Weche Mosene
◼ Australia: Jal moro miluongo ni John, ma en ng’at mosomo, ne dhiga e kanisa kotin, to bang’e nolokore mobedo ng’at maok dwar winjo kata matin ni Nyasaye nitie. Painia moro nomiye brosua mar Uhai—Ulitokana na Muumba? kae to e limbe maluwo nomede brosua mar Chanzo cha Uhai. Painiano nodhi nyime terone gasede manyien kendo nyise sula moko e gasedego mawuoyo kuom chuech kod weche mokor e Muma. Ka nochopo kama painiano noneno ni John koro noikore ng’eyo weche momedore, nomiye buk mar Biblia—Neno la Mungu au la Binadamu? Bang’ ka John nosesomo bugno, nochako wacho ni samoro nyalo bedo ni Nyasaye nitie. Bang’e, painiano nomiyo John bug Muma Puonjo, kae to onono kode sula mar 2, paragraf mar 8, kod paragraf mag 13-16. Ndiko manie paragrafgo nomoro John ahinya, mi owacho kama: “Aparo ni onego achak atem ane nono Muma kendo.”
◼ Mexico: Dichwo moro nowacho ne owadwa moro ni Muma ok en buk mowuok kuom Nyasaye. Owadwano noyie konye bedo gadier ni Muma en buk mowuok kuom Nyasaye. Bang’ limbe mogwaro, wechego nochako mulo chuny ng’atno, to ahinya wuon sama nopuonjore gik ma Nyasaye dwaro ni watim. Nonyiso owadwano niya: “Kinde ma ne wachako nono kodi Muma, naparo mana ni wapuonjore buk machal mana gi buge mamoko, kendo wechego ne ok konya. Sani to ka wasome, to ahinya-ahinya weche motudore gi timbe monego wabedgo, wechene chwoyo chunya ndi.”
◼ Amerka: Kane dichwo gi dhako moro mokendore lendo e yo makende kuonde ma ji ng’enyie e taon moro, ne giromo gi dhako moro ma a Taiwan. Dhakono noyie ni Nyasaye nitie, kata kamano, noparo ni Muma to en bug jo pinje mag Ulaya. Dhakono nowacho ni gimomiyo nodhi kama jolendogo noketoe buge en nikech noneno ni ngimane chalo ka nono kata obedo ni en gi gik mang’eny. Noparo ni samoro Muma ne nyalo konye bedo gi ngima maber. Jolendogo nochako puonjore kode ka gitiyo gi bug Muma Puonjo kaachiel gi brosua mar Lasting Peace and Happiness—How to Find Them. Kar nono kode sula mar 2 e bug Muma Puonjo, ne ginono kode brosuano e kare mawacho ni, “A Guidebook for the Blessing of All Mankind.” Bang’ nono paragraf auchiel mokwongo e kareno, dhakono nowuoro ahinya ni kare Muma en buk makende maok dipim gi buge mamoko mag din. Bang’ nono moko kuom weche ma Muma nokoro chon ma osetimore, nowacho kama: “Ok apar ni nitie buk moro amora machielo moting’o weche moriere kaka Muma!”
◼ Japan: Wuon ot moro nonyiso owadwa moro ni en ok oyie kuom Nyasaye. Owadwano to nodhi mana nyime lime kinde ka kinde mondo giwuo machuok ka gitiyo gi gaset mar Amkeni! e sula mag “Je, Ni Kazi ya Ubuni?” Mosmos, jalno noloko pache mi ochako wacho ni nyaka bed ni nitie Jachwech. Sani koro oyie ni Nyasaye nitie kendo gidhi nyime gi puonjruok ka gitiyo gi brosua mar Wach Maber Mowuok Kuom Nyasaye!
◼ Kanada: Chieng’ moro ka miyo moro ne wuok e ode kochomo mtoke, nyaminwa moro nomiye gasede manyien. Kane nyaminwano odok lime, nokwere ni ok odwar winjo weche nyaminwano kendo ni ok oyie kuom Nyasaye. Nyaminwano chunye ne ok ojok, kendo bang’e nochano mar terone brosua mar Jinsi ya Kupata Maisha Yenye Kuridhisha. Kane nyaminwa odok limo miyono, nonyise ni osebedo kopare ahinya nikech en janyuol achiel, kata obedo ni ok oyie kuom Nyasaye. Nonyiso miyono paragraf mar 6 e ite mar 4 e brosuano. Paragrafno nigi penjo moko ma chiewo paro kuom kuma puonj mabeyo mag dak nyalo yudoree. Nojiwo miyono mondo onon paro mochiw e brosuano e sula mar 2 mawuoyo kuom pidho nyithindo. Miyono noil, mi okawo brosuano.