Inyalo Timo Ang’o Mondo Puonjruok Muma Obedni Mamit Kendo Okonyi?

Joshua somo chike Nyasaye; ohinga mag Jeriko ruombore piny to od Rahab odong’ kochung’; Joshua lemo koting’o lwetene malo

JOSHUA noyudo migawo mapek. Ne dwarore ni ota Jo-Israel nyaka e Piny ma Nosingi kata obedo ne nitie jowasigu kod gik mamoko ma ne nyalo geng’ogi. Kata kamano, Jehova nonyiso Joshua ni ne odhi dhi maber gi migawono, kendo nojiwe niya: ‘Bed gi teko kod chir. Luw chikena. Somgi odiechieng’ gi otieno, kendo itim duto mondikie. E ka yoreni duto nobed maber, kendo inibed mariek.’—Jos. 1:7, 8.

Nikech wan be wadak e “kinde matek ahinya,” waromo gi pek moko. (2 Tim. 3:1) Mana kaka Joshua, wan be wanyalo dhi maber ka waluwo weche ma Jehova nonyisego. Onego wasom Muma pile kendo wati maber gi puonj ma wayudo e iye sama wanyagore gi tembe.

Kata kamano, thothwa nyalo yie ni ok wapuonjrega Muma kaka dwaher, kendo samoro puonjruok ok yotnwa ahinya. To nikech wang’eyo ni puonjruok Muma nyalo konyowa ahinya, ne sanduk ma wiye wacho ni, “Tem Ane Tiyo gi Yoregi” mondo iyud paro moko ma nyalo miyo puonjruok Muma obedni mamit kendo omed konyi.

Jandik-zaburi moro nowero kama: ‘Miya awuoth e yor wecheni michiko; nimar amor ahinya kodgi.’ (Zab. 119:35) Puonjruok Wach Nyasaye nyalo keloni mor mogundho. Ibiro puonjori gik mathoth kendo mabeyo sama inono mwandu ma yudore e Wach Nyasaye.

Kata obedo ni onge oganda ma itayo kaka Joshua notimo, in gi pek moko minyagorigo. Omiyo, mana kaka Joshua, puonjri Wach Nyasaye e yo matut mondo okonyi nyagori maber. Kitimo kamano, in be yoreni duto biro dhi maber.

TEM ANE TIYO GI YOREGI

Lem ka pok ichako puonjori. Muma oting’o pach Nyasaye mondikoni mondo okonyi. Omiyo sama isome, kwa Nyasaye mondo okonyi iwinj tiend gik misomo, ipargi, kendo iti kodgi e ngimani.—Ezra 7:10.
Penjri penjo moko. Sama isomo Muma kata buk moro ma lero Muma, penjri niya: ‘Weche ma asomogi puonja ang’o e wi Jehova? Ere kaka gitudore gi wach maduong’ ma Muma wuoyoe? Ere kaka anyalo tiyo kodgi e konyo jomamoko?’
Par matut kuom gik mipuonjori. Sama isomo, ling’ga matin kinde ka kinde mondo ipar matut. Penjri niya: ‘Wechegi miyo awinjo nade e chunya? Ang’o momiyo awinjo kamano? Wechegi otudore nade gi gik ma nasekaloe chon, ma akaloe sani, kod ma nyalo timorena kinde mabiro? Ere kaka anyalo tiyo gi puonjni e ngimana?’ (Ayub 23:5; Zab. 49:3) Tem ane paro ka be inyalo lero gimomiyo Jehova jiwo joge mondo owere gi timbe moko ma nyalo kelonegi chandruok kata gik ma nyalo timoreni kiluwo yo mopogore.—Rap. 32:28, 29.
Tem neno gik misomogo e pachi. Sama isomo weche ma lero gimoro ma notimore, tem neno gigo e pachi. Kuom ranyisi, wawach ni isomo kaka owete Josef nouse ne Jo-Ishmael. (Cha. 37:18-28) Ang’o mineno, miwinjo, kata ming’ueyo? Ketri e chal mar joma ni kanyo. Ang’o ma dibed ni giparo? Sama itemo dwoko penjogo e pachi, puonjruokni biro bedo mamit kendo mochomo yo.
Ti gi gige timo nonro. Riwruokwa osemiyowa gik mathoth mag timo nonro. Tem ng’eyo gige timo nonro ma un-go e dhou, gibed e jw.org kata mogo e buk. Ka ikia tiyo gi gigo maber, kik iluor penjo jomamoko molony kodgi mondo okonyi. Kuom ranyisi, Watch Tower Publications Index kod Buk Makonyo Joneno mag Jehova e Timo Nonro olos mondo okonyi yudo weche kod ndiko mosewuo kuomgi e bugewa. Inyalo tiyo bende gi apendiks ma yudore e Muma mar New World Translation e dhok miwinjo maber. Apendiksgo nigi weche ma lero kaka alwora moko ne chalo, kaka weche moko noluwore oluwore, kaka ne ipimo pek kod bor mag gik moko, kod weche mamoko ma kamago.
Nwo weche madongo ma isepuonjori. Mano biro konyi paro gigo. Bende, pim ne jomamoko gik mipuonjori. E wi mano, ti kodgi e tij lendo sama mano nyalore. Kitimo kamano, gik mipuonjori biro medo gurore e pachi kendo ibiro tiyo kodgi e konyo jomamoko.