En Ng’ano ma Biro Reso Raia?—Ang’o ma Muma Wacho?

Ka luwore gi ripod Riwruok mar Pinje (U.N.):

• Chakre Oktoba 7 nyaka Oktoba 23, 2023, ji mokalo 6,400 nosetho nikech lweny ma dhi nyime e kind Gaza gi Israel, kendo ji ma dirom 15,200 nosehinyore nikech lwenyno. Thoth jogo gin raia. E wi mano, ji alufe mang’eny oseringo moweyo utegi.

• Chop Septemba 24, 2023, lweny e kind Russia gi Ukraine nosemiyo raia ma romo 9,701 olalo ngimagi, kendo ji ma romo 17,748 noseyudo hinyruok e piny Ukraine.

En geno mane ma Muma chiwo ne joma chandore nikech lwenje?

Gima miyowa geno

Muma wacho ni Nyasaye biro ‘tieko lwenje e piny duto.’ (Zaburi 46:9) Obiro tiyo gi sirkal manie polo, kata pinyruoth, mondo ogol sirkende duto mag dhano. (Daniel 2:44) Pinyruodh Nyasaye biro kelo ne dhano resruok madier.

Ne ane gima Yesu Kristo ma en Ruodh Pinyruodh Nyasaye biro timo:

• “Obiro reso jachan ma ywakne, bende, obiro reso ng’at ma sandore ma onge ng’at ma dikonye. Obiro kecho jo ma sandore kaachiel gi jochan, kendo obiro reso ngima jo modhier. Obiro golonegi gik ma diyogi kaachiel gi timbe mahundu.”​—Zaburi 72:12-14.

Kokalo kuom Pinyruodhe, Nyasaye biro golo chandruoge kod lit ma lwenje kod mahundu osekelo ne dhano.

• “Obiro yweyo pi wengegi duto, mi tho ok nobedie kendo, kata kuyo, kata ywak, kata rem ok nobedie kendo. Gik machon osekadho.”​—Fweny 21:4.

Machiegnini, Pinyruodh Nyasaye biro kelo lokruoge madongo e ngima dhano. Muma nokoro ni e kindewagi, “lwenje kod humb lwenje” ne dhi bedoe. (Mathayo 24:6) Gik ma kamago kaachiel gi gik mamoko nyiso ni wadak e “ndalo mag giko” mar loch dhano.​—2 Timotheo 3:1.