Sula Manyien ma Konyowa Chako Wuoyo gi Ji

Chakre Januar 2016, sula ma wiye wacho ni “Ang’o ma Muma Wacho?” osebedo ka yudore e tok Ohinga mar Jarito, gocho mar ji duto. Sula manyienni olos mondo okonywa e chako wuoyo gi ji e wi Muma. Olose mana kaka olos trakt magwa manyien. Nitie penjo ma wanyalo penjo jal ma wawuoyogo, Ndiko ma chiwo dwoko mar penjono, kod weche mamoko ma wanyalo wuoye.

Goyo mbaka gi ji e yo mamit kamano e wi Ndiko, miyo chako puonjruok mar Muma kodgi bedo mayot. Inyalo tiyo gi sula manyienni mondo ikony ji mathoth ma nigi riyo mar ng’eyo Nyasaye.—Mat 5:6.

KAKA WANYALO TIYO GI SULANO:

1. Penj ng’at ma iwuoyogono paro ma en-go e wi achiel kuom penjo ma yudore e sulano

2. Chik iti maber sama ochiwo pache kendo ipwoye

3. Som ndiko ma yudore e bwo wich ma wacho ni, “Gima Muma Wacho,” kae to ipenje paro ma en-go e wi ndikono. Kapo ni omiyi thuolo mar dhi nyime wuoyo kode, inyalo tiyo gi weche manie bwo wich ma wacho ni, “Weche Mamoko ma Muma Puonjowa Gin Mage?”

4. Chiw gaset

5. Tim chenro mar dok lime mondo owuo e wi penjo machielo manie sulano