Onego Wadog Timo Limbe Karang’o?
1. Timo jopuonjre oriwo ang’o?
1 Timo jopuonjre oriwo dok limo ng’ato ang’ata madwaro puonjore e wi chenro mar Pinyruodh Jehova. (Math. 28:19, 20) Kinde maber ahinya mar dok timo limbe ne joma orwako wach luwore gi chenro marwa kaachiel gi margi. Ang’o momiyo onego wadog mapiyo bang’ limbe mokwongo?
2, 3. Ang’o momiyo onego watem dok mapiyo kaka nyalore?
2 Ang’o Momiyo Onego Wadog Mapiyo? Tij lando “Wach Maberni mar pinyruoth” osetim ahinya, kendo giko mar pinyni okayo machiegni. (Math. 24:14; 1 Pet. 4:7) Kuom mano, ka “ndalo mar warruok” pod nitie ne joma rwako wach, nyaka wawinj kaka ichikowa mondo ‘wayal wach Nyasaye kinde duto,’ ma oriwo dok mapiyo kaka nyalore mondo wajiw joma orwako wach.—2 Kor. 6:1, 2; 2 Tim. 4:2.
3 Satan dwaro ahinya golo kodhi moro amora mar Pinyruoth ma wanyalo chwoyo e chuny ng’ato. (Mari. 4:14, 15) Joot, joma ng’ato tiyogo, kod joma moko kinde mang’eny jaro joma orwako wach. Ka wadok mapiyo to wabiro jiwo wach ma ne wawuoyoe mokwongo kapok jomoko ogolo kodhi ma ochwo.
4. Ere kaka wanyalo keto mise mar dok sama wan e limbe mokwongo?
4 Chan mar Dok: En gima ber loso chenro mar dok sama podi in e limbe mokwongo. Chiw penjo mibiro dwoko e limbe maluwo. Ndiko weche mabiro konyi e limbe maluwo en gima dwarore. Ka in gi thuolo, inyalo chano mar dok timo limbe kinyne kata bang’e e odiechieng’no. Ka limbe mokwongo otim e giko juma to kor juma yudo ka ng’at morwako wachni tiyo, onyalo yieni mondo ilime kendo e giko juma maluwo. Ka ichano mar dok, ne ni itimo kamano.—Math. 5:37.
5. Ere kaka dok maok wadeko biro konyowa chopo ote ma Yesu nomiyowa mar timo jopuonjre?
5 Wan gi gimomiyo onego wadog mapiyo limo joma orwako wach. Kuom mano, chan kode kendo idog mapiyo, nikech “ndalo modong’ nok.” (1 Kor. 7:29) Ka wadok mapiyo limo joma orwako wach mar Pinyruoth, kinda mwatimo nyalo yudo nyak maber.