Kaka Wanyalo Ng’ado ne Jomamoko Rieko

1. Ang’o momiyo dwarore ni wang’ad ne jomamoko rieko? Ler ane.

INENOGA nade wach ng’ado ne jomamoko rieko? Jomoko yudoga ka yotnegi timo kamano. Jomoko to dikorega ng’ado ne jomamoko rieko kendo gibedoga maluor ahinya sama ochuno ni gitim kamano. Gima onego wang’e waduto, en ni nitie kinde ma biro dwarore ni wang’ad ne jomamoko rieko. Nikech ang’o? En nikech Yesu nowacho ni hera e ma ne dhi miyo ji ong’e jolupne madier. (Joh. 13:35) Yo achiel ma wanyalo nyisogo ni wahero owetewa gi nyiminewa en kuom ng’adonegi rieko. Wach Nyasaye wacho ni osiep maber en ng’at “ma rieyi koa e chunye.”—Nge. 27:9.

2. Ang’o ma jodong-kanyakla onego otim, to nikech ang’o? (Ne sanduk ma wacho ni “Paro Michiwo ne Japuonjre e Chokruok mar Ngimawa kod Tijwa.”)

² Dwarore ni jodong-kanyakla ong’e kaka ginyalo ng’ado ne jomamoko rieko. Jehova gi Yesu oseketo jodongo mondo girit kanyakla. (1 Pet. 5:​2, 3) Yo achiel ma gitimogo kamano en kokalo kuom twege ma gigolo e kanyakla ka gitiyo gi Ndiko. Bende, nitie sama girieyoga Jokristo wetegi moriwo nyaka mosebayo yo moweyo kueth. Ang’o ma nyalo konyo jodong-kanyakla ng’ado ne jomamoko rieko kata paro mabeyo? To ere kaka waduto wanyalo timo kamano?

3. (a) Ang’o ma nyalo konyowa mondo wabed jong’ad rieko mabeyo? (Isaya 9:6; ne bende sanduk ma wacho ni “Luw Ranyisi mar Yesu Sama Ing’ado ne Jomamoko Rieko.”) (b) Ang’o ma wabiro nono e sulani?

³ Wanyalo puonjore ng’ado ne jomamoko rieko ka wanono ranyisi mag joma iwuoyo kuomgi e Muma kaka Yesu. Achiel kuom nyinge ma omi Yesu en “Jang’ad Rieko Molony.” (Som Isaya 9:6.) E sulani, wabiro nono gima wanyalo timo sama jomoko okwayowa ni wang’adnegi rieko, kata sama dwarore ni warie kata wang’ad ne jomamoko rieko to pok gikwayowa ni watim kamano. Bende, wabiro nono gimomiyo onego wawuo e yo mowinjore kendo e sa mowinjore.

SAMA JOMAMOKO OKWAYO NI WANG’ADNEGI RIEKO

4-5. En penjo mane monego wakwong penjore ka ng’ato okwayowa ni wang’adne rieko? Chiw ane ranyisi.

⁴ Ang’o monego watim sama ng’ato okwayowa ni wang’adne rieko? Wanyalo gombo timo kamano mapiyo. Kata kamano, onego wakwong wapenjre niya, ‘Be an e ma awinjora ng’ado rieko e wi wachni?’ Seche moko gima ber ma wanyalo timo en ore ir ng’at mowinjore ng’adone rieko e wi wachno kar timo kamano wan wawegi.

⁵ Ne ane ranyisi ma luwoni. Wawach ni osiepni moro migeno obedo matuo ahinya. Onyisi ni osetimo nonro e wi tuono moyudo yore thieth moko, kae to okwayi mondo ing’adne rieko e wi yor thieth maber e kind moyudogo. Samoro inyalo miye paro moko, kata kamano, nyalo bedo ni ionge gi lony e weche thieth kata tuo ma chandeno. Ka en kamano, to yo maber minyalo konyogo osiepnino en manyone ng’at machielo molony gi tuo ma chandeno.

6. Ang’o monego watim ka pok wang’ado ne jomamoko rieko?

⁶ Kata ka po ni waneno ni wawinjore chiwo paro e wi wach moro, samoro nyalo dwarore ni warit kuom kinde ka pok wang’ado ne jomamoko rieko. Nikech ang’o? Ngeche 15:28 wacho ni “ng’at makare paro matut ka pok odwoko wach.” To nade ka waparo ni wang’eyo dwoko mar penjo moro? Pod nyalo dwarore ni watim nonro, walem, kendo wapar matut kuom wachno. Kae to wanyalo bedo gadier ni dwokowano owinjore gi paro ma Jehova nigo e wi wachno. Ne ane ranyisi mar janabi Nathan.

