Nyaka Ol ne Kodhi Pi Mondo Gidongi
1. Ang’o manyaka ol ne pi mondo odongi?
1 Kodhi mopidhi nyaka ol negi pi eka mondo gidongi. Mano bende ema nyaka watim ne joma nie alworawa ma wasepidho kodhi mag adiera e chunygi. (1 Kor. 3:6) Nyaka walimgi nyadinwoya ka waolo ne kodhi mag ranyisigi pi ka watiyo gi Wach Nyasaye, kapo ni wadwaro ni gitwi, gidongi, kendo ginyagi.
2. Ere kaka wanyalo keto mise mar dok timo limbe?
2 Ti gi Penjo: Seche miiko weche midhi tiyogo e lendo, inyalo iko bende penjo e wi wach moro manyalo moro wuon ot mondo ubi uwuoye kidok lime. Penj penjono bang’ ka usewuoyo e wach moro e limbe mokwongo, kendo itim chenro mar dok wuoyo e wi penjono. Ng’eny jolendo yudo ni ber ka giyiero wach moro e bug Muma Puonjo mondo giti gi wachno e nyiso ng’atno kaka itimo puonjruok mar Muma.
3. Weche mage minyalo ndiko kuom ng’at morwako wach?
3 Ndik Weche Manyalo Konyi: Mapiyo bang’ wuoyo gi ng’ato e limbe mokwongo, ndik gik manyalo konyi kidok lime. Ndik nying ng’atno kod adres mare. Ber bende ndiko tarik kod sa ma uwuoyoe, gima ne uwuoyoe, kod buk kapo ni ne imiye. Dibed ni ne onyisi din mare? Be en gi joot? Be ne onyisi gik mohero kod mago machando pache? Wechego biro konyi ng’eyo gima dwarore ni uwuoye e limbe maluwo. Ndik bende odiechieng’ ma uwinjoru ni ibiro dok lime kod penjo ma ubiro wuoyoe.
4. Ang’o momiyo dwarore ni watim sinani seche ma walimo joma orwako wach?
4 Tim Sinani: Satan ok bi ol e kinda motimo mar ‘golo wach mosechwo’ e chuny ng’ato. (Mari. 4:14, 15) Omiyo, kik chunyi nyosre kapo ni ok iyudo ng’at ma idok limo. Inyalo weyone barua moro machuok e bwo dhoode. Painia moro nochako puonjruok mar Muma gi dhako moro e dhoot to ka nodok lime ne ok oyude, omiyo ne ondikone barua. Bang’e ka nyaminwano noyude e ot, dhakono nowacho kaka ne omor gi yo ma nodewego e baruano. Seche ma waolo ne kodhi mag adiera pi, wabiro yudo mor seche ma gitwi, gidongo, kendo ‘ginyak, moko piero adek, moko piero auchiel, to moko piero apar achiel.’—Mari. 4:20.