Weche Mwanyalo Chako Wuoyogo gi Ji

Chako Puonjruok mar Muma gi Ji Ngeso Mokwongo e Dwe mar Mach

“Walimi machuok mondo wanyisie gimoro ma biro timore tarik 14 dwe mar April. Tarigno ema wabiro paroe tho mar Yesu. Jomoko paro tho mar Yesu nikech gineno ni thone en gima duong’ ahinya e ngimagi. Jomoko to ok ong’eyo kabe tho mar Yesu nyalo konyogi. Be iparo ni tho mar Yesu konyowa e yo moro amora?” Rit dwoko. Nyise tok Ohinga mar Jarito ma Mach 1, kae to unon kode weche manie bwo penjo mokwongo kaachiel gi moko kuom ndiko moket kanyo. Chiw gasede kendo itim chenro mar dok nono penjo maluwo.

Ohinga mar Jarito Mach 1

“Ji mang’eny osebedo ka wuoro gimomiyo Nyasaye pok okawo okang’ mar tieko timbe maok kare kod chandruoge mayudowa e pinyni. Ineno nade, dibed ni Nyasaye ok dew dhano, koso oneno ni ber abera ka dhano chandore? [Rit dwoko, kae to isom Johana 3:16.] Ji mang’eny tiyoga gi ndikoni e nyiso ni Nyasaye dewo dhano, kata kamano ok ging’eyo kaka tho mar wuod Nyasaye nyalo kelonegi ber. Gasedni lero kaka kokalo kuom tho mar Yesu, timbe maok kare kod chandruoge duto mayudowa e pinyni biro rumo.”

Amkeni! Mach

“Walimi mondo wawuo machuok kuom ndiko moro e Muma ma osechando ji mathoth. [Som Chakruok 1:1.] Nitie jomoko ma oyie gi gima ndikoni wacho, to jomoko to ok oyie gi wachno. In to ineno wachni nade? [Rit dwoko.] Ji mang’eny ok oyie ni gik moko ne ochue nikech jotend dinde ema puonjogi gik maonge e Muma. Gasedni lero maber kendo malong’o gima Muma puonjo kuom chakruok mar gik moko duto.”