Agost Nobed Dwe mar Lendo ma Pok None!
Wabiro Pogo Trakt Manyien e Piny Mangima
1. Sama wachomo higni 100 nyaka ne Pinyruoth chak locho, en kampen mane makende ma wabiro timo e piny ngima?
1 Sani wachomo higni 100 nyaka ne Pinyruodh Nyasaye chak locho. Donge en gima owinjore mondo wami Jehova duong’ kuom timo kampen makende! E dwe mar Agost higani, wabiro timo kampen e piny ngima mar pogo trakt manyien ma wiye wacho ni, Ere Kama Wanyalo Yudoe Dwoko mag Penjo ma Chandowa e Ngima? Traktni jiwo josombwa mondo gimany dwoko ma Muma chiwo e wi penjo ma gin-go, kendo olero kaka Websaitwa mar jw.org nyalo konyogi.
2. Ere kaka wanyalo pako Jehova gi “dwol mang’ongo” e dwe mar Agost kanyachiel gi jowetewa?
2 Pak Jehova gi Dwol Mang’ongo: Mondo walend e okang’ momedore e dwe mar Agost, ibiro yienwa bedo jopainia makonyo kuom seche 30 ka wadwaro. To nikech dwe mar Agost nigi Tich Abije abich, Ngeso abich, kod Jumapinde abich, jolendo mang’eny ma tiyoga e kor juma to kod rowere ma biro loro skul e dweno biro yudo thuolo mar bedo jopainia makonyo. Ka in gi japuonjre kata nyathi ma timo dongruok ma diher bedo jalendo, wuo gi jachan buch jodongo mapiyo kaka nyalore. Nyalo bedo maber ndi ka gin be gilendo kodwa e dwe makendeno! Kata obedo ni jopainia mapile ohero yueyoga e dwe mar Agost bang’ tieko seche madwarorenegi e higa, pod ginyalo loko chenrogi mondo gin bende giriw kampenni lwedo. Sani ema joot onego ochakie chano kaka gibiro ‘pako Jehova gi dwol mang’ongo’ ka giriwore gi jomamoko ma bende biro timo kamano e dwe mar Agost.—Ezra 3:11; Nge. 15:22.
3. Wageno ni kampen makendeni biro konyowa chopo ang’o?
3 Kata obedo ni wasetimoga kampende mang’eny e higni mosekalo, wageno ni kampen ma wabiro timoni nobed mapok none nyaka nene. Be wanyalo temo matek e dweno mondo wabed gi namba mamalo manyien e kwan mar seche, jolendo, kod jopainia makonyo? Nyalo bedo maber nikech dweno bende e ma waloroe higa 2014 mar tijwa! Wageno ni Jehova biro guedho kinda ma jotichne biro timo e piny ngima e dwe mar Agost, mondo dweno obed dwe mar lendo e okang’ ma pok ne olendie nyaka nene!—Math. 24:14.