7. Gima notimore ne janabi Nathan puonji ang’o?

⁷ Ruoth Daudi nonyiso janabi Nathan ni nodwaro gero ne Jehova hekalu. Gikanyono, Nathan nonyise ni nonyalo timo kamano. Kata kamano, ne dwarore ni Nathan okwong openj Jehova wachno ka pok ochiwo dwoko. Nikech ang’o? En nikech Jehova ne ok dwar ni Daudi ogerne hekalu. (1 We. 17:​1-4) Mana kaka waneno e ranyisino, ka ng’ato okwayowa ni wang’adne rieko kata paro, ok ber ka ‘warikni e wuoyo.’—Jak. 1:19.

8. Gimachielo momiyo onego watang’ ka pok wang’ado ne ng’ato rieko en ang’o?

⁸ Ne ane gimachielo momiyo onego wapar ahinya sama ng’ato okwayowa ni wang’dne rieko. Ka wang’adone rieko ma ok owinjore ma gimoro marach otimrene, inyalo wach ni wan bende wamiyo gino oyude. Kuom adier, ber paro ahinya ka pok wang’ado ne ng’ato rieko.

NG’ADO NE JOMAMOKO RIEKO KA POK GIKWAYOWA NI WATIM KAMANO

9. Ang’o ma jodongo nyaka bedgo gadier ka pok girieyo ng’ato? (Jo-Galatia 6:1)

⁹ Kinde ka kinde, jodongo kawoga okang’ mokwongo mar rieyo owadwa kata nyaminwa moro ma “ochomo yo moro ma ok kare.” (Som Jo-Galatia 6:1.) Weche ma lero ndikono e Study Bible wacho ni “ng’at ma kamano ochomo yo marach, kata obedo ni samoro pok otimo richo moro maduong’.” Gima duong’ ma jodongo dwaro en konyo ng’atno mondo osik e yor ngima ma nyaka chieng’. (Jak. 5:​19, 20) Kata kamano, mondo rieko ma ging’ado okony ng’ato, nyaka gikwong gibed gadier ni ng’atno ochomo yo moro ma ok kare. Jehova omiyo ng’ato ka ng’ato kuomwa thuolo mar timo yierone owuon ka luwore gi chunye mar pogo ber gi rach. (Rumi 14:​1-4) To nade ka owadwa moro otimo gimoro marach kendo jodongo ong’ado ni dwarore ni orieye?

10-12. Ang’o ma jodongo onego otim sama girieyo ng’ato ma ok okwayogi ni gitim kamano? Ti gi ranyisi. (Ne pichni bende.)

¹⁰ Ok yotnega jodongo rieyo kata ng’ado ne ng’ato rieko ka ng’atno ok okwayo ni gitim kamano. Ang’o momiyo wawacho kamano? Jaote Paulo nowacho ni ng’ato nyalo chomo yo moro ma ok kare to pok ofwenyo mano. Omiyo, jodongo onego okwong oik chuny ng’atno ka pok girieye.

¹¹ Rieyo ng’ato ka ok okwayowa ni watim kamano inyalo pim gi pidho kodhi e puodho ma pok opur. Mano gima ok yotga. Kuom mano, ka pok japur opidho kodhi, opuroga puodho kendo mano miyo lowo bedo mayom, kae to opidho kodhi. Bang’ mano, oolonegi pi mondo gidongi. E yo ma chalo kamano, ka pok jaduong’-kanyakla orieyo ng’ato, nyaka okwong oik chunye. Kuom ranyisi, onyalo rito nyaka kinde mowinjore kae to onyiso owadwano ni nitie gima ogombo ni giwuoye. Ka po ni jaduong’no ong’ere kaka ng’at jahera kendo mang’won, biro bedo mayot mondo jomamoko orwak paro kod rieko mochiwonegi.

¹² Sama jaduong’no wuoyo gi owadwano, onyalo nyise ni waduto warem kendo kinde ka kinde dwarore ni oriewa mondo weche odhinwa maber. (Rumi 3:23) Dwarore ni oti gi dwol mayom kendo ochiw luor sama orieye kotiyo gi Ndiko ma nyiso gima ok owinjore mosetimo. Bang’ ka owadwano oseyie gi kethone, jaduong’no nyalo pidho kodhi e yor ranyisi kuom lerone e yo mayot okenge monego okaw mondo olos wachno. Gikone, jaduong’no nyalo olone pi e yor ranyisi kuom pwoye kowuok e chunye kendo lamo kode.—Jak. 5:15.

