Ogo Gasedewa e Yo ma Winjore gi Ji Duto
1. Jatichno mogen kendo mariek luwo ranyisi mar jaote Paulo e yo mane?
1 Mana kaka jaote Paulo ma ‘nobedo ngeche duto ni ji duto’ mondo olandnegi wach maber, jatichno mogen kendo mariek tiyo gi gasedewa mondo oland wach maber ne ji mawuok e ogendini mopogore opogore kendo ma nigi yie mopogore opogore. (1 Kor. 9:22, 23) Omiyo, ber ka watiyo gi Ohinga mar Jarito kod Amkeni! ka waketo e paro ni ogogi ne jomage.
2. Ogo Amkeni! mondo okony jomage?
2 Amkeni!: Gasedni ogo mondo okony joma chalo gi ma jaote Paulo nolendonegi kane owuoyo gi “jo Athene.” (Tich 17:22) Jogo ok ne gin Jokristo kendo ok ne giwinj tiend Ndiko malong’o. Kamano bende, ogo Amkeni! mondo okony joma nigi ng’eyo matin kuom Muma kata maok ong’eye chuth. Nyalo bedo ni gikiya puonj mag Jokristo, ok gigeno din, kata ok ging’eyo ni puonj mag Muma konyo e weche mapile mag ngima. Gima duong’ momiyo ogo Amkeni! en ni mondo okony joma some obed gadier ni Nyasaye madier nitie. Gimachielo momiyo ogoye en ni mondo oger yie kuom Muma kendo konyo joma some ng’eyo ni Joneno mag Jehova opogore gi dinde mamoko.
3. Gocho ka gocho mar Ohinga mar Jarito ogo ne jomage?
3 Ohinga mar Jarito: Gocho mar ji duto ogo mondo okony joma miyo Nyasaye kod Ndiko luor e okang’ moro. Gin gi ng’eyo matin kuom Muma mak mana ni ok giwinj tiend puonjne e yo mobidhore. Gichalo gi joma Paulo nowacho kuomgi ni ‘oluoro Nyasaye.’ (Tich 13:14-16) Gocho mar Ohinga mar Jarito mar puonjruok ogo ne Joneno mag Jehova. Paulo ne geno ni joma ne somo barupene nong’eyo Ndiko kendo ne nigi ng’eyo makare kuom adiera. (1 Kor. 1:1, 2) E yo machalo kamano, sula mayudore e gochoni ogo ne jogo mabiro e chokruogewa, ma ong’eyo tiend weche moko ma Joneno tiyogo kod yie margi.
4. Ang’o momiyo owinjore wang’e gima gaset ka gaset mwalendogo wacho?
4 Kata obedo ni wajochiwo gasede ariyo e tij lendo, achiel kende ema wawuoyo kuome seche mwalendo. Omiyo, ket chenro mar ng’eyo gima gaset ka gaset wacho. Ka itimo kamano, biro bedo mayot ahinya mondo ichiw ne joma iromogo gasede mowinjore kodgi.