Ikri Maber Chuth ne Rapar

Mano kaka en mor kendo thuolo ma jaber ne jolup Kristo kuom ikruok chuth ne otieno ma waparoe tho mar Yesu Kristo! (Luka 22:19) Gin ang’o monego watim mondo waikore ne Rapar?

◼ Sa kod Kama Itimoe Rapar: Ng’ato ka ng’ato onego ong’e maber sa kod kama ibiro timoe Rapar. Ka kanyakla mokalo achiel biro tiyo gi Od Romo achiel, dwarore ni ng’ato ka ng’ato ochop e sa kendo wuok e yo mowinjore, nimar seche moket e kind romo mar kanyaklago tin. Ber ka ji weyo thuolo ma ok gichokre kuonde midonjogo, kuonde miwuothoe, kata kuonde keto mtokni.

◼ Gwelo Ji: Be jolendo duto nigi kalatese moromo mag gwelo ji, kendo ng’eyo weche ma kalatesego oting’o? Be isetimo ikruok maber kuom kaka ibiro chiwo kalatesego? Gin ng’a gini ma ibiro gwelo gi kalatesego? Dwarore otim kinda mondo omi ji kalatesego duto.

◼ Kony mar Chopo: Moko kuom joma orwako wach kaachiel gi moko kuom owete gi nyimine nyalo dwaro kony mondo gichop e Rapar, kata kony e yore moko. Gin chenro mage ma osetim mag konyo ji kaka mago?

◼ Mkate kod Divai: Neuru ni mkate kod divai ok olwor nyaka chop sama chieng’ osepodho. Onego otim chenro mar kadho mkate kod divai ne jal moro amora mowal kuom roho manyalo bedo ni tuwo kendo ok nyal chopo e Rapar. Mkate gi divai mowinjore onego omany ma keti obed moikore.​​—⁠Ne Ohinga mar Jarito ma Februar 15, 2003 (Swahili), ite mag 14-15, paragraf 14, 17.

◼ Od Romo: Onego oluok Od Romo maler chon. Sande kod gilase, mesa gi kitamba mowinjore onego okel ma gibed moikore chon kama itimoe Rapar. Ka ibiro tiyo gi kamoro machielo, onego one ni kinanda kod spika tiyo maber mondo mi ng’ato ka ng’ato mantie owinj jagol-twak. Onego oyier jorwak welo kod jogo mabiro lworo divai gi mkate chon mondo onyisgi chenro ma ibiro luwo, kendo jiwo negi wach rwakruok mobidhore.

E nyasi maduong’ie moloyoni, ma en Rapar mar tho Yesu Kristo, dwarore ni wabed moikore maber chuth waduto ng’ato ka ng’ato, kendo kaka kanyakla. Kuom adier, Jehova biro gwedho ahinya jogo duto manyiso erokamano kuom gik moko duto ma osechiwo ne dhano kokalo kuom misango mar Wuode mohero, Yesu Kristo.