DWOKO PENJO MAG MUMA
Ang’o momiyo ji timo gik maricho?
Ng’ano ma ne temo Yesu mondo otim richo—Mathayo 4:8-10
Dhano ohero dak e kind joma ohero kuwe, jo ratiro, kendo e kind joma ng’won. To kare, ang’o momiyo timbe mag gero kod mahundu ng’eny ahinya? Pile wawinjo ripode mag gik maricho ma timore. Dibed ni nitie ng’at ma miyo ji timo gik maricho kamano?—Som 1 Johana 5:19.
Be Nyasaye noketo e chuny dhano gombo mar timo richo ka nochueyogi? Ooyo, nikech Jehova Nyasaye nochueyo dhano e kite, kendo nomiyogi nyalo mar nyiso hera kaka mare. (Chakruok 1:27; Ayub 34:10) Bende, Nyasaye nomiyo dhano thuolo mar yiero gima gidwaro timo. Jonyuolwa mokwongo noyiero timo richo ka ne gitamore luwo kit Nyasaye, to mano nomiyo gibedo joricho. Mano e momiyo onyuolwa gi chuny mar timo richo.—Som Rapar mar Chik 32:4, 5.
Be gik maricho biro siko e piny?
Nyasaye dwaro ni wakwed gombo maricho. (Ngeche 27:11) E momiyo opuonjowa kaka wanyalo tang’ gi timbe maricho kendo kaka wanyalo yudo mor madier. Gie sani ok wanyal bedo joma nyiso hera chuth kaka Nyasaye, nimar wan dhano morem.—Som Zaburi 32:8.
Kata obedo ni richo ng’eny e piny sani, Nyasaye pod oweyo richo obedie kuom kinde, mondo dhano duto one lit ma richo kelo. (2 Petro 3:7-9) Kata kamano, e kinde mokayo machiegni piny biro pong’ gi dhano mamor kendo ma luwo chike Nyasaye.—Som Zaburi 37:9-11.