Ang’o Momiyo Siasa Pogoga Ji Ahinya?—Ang’o ma Muma Wacho?

Weche mag siasa osepogo ji mang’eny e piny ngima. Nonro moro ma Pew Research Center notimo e higa mar 2022, nonyiso ni “e pinje 19, pasent 65 mar ji, noyie ni e pinjegi ji osepogore ahinya nikech giriwo lwedo chama mopogore opogore mag siasa.”

Be isefwenyo ni weche mag siasa medo pogo ji ahinya e alwora midakie? Ang’o momiyo mano timore? Be nitie gima nyalo tieko wachno? Ne ane gima Muma wacho.

Kido moko ma keloga pogruok

Muma nokoro ni e “ndalo mag giko,” ma gin kinde ma wadakiegi, ji mang’eny ne dhi bedo gi kido maricho ma ne dhi kelo pogruok e kindgi gi jowetegi.

• “Kinde matek ahinya nobedie e ndalo mag giko. Nimar ji nobed jo moherore giwegi, . . . jo ma ok oikore loso winjruok moro amora.”​—2 Timotheo 3:1-3.

Kata obedo ni thoth ji timoga kinda ahinya mondo sirkande mag dhano oti maber, kindagi en kayiem nono. Ok yotga ne joma nigi paro mopogore tiyo kanyachiel, kata sama gitemo tieko chandruok moro. Gik mosebedo ka timore, nyiso mana adiera mar gima Muma nowacho chon.

• “Loch dhano, . . . en loch ma kelo mana hinyruok.”​—Eklesiastes 8:9.

Kata kamano, Muma nyisowa gima nyalo tieko pogruok mosebedo e kind dhano, ma en sirkal mitayo gi jaloch ma nigi teko mar tieko chandruoge duto mag dhano.

Jaloch mowinjore kendo ma dewo dhano

Muma fwenyonwa jaloch ma nyalo tieko ne dhano chandruogegi duto. Mano en Yesu Kristo. Yesu nigi nyalo, teko, kod gombo mar miyo dhano duto obed gi winjruok kod kuwe e kindgi.

• “E ndalone, jo makare biro dhi maber, kendo kuwe biro bedo mogundho.”​—Zaburi 72:7.

• “Ogendni duto biro tiyone.”​—Zaburi 72:11.

Yesu en jaloch mowinjore nikech odewo dhano kendo ogombo konyogi, to moloyo, ogombo konyo joma osetimnegi gik ma ok kare.

• “Obiro reso jachan ma ywakne, bende, obiro reso ng’at ma sandore ma onge ng’at ma dikonye. Obiro kecho jo ma sandore kaachiel gi jochan, kendo obiro reso ngima jo modhier. Obiro golonegi gik ma diyogi kaachiel gi timbe mahundu.”​—Zaburi 72:12-14.

Puonjri weche momedore e wi Pinyruodh Nyasaye, ma en sirkal manie polo ma Yesu e jalochne. Ne ber monyalo keloni kod kaka inyalo riwe lwedo.

• Ne vidio ma wiye wacho ni, Pinyruodh Nyasaye En Ang’o?

• Som sula ma wiye wacho ni, “Pinyruodh Nyasaye En Sirkal ma Onge Mibadhi.”