Ti gi Secheni Maber Ahinya e Tij Lendo

¹ Kuom adier, gik monego otim e tijwa mar lendo ng’eny, to ndalo modong’ nok. (Joha. 4:​35; 1 Kor. 7:29) Kuom chenro maber kod ikruok motim chon, wanyalo tiyo maber ahinya gi seche ma wachano tiyo godo e lendo.

² Bed Moikore: Kapok idhi e romo mar chano dhi e lendo, ne ni in gi buge mibiro tiyogo kendo ibed gi weche ma ibiro konyorigo e paro. Ka osetiek romono gi lamo dhi kama ulendoe achiel kachiel. Mano biro miyo in kod jogo ma utiyogo thuolo mar tiyo gi seche manwang’ore maber kaka unyalo e tij lendo.

³ Komiyi migawo mar tayo romo mar chano dhi e lendo ne ni ichake e sa. Ta romono e yo machuok​—⁠kik ikal dakika 10 kata 15. Kapok igonyo romono, ne ni ng’ato ka ng’ato ong’eyo ng’ama olendogo koda kama gidhi lendoe.

⁴ Sama Inie Tij Lendo: Sama osetiek romo mar chano dhi lendo, kik ubudh kanyo kayiem nono, to udhi kama ubiro lendoe moriere. Ka ing’eyo ni ibiro telo ne jomoko e wuok kama ulendoeno, to inyalo chano iwuon kaka ibiro dok mondo kik imi joma odong’ bende owuog chon. Ka ulendo ji mangeny, par jomoko manyalo bedo ni riti mondo itiek wuoyo gi ng’ama ilendone. Mano nyalo dwaro ni iti gi rieko e weyo ng’at ma mino wachno, kata chano duogo mondo ine ng’at morwako wach bang’e.​​—⁠Math. 10:11.

⁵ Kidok timo limbe, inyalo geng’o wuotho kayiem ka ichano neno joma odak e alwora achiel kae to bang’e idhi e alwora machielo. Inyalo goyo ne moko kuomgi simo mondo ing’e kabe gibiro yudore e ot. (Nge. 21:5) Ka ing’eyo ni ibiro kawo seche mang’eny e timo limbe, inyalo tim chenro mondo joma ulendogo olend machiegni gi kanyo kata timo limbe machielo.

⁶ Wadak e kinde mar keyo maduong’ ahinya e wach Nyasaye. (Math. 9:​37, 38) Tijni biro rumo mapiyo. Kuom mano, gombo marwa onego bed tiyo maber ahinya gi sechewa e tij lendo.