13. Ere kaka tiyo gi penjo nyalo konyo jodongo sama girieyo ng’ato?

¹³ Nitie seche ma ok yotnega ng’at mirieyo winjo tiend riech mimiye. Ang’o ma nyalo konyo jodongo geng’o gima kamano? Ginyalo lero tiend gima giwacho kuom tiyo gi penjo e yo mariek. (Ekl. 12:11) Dwoko ma owadwa mirieyo kata ming’adone riekono ochiwo nyalo konyogi ng’eyo ka be owinjo tiend gima giwachone.

NG’ADO RIEKO E SA MOWINJORE KENDO E YO MOWINJORE

14. Be onego wang’ad ne jomamoko rieko kata rieyogi sama iwa owang’? Ler ane.

¹⁴ Waduto warem kendo wanyalo wacho kata timo gimoro ma chwanyo jomamoko. (Kol. 3:13) Wach Nyasaye nyiso ni nitie kinde ma wabiro miyo jowetewa obed gi mirima. (Efe. 4:26) Kata kamano, onego watang’ mondo kik wang’ad ne jomamoko rieko kata rieyogi ka iwa owang’. Nikech ang’o? En nikech “mirimb dhano ok chop gima kare e wang’ Nyasaye.” (Jak. 1:20) Ka warieyo jomamoko sama iwa owang’, wanyalo medo ketho weche. Mano ok nyis ni ok onego wanyis ng’at mochwanyowa kaka wawinjo e chunywa kata paro ma wan-go e wach moro. Kata kamano, nyalo bedo maber ka warito nyaka mirimbwa okuwe e ka wawuo. Ne ane ranyisi ma Elihu noketo ka norieyo Ayub.

15. Ranyisi mar Elihu puonjowa ang’o? (Ne picha bende.)

¹⁵ Elihu nochiko ite kuom odiechienge mogwaro ka Ayub temo rieyo weche maricho ma osiepene nodonjonego. Elihu nokecho Ayub ahinya. Kata kamano, Elihu iye nowang’ nikech Ayub nowacho weche ma ok kare e wi Jehova kendo keto pache kuome owuon. To ema pod Elihu nohore korito kendo norieyo Ayub e yo mang’won. (Ayub 32:2; 33:​1-7) Ranyisi mar Elihu puonjowa wach moro maduong’ ahinya: Owinjore wachiw siem e kinde ma iwa ok owang’, ka wakuwe mos, kendo watim kamano gi luor kod hera.—Ekl. 3:​1, 7.

DHI NYIME NG’ADO NE JOMAMOKO RIEKO KENDO RWAKO PARO MA OMIYI

16. Zaburi 32:8 opuonji ang’o?

¹⁶ Ndiko ma tayo sulani wacho ni ‘Jehova ng’adonwa rieko ka wang’e nenowa.’ (Som Zaburi 32:8.) Mano nyiso ni Jehova biro dhi nyime konyowa. Oikore ng’adonwa rieko kendo konyowa ng’eyo kaka wanyalo tiyo gi rieko momiyowa. To mano doko ranyisi maber! Sama wan gi thuolo mar ng’ado ne jomamoko rieko, watem matek mondo waluw ranyisi mar Jehova kuom jiwogi kendo konyogi mondo gitim yiero mabeyo.

17. Jodong-kanyakla ma ng’ado ne jomamoko rieko ka gitiyo gi Ndiko inyalo pim gi ang’o? Ler ane. (Isaya 32:​1, 2)

¹⁷ Magi e kinde ma dwarore ni wang’adnee jomamoko rieko kendo rwako paro ma omiwa. (2 Tim. 3:1) Jodong-kanyakla ma ng’ado ne jomamoko rieko ka gitiyo gi Ndiko inyalo pim gi “aoche matindo e piny ma onge pi.” (Som Isaya 32:​1, 2.) Wamor bedo gi osiepe ma nyisowa gik ma dwarore ni watim kar nyisowa mana gik ma morowa. Osiepe kaka mago inyalo pim gi “olembe mag dhahabu moket e bakul mar fedha.” (Nge. 25:11) Wadhiuru nyime puonjore mondo wang’e kaka wanyalo ng’ado ne jomamoko rieko kendo ikore rwako paro mabeyo ma imiyowa.