Nwoyo Mondo Ijiw Wach

PUONJO mong’ith dwaro ni ng’ato onwo puonj madongo. Ka onwo puonj maduong’ mokalo nyadichiel, yot ne jowinjo opar puonjno. To kapo ni onwoye e yo mopogore matin, ginyalo winjo tiende maber moloyo.

Kapo ni jowinjo ok nyal paro gima iwacho, wecheni ok bi miyo gitim lokruok e puonj ma giluwo kata e kit ngimagi. Thothne puonj ma gibiro dhi nyime paro gin puonj mijiwo e yo makende.

Jehova, Japuonjwa Maduong’, ketonwa ranyisi maber mar nwoyo wach. Nochiwo Chike Apar ne oganda mar Jo-Israel. Kotiyo gi malaika mawuoyo e loye, nowacho ne ogandano chikego e tie Got Sinai. Bang’e Jehova nondiko chikego ma omiyogi Musa. (Wuok 20:1-17; 31:18; Rapar 5:22) Kitaye gi Jehova, Musa nonwoyo chikego ne Jo-Israel kane pok gidonjo e Piny Manosingi, kendo kokalo kuom roho maler, Musa nondikogi kaka gintie e Rapar mar Chik 5:6-21. Achiel kuom chike ma ne omi Jo-Israel ne en chik mar hero kendo tiyo ne Jehova gi chunygi duto, parogi duto, kendo gi tekogi duto. Chikno bende ne onwo ding’eny. (Rapar 6:5; 10:12; 11:13; 30:6) Nikech ang’o? Nikech, mana kaka Yesu nowacho, mano ne en “chik maduong’ kendo mokwongo.” (Math. 22:34-38) Kotiyo gi janabi Jeremia, Jehova noparo ne Jo-Juda mokalo nyadi 20, gimomiyo luwo chikene e yore duto ne en gima onego gikaw mapek. (Yer. 7:23; 11:4; 12:17; 19:15) Kendo kokalo kuom Ezekiel, Nyasaye nowacho mokalo nyadi 60 ni ogendini ‘nong’e ni en e Jehova.’—Ezek. 6:10; 38:23.

E weche mondik e wi tij Yesu, waneno bende kaka oti maber gi lony mar nwoyo weche. Kaw kuom ranyisi, buge ang’wen mag Injili—moro ka moro kuomgi wuoyo kuom weche madongo ma ne otimore e ngima Yesu, to wechego nwoyore e yo mopogore matin e buge ariyo kata mokalo kanyo kuom buge mag Injili. Kane Yesu puonjo, nonwoyo wach achiel e kinde mopogore opogore koketo wachno e yore mopogore. (Mari. 9:34-37; 10:35-45; Joh. 13:2-17) To kane en e Got Zeituni kodong’ odiechienge matin to otho, Yesu notiyo gi yor nwoyo wach e jiwo puonj maduong’ni: “Rituru; nikech ok ung’eyo ni chieng’ mane ma Ruodhu nobie.”—Math. 24:42; 25:13.

Sama In e Tij Lendo. Sama ilendo ne ji, igeno ni gibiro paro gima iwachonegi. Nwoyo wach nyalo konyi chopo mano.

Kinde mang’eny, nwoyo gima iwuoyo kuome konyo mondo wachno ogurre e pach ng’ato. Omiyo bang’ somo ndiko moro, inyalo jiwe kuom siemo kamoro e ndikono kae to ipenjo ng’ato niya, “Be ineno weche motigo e ndikono?”

