DWOKO PENJO MAG MUMA
Ngima nobed ma chalo nade e kinde mabiro?
Ere kaka tho mar Yesu biro miyo dhano obed joma dewore?
Dhano pod biro medo timo dongruok e weche mag sayans. Kata kamano, be dongruoge ma gitimogo biro miyo dhano obed joma dewore ng’ato gi nyawadgi? Ooyo. E ndalogi, piny opong’ gi timbe mag guondo kod ich-lach. Kata kamano, Nyasaye osingo ne dhano gik mabeyo e kinde mabiro. —Som 2 Petro 3:13.
Wach Nyasaye lero ni e kinde ma biro, ji biro bedo joma oherore. Ji biro dak gi kuwe, kendo onge ng’ato ang’ata ma biro hinyogi. —Som Mika 4:3, 4.
Ere kaka Nyasaye biro tieko guondo e piny?
Nyasaye ne ok ochueyo dhano gi kido mar guondo. Kata kamano, dhano ne oyiero mar ketho chik Nyasaye, to mano ne omiyo gibedo gi richo. Mano e momiyo inyuolo dhano gi kido mar guondo. Kata kamano, Nyasaye biro tiyo gi Yesu e tieko richo kuom dhano, kendo tieko kido mar guondono. —Som Jo-Rumi 7:21, 24, 25.
Yesu ne ochopo dwaro mar Nyasaye ka ne ochiwo ngimane kaka misango, mondo ogonywa a e richo mar Adam. (Jo-Rumi 5:19) Kuom mano, Yesu miyo wabedo gi geno ma jaber mar dak e piny ma ji onge gi kido mar guondo ma miyo gitimo gik maricho. —Som Zaburi 37:9-11.