore, rieko dwarore e konyogi mondo gichik itgi maber. Paro maluwogi nyalo konyo.

Ka un e ot, bed gi chenro mondo kinde ka kinde nyithindi obed mos ka gisomo kata ng’iyo piche mayudore e bugewa mag Jokristo. Sama un e chokruok, kik imi nyithindo matindo gige tugo mondo ogal pachgi. Mana kaka ne timore e kinde Jo-Israel machon, e kaka nyithindo bende e kindegi biro e chokruok “mondo giwinji, kendo mondo gipuonjre.” (Rapar 31:12) Jonyuol onego omi nyithindgi, kata mana nyithindgi matindo, kopi mag buge mipuonjruokgo ka owinjore. Kaka nyithindo medo bedo madito, konygi giikre dwoko penjo sama omi jowinjo thuolo mar timo kamano.

Ndiko nyiso ni mondo ng’ato oluw kaka Jehova dwaro, nyaka obed ng’at machiko ite maber. Mani nenore ayanga kaluwore kod gima Musa nowacho ne oganda Jo-Israel, niya: “Aseketo e nyimi ngima gi tho, gweth kod kwet: e momiyo mondo iyier ngima . . . mar hero Jehova Nyasachi, mar winjo dwonde, kendo mar padore kuome.” (Rapar 30:19, 20) E kindegi, winjo gik ma Jehova chiko kendo luwogi e ngimawa, dwarore ahinya mondo omi Nyasaye oyie kodwa kendo wayud gweth mar ngima mochwere. Mano kaka en gima dwarore ahinya mondo watim kaka Yesu nojiwowa ka nowacho kama: “Chikuru itu maber mondo uwinj gima iwachonu”!—Luka 8:18, The Bible in Luo, 1976.