Inyalo tiyo maber bende gi sentens mogik mag tieko mbaka. Kuom ranyisi, inyalo wacho kama: “Gimaduong’ ma ageno ni ibiro paro kuom mbakani en . . ” Kae to nwo wachno kikete e yo mayot. Inyalo wacho kama: “Dwaro mar Nyasaye en loko piny obed paradis. Onge kiawa ni dwaroneno nyaka chopi.” Kata inyalo wacho ni: “Muma nyiso maler ni wadak e kinde mag giko mag piny marachni. Mondo oreswa, nyaka wapuonjre timo gima Nyasaye dwaro.” Kata inyalo wacho niya: “Mana kaka waseneno, Muma chiwo puonj matiyo kuom kaka wanyalo nyagore gi chandruoge mag ngima joot.” Seche moko, inyalo mana nwoyo weche sie ma Muma owacho mondo obed puonj monego ng’ato omak e pache. En adier ni mondo inwo wach moro e yo maber, dwaro ni ipar motelo.

Sama idok timo limbe, moriwo koda timo puonjruok mar Muma gi ji, inyalo nwoyo puonj madongo kuom tiyo gi sanduk ma nigi penjo.

Kapo ni ng’ato yudo ka puonj manie Muma tekne winjo kata tiyogo, nyalo dwarore ni inwone wachno kinde ka kinde. Tem wuoyo kuom wachno e yore mopogore opogore. Ok ochuno ni uwuo aming’a e wi wachno, kata kamano, onego ijiw japuonjre mondo odhi nyime paro wachno. Ng’e ni Yesu notiyo gi yorno kane okonyo jopuonjrene mondo olo gombo mar yudo duong’.—Math. 18:1-6; 20:20-28; Luka 22:24-27.

Sama Igolo Twak. Sama igolo twak e ndiri, gima idwaro chopo ok en mana chiwo puonj. Idwaro mondo jowinjo owinj tiend puonjno, gipare, kendo giti kode e ngimagi. Mondo ichop mano, dwarore ni iti gi lony mar nwoyo wach e yo maber.

Kata kamano, kapo ni inwoyo puonj madongo ding’eny ahinya, jowinjo nyalo ol gi winjo gima iwacho. Yier adimba puonj madwarore ni ojiw e yo makende. Thothne mago e puonj madongo mag twak, to ginyalo riwo koda paro mamoko mabiro konyo jowinjo e yo makende.

Mondo inwo puonj madongo e yo maber, inyalo kwongo kwanogi sama ichako twak. Tim kamano kitiyo gi sentens machieko chieko manyiso wiye wiye gima ibiro wuoyoe, kitiyo gi penjo kata ranyisi machuok mawuoyo kuom chandruok moro ma twak biro nyiso kaka iloyo. Inyalo nyiso ni puonj madongo gin adi, kendo chano kaka giluwore. Kae to ler moro ka moro kuom puonjgo sama igolo twak. Inyalo medo jiwo puonj madongogo ei twak kuom nwoyo moro ka moro kuom puonj madongo kapok idhi e machielo. Kata inyalo tiyo gi ranyisi manyiso kaka jowinjo nyalo tiyo gi puonjno e ngimagi. Bende puonj madongo inyalo med jiw kuom tiyo gi weche mitiekogo manwoyo puonjgo, maketo ayanga pogruok e kind puonjgo kod weche mamoko, madwoko penjo ma ne ichakogo, kata manyiso machuok kaka inyalo lo chandruoge ma ne iwuoyo kuomgi.

E wi weche ma wasewuoyoe malo kae, jagol-twak molony ng’iyo adimba chal mar jowinjo mage. Kapo ni moko kuomgi yudo ka winjo tiend gimoro tek, jagol-twak biro fwenyo mano. Kapo ni en puonj moro maduong’, obiro nwoye kendo. Kata kamano, nwoyo puonj moro kitiyo mana gi weche gogogo, ok bi konyo. Puonjo ok en mana nwoyo weche moko sie. Nyaka ibed ng’at manyalo timo lokruok madwarore. Nyalo dwarore ni imed weche moko ma ne ok ichano motelo. Ng’eyo timo lokruok ma kamano kaluwore gi chal mar jowinjo biro konyi ahinya e miyo ibed japuonj maber.