Branch Letter

Ne Jolendo ma Wahero:

Wamor kuom neno dongruok mantie mar tich ma itimo e alwora mar Afrika ma Ugwe higa 2007 mar tij Nyasaye! Kwan mang’eny mag painia makende kod painia mapile oseket e alworawa, kendo gikonyo ahinya e tij lendo. Tij gero ofis mar Tanzania dhi nyime maber. Ne en gima kelo mor ahinya neno ka iwalo ne Jehova ofise mag Burundi tarik Novemba 25, 2006, Rwanda tarik Desemba 2, 2006, kod Uganda tarik Januari 20, 2007. Sudan ne nigi kwan mamalo mar jolendo 1,508 e dwe mar April. Onego wadhi nyime gi paro owetewa man e piny Eritrea e lamo. Gie sani e piny Eritrea, owete 23 nie jela to moko kuomgi osedak e jela kuom higini mokalo 12.

Tara gi tara mag trakt mar Wach Pinyruoth Na. 37 mawacho ni, “Giko Din mar Miriambo Okayo Machiegni! ” ne opogi e alworawa duto. Bang’ yudo traktno kendo some, nindo ne otamo nyaminwa moro e piny Amerka ma ne osedok chien moweyo lendo. Jumapil manoluwe, ne odhi e chokruok kendo okwayo mondo ng’ato opuonjre Muma kode. Jogo ma ne orwako wach ne otiyo gi fom manie ng’e traktno mar Wach Pinyruoth e kwayo brosua mar Endeleeni Kukesha! kendo kwayo mondo ng’ato opuonjre kodgi Muma.

Gima duong’ mamiyo itimo kampen kaka mago, en konyo jogo ma chunygi ni kare mondo opuonjre gima Muma puonjo kuom adier. (Math. 28:​19, 20) Sama ilendo, par jogo manyiso e yo moro amora ni girwako wach, kendo idogi ka in gi geno mar chako puonjruok Muma kodgi. Wamor tiyo kodu kanyachiel e tich maduong’ni, kendo waoronu mos kaachiel gi herawa mar Jokristo.

Wan oweteu,

Ofise mag Burundi, Kenya, Tanzania, kod Uganda