Lero Wach Maduong’ Miwuoyoe

JOGOL-TWAK molony ong’eyo ber mar bedo gi wach maduong’ sie miwuoyoe. Sama giiko twak, ging’eyo ni bedo gi wach maduong’ ma giwuoyoe konyogi luwo wach moro sie kendo gipar matut kuome. Nikech mano, kar wuoyo wiye wiye e wi puonj modhuro, ginyalo lero weche twak e yo makonyo jowinjo moloyo. Sama moro ka moro kuom puonj madongo otudore achiel kachiel gi wach maduong’ miwuoyoe kendo puonjgo gero wach maduong’no, mano konyo jowinjo mondo opar kendo one ber puonjgo.

Kata obedo ni inyalo wach ni wich miwuoyoe ema en wach maduong’, ibiro yudo ni twegeni biro medo bedo maber ka iketo kama twagi ochomo ema obedni wach maduong’ miwuoyoe. Wiye ma nigi weche mang’eny e igi gin kaka Pinyruoth, Muma, koda chier. Inyalo ng’injgi ma gibed weche madongo miwuoyoe mopogore opogore. Ranyisi moko gin kaka: “Pinyruoth, Sirkal Madier,” “Pinyruodh Nyasaye Biro Loko Piny Obed Paradis,” “Muma Ondiki Kuom Much Nyasaye,” “Muma en Buk Matayowa e Ndalowagi,” “Chier Chiwo Geno ne Joma Olalo Joheragi e Tho,” kod “Geno mar Chier Konyowa Chung’ Motegno Sama Wan e Bwo Sand.” Weche madongo miwuoyoegi dwaro ni oler e yore mopogore ahinya.

Lendo ma Yesu Kristo notimo ka en e piny kowacho ni: “Pinyruodh polo osesudo machiegni,” nomakore kendo nojiwo wach maduong’ miwuoyoe e Muma. (Math. 4:17) Ne oler wach maduong’ miwuoyoeno nade? Buge ang’wen mag Injili wuoyo kuom Pinyruodhno mokalo nyadi 110. Kata kamano, Yesu notimo mang’eny moloyo mana tiyo nyadinwoya gi wach mar “pinyruoth.” Kuom puonjne koda honni ma notimo, Yesu noketo maler ni en ema ne en Wuod Nyasaye, Mesia, jal ma Jehova ne dhi miyo Pinyruoth. Yesu bende nonyiso ni kokalo kuome, ne iyawo ne ji thuolo mar bedo jokanyo mag Pinyruoth. Nowuoyo kuom kido ma ne dwarore kuom joma ne idhi mi migawono. Kuom puonjge kaachiel gi honni ma ne otimo, nonyiso maler gik ma Pinyruodh Nyasaye ne dhi timo ne ji konyiso ni gol ma nogologo jochiende gi teko mar roho mar Nyasaye, ne en ranyisi ni “kara pinyruodh Nyasaye” nosebiro ma oyombo joma ne winje. (Luka 11:20) Pinyruodhno ema Yesu nochiko jolupne mondo oland.—Math. 10:7; 24:14.

Bedo gi Wach Maduong’ Miwuoyoe Mowinjore. Ok dwar ni iler wach maduong’ miwuoyoe e okang’ ma Muma timee, kata kamano, bedo gi wach maduong’ mowinjore miwuoyoe pod dwarore.

Kapo ni in ema iyiero wach maduong’ miwuoyoe, kwong inon gima idwaro chopo gi twagi. Kae to sama iyiero puonj madongo mabiro bedoni kaka weche machuok matayi, ne ni gisiro wach maduong’ miyiero wuoyoe.

Kapo ni osemiyi wach maduong’ miwuoyoe, none adimba mondo ing’e kaka onego iger weche momiyi mag twak. Nyalo dwarore ni itim kinda mondo ing’e kaka wachno nyalo konyo koda yore mamoko minyalo gerego. Kapo ni ibiro yiero weche monego igergo wach maduong’ miwuoyoeno, yier wechego adimba mondo wach maduong’ miwuoyoe onere ayanga. To komachielo, kapo ni osemiyi weche monego itigo, pod dwarore ni ing’e kaka ibiro tiyo kodgi e yo madonjo gi wach maduong’ miwuoyoe. Bende onego ing’e gimomiyo dwarore ni jowinjo owinj tiend wechego koda gimidwaro chopo e twagno. Mano biro konyi ng’eyo weche monego ijiw sama igolo twak.

Kaka Inyalo Jiwo Wach Maduong’ Miwuoyoe. Mondo ijiw wach maduong’ miwuoyoe kaka owinjore, nyaka iket mise sama iyiero kendo chano weche mibiro tiyogo. Ka itiyo mana gi weche masiro wach maduong’ miwuoyoe kendo kichano weche machuok matayi kaka owinjore, ibiro yudo ni jiwo wach maduong’ miwuoyoeno chiegni ni donjo adonja kende.

Nwoyo nyalo konyo e jiwo wach maduong’ miwuoyoe. We wakaw ranyisi mar wer ma ng’ato dendogo jaherane. E wendno duto, jawer wuoyo kuom wach maduong’ ma en hera moherogo jalno. Onyalo nwoyo wach maduong’no e yore mopogore opogore. Onyalo kata tiyo gi weche mopogore opogore matiendgi en “hera.” E wi mano, onyalo tiyo gi weche moko mamedo ndhadhu e wer. Pod wendno wuoyo mana kuom wach achielno maduong’ ma en hera. Kamano bende e kaka onego ojiw wach maduong’ miwuoyoe e twak. Mana kaka wach hera nwoyore e wer mangima, inyalo nwoyo weche moko sie moting’o paro mar wach maduong’ miwuoyoe e twak. Mondo iket wach maduong’ miwuoyoe e yore mopogore, inyalo tiyo gi weche matiendgi achiel gi wach maduong’ miwuoyoeno, kata inyalo keto wach maduong’no e yo machielo. Tiyo gi yorego biro miyo wach maduong’ miwuoyoeno obed puonj maduong’ ma jowinjo kawo.

Yoregi tiyo ok mana kuom twege migolo e ndiri kende to bende kuom wuoyo mwabedogo e tij lendo. Ng’ato biro paro mbaka motim e yo machuok mana ka wach maduong’ miwuoyoe nenore maler. Puonj michiwo e puonjruok mar Muma bedo mayot paro mana ka ojiw wach maduong’ miwuoyoe. Kinda miketo e yiero kendo gero wach maduong’ mowinjore miwuoyoe biro konyo kama duong’ e miyo ibed jagol-twak kendo japuonj molony mar Wach Nyasaye.