Kaka Wanyalo Tiyo gi Weche Mwanyalo Chako Wuoyogo gi Ji

Chakre Januar 2018, osebed ka iketo weche mwanyalo chako wuoyogo gi ji e nyim Ngimawa kod Tijwa Kaka Jokristo​—Chenro mar Chokruok. Ere kaka wanyalo tiyo kodgi?

Sama Watimo Migepe mag Jopouonjre: Onego iti gi penjo, ndiko, kod penjo mar limbe maluwo kaka oket e weche mwanyalo chako wuoyogo gi ji. Kata kamano, mano ok nyis ni koro onego ikop weche motigo e vidio mar weche mwanyalo chako wuoyogo gi ji. Inyalo tiyo gi chal mopogore, weche mopogore ma ichakogo, kendo yo ma ilerogo ndiko bende ok ochuno ni nyaka chalre gi kaka oket e vidio. Bende inyalo chiwo achiel kuom Gik Mwatiyogo e Puonjo Ji Muma kata ka ok onyisi ni itim kamano.

Sama Wan e Tij Lendo: Weche mwanyalo chako wuoyogo gi ji olos mondo omiwa paro ma nyalo konyowa e tij lendo. Ka ng’ato orwako wach kendo doher ng’eyo mathoth, inyalo dhi nyime wuoyo kode kendo inyalo kata tiyo gi weche mag dok limbe. Inyalo loko matin weche mwanyalo chako wuoyogo gi ji kata inyalo wuoyo e wi wach moro mopogore. Dibed ni wach ma ne watiyogo dwe mokalo kata ndiko moro machielo mulo chuny ji e alworau? Dibed ni joma odak e alworau wuoyo e wi gima osebedo ka timore e alworau kata ma samoro nyocha oland e TV kata e redio? Bed ni ibiro yiero tiyo gi weche mwanyalo chako wuoyogo gi ji e yo mane, gima duong’ en ni onego ‘itim gik moko duto nikech wach maber mondo iyale ne jomoko.’​—1Ko 9:22, 23.