ANG’O MINYALO TIMO MONDO KIK IBED GI SIGU GI NG’ATO ANG’ATA?

1 | Kik Ibuon Ji

Puonj ma Muma Chiwo:

“Nyasaye ok buon ng’ato ang’ata, to e oganda moro amora, ng’at moluore kendo ma timo gik makare, oyiego.”—TICH JOOTE 10:34, 35.

Tiend Puonjno:

Jehovaa Nyasaye ok timnwaga gik moko ka luwore gi piny ma waae, rangi mar pien dendwa, kata oganda ma ne waponie. Kar mano, odichga moloyo gi kaka chunywa chalo. Kuom adier, “dhano neno mana gik ma oko, to Jehova neno nyaka chuny ng’ato.”—1 Samuel 16:7.

Gik Minyalo Timo:

Kata obedo ni ok wanyal ng’eyo gima ni e chuny jomamoko, pod wanyalo luwo ranyisi mar Nyasaye kuom temo matek mondo kik wabuon ji. Tem mondo ine ji kaka ng’ato achiel-achiel moloyo nenogi mana kaka jo oganda moro kata jopiny moro. Ka ifwenyo ni in gi paro ma ok owinjore e wi jomamoko nikech oganda ma giae kata kaka pien dendgi chalo, lam Nyasaye kikwaye mondo okonyi golo paro marichogo e chunyi. (Zaburi 139:23, 24) Kikwayo Jehova mondo okonyi kik ibuon ji, inyalo bedo gadier ni obiro winjo lamoni kendo obiro konyi.—1 Petro 3:12.

a Jehova e nying Nyasaye.—Zaburi 83:18.

“Ne pok abetga kamoro achiel gi msungu moro amora . . . Nafwenyo ni koro an e riwruok mar owete mokwako piny ngima.”—TITUS

Gima Notimore e Ngima Ng’ato—TITUS

Nogolo Sigu e Chunye

Titus nodongo ka en ja mirima ahinya nikech ne ok omor gi chike ma ne miyo ibuono jo rotenge. Mano nomiyo odonjo e grup moro mar jo mahundu ma ne nigi paro ma chal kode. Owacho kama: “Ne wajadhi kuonde moko e taon kama ne ok dwarie jo rotenge, kuom ranyisi otende kod kuonde ma ji ne methoe, kae to wakwinyo ji mana mondo dhawo otugre.” Titus wacho ni sigu ma ne ni e chunye e ma ne chwalega ahinya mondo otim gik ma kamago. Omedo kama: “Sa asaya ma ne agwandora gi ng’ato ang’ata, obed dhako kata dichwo, an e ma nakwongoga gocho.”

Titus nochako loko timbege ka nochako puonjore Muma gi Joneno mag Jehova. Somo Muma noloko ngimane. Singo ma nomulo chunye ahinya en singo ma wacho ni “tho ok nobedie kendo, kata kuyo, kata ywak, kata rem ok nobedie kendo.”—Fweny 21:3, 4.

Mokwongo okwongo, ne ok yot ne Titus golo sigu e chunye. Owacho ni: “Ne tekna ahinya loko pacha kod timbena.” Kata kamano, gima nokonyo Titus en wach ma nopuonjore e Tich Joote 10:34, 35 ma wacho ni Nyasaye ok buon ng’ato ang’ata.

Ang’o ma notimore bang’e? Titus wacho kama: “Ka naneno kaka Joneno mag Jehova oherore ma ok gidewo kaka pien dend jowetegi chalo, nabedo gadier ni gin e din madier. Kata ka pok nobatisa, Janeno moro ma msungu norwaka chiemo e ode. Ne chal mana ka gima naleko. Ne pok abetga kamoro achiel gi msungu moro amora, to moloyo, ne pok aparoga kata ni nanyalo chiemo kodgi. Nafwenyo ni koro an e riwruok mar owete mokwako piny ngima.”