Weche ma Gin Adier

ANG’O manyalo miyo Jakristo owach gimoro maok adier? Nyalo bedo ni onwoyo anwoya wach moro ma nowinjo maok okawo kinde mar nono kabe wachno en adier. Kata onyalo jimbo gimoro ka ok ong’eyo, nikech ne ok osomo maber kama ne ogoloe wechego. Ka wawacho adier kata mana e weche matindo, jowinjo nyalo neno ni ginyalo bedo gadier kuom weche mapek mwawachonegi.

E Tij Lendo. Nikech jomoko paro ni pok ging’eyo gik mang’eny, giluor chako dhi e tij lendo. Kata kamano, gifwenyo mapiyo ni ginyalo lendo maber kata mana ka gisepuonjore adiera matin kende. Mano nyalo timore nade? Gimaduong’ en timo ikruok.

Kapok iwuok dhi lendo, lony gi wich midwaro wuoyoe. Tem paro penjo ma jowinjo nyalo bedogo kuom wachno. Many dwoko ma Muma chiwo. Mano biro konyi chiwo dwoko makare ka pachi okuwe. Dibed ni idhi tayo puonjruok mar Muma? Kal kendo adimba e weche mudhi puonjoru. Ne ni iwinjo tiend puonj Muma machiwo dwoko ne penjo mogo.

To nade kapo ni wuon ot kata jal mutiyogo openji penjo ma ne ok iikorine? Kapo ni ok ing’eyo adier e wi wachno, kik item chuogo dwoko. “Ng’ato makare oparo e chunye kaka doduok wach.” (Nge. 15:28) Inyalo yudo dwoko manyalo konyi e bug Kutoa Sababu kwa Kutumia Maandiko kata e buk matin miluongo ni “Thuond Weche Manie Muma Minyalo Wuoyoe.” Kapo ni ok iting’ogi, kwa thuolo mar dhi timo nonro kae to idogi. Ka jal ma ne openji penjono chunye ler, ok obi dewo rito dwoko makare. Kuom adier, bolruoknino nyalo more.

Lendo gi jolendo molony nyalo konyi bedo mong’ith e tiyo maber gi Wach Nyasaye. Ne ndiko ma jolendogo tiyogo koda kaka gilerogi. Bolri irwak paro moro amora ma gichiwoni kata puonj ma girieyigo. Apollo, jaote ma ne en jakinda nonwang’o ber kuom rwako kony ma jomoko nomiye. Luka nonyiso ni Apollo ne en “jalos wach malong’o,” “ng’at molony kuom weche manie Ndiko,” kendo ma “nopong’ gi chuny ma jakinda,” jal ma ne ‘wacho, kendo puonjo kare, weche ma kuom Yesu.’ Kata kamano, ng’eyo mare pod norem. Kane Akula gi Priskilla oneno mano, ‘ne gikawe, kendo yor Nyasaye ne gipuonje kare moloyo.’—Tich 18:24-28.

“Mako Matek Wachno Maradier.” Weche mwachiwo e chokruogewa onego onyis ni wakawo mapek migawo mar kanyakla mar bedo “siro kod mise mar adiera.” (1 Tim. 3:15) Mondo wamakre gi adiera, dwarore ni wawinj tiend Ndiko mwachano tiyogo e twege. Ng’e weche molworo ndikogo koda gima ndikogo dwaro chopo.

Ng’ato nyalo nwoyo wach miwacho e chokruog-kanyakla, ka en kamachielo. En adier ni “waduto wachwanyore pile.” (Jak. 3:2) Kata kamano, nyago kido mar wacho weche madier biro konyi. Bang’ kinde, owete mogwaro manie Skul mar Tij Nyasaye biro bedo jodong-kanyakla. Joma omi ting’ ma kamano ‘ikwayo mang’eny moloyo.’ (Luka 12:48) Kapo ni jaduong’ ochiwo paro moro mahinyo kanyakla nikech ok oparo malong’o, mano nyalo miyo Nyasaye osin kode. (Math. 12:36, 37) Omiyo, owadwa mabedo jaduong’ nyaka ng’ere kaka ‘ng’at ma mako matek wachno maradier mana kaka nopuonjore.’—Tito 1:9.

Ne ni weche milero luwore gi “puonj mangima” mawinjore gi adiera duto mag Ndiko. (2 Tim. 1:13) Mani ok onego omi iluor. Samoro pok itieko somo Muma mangima. Dhi nyime some. To gie sani, ne ane kaka paro maluwogi nyalo konyi nono weche michano puonjo.

Mokwongo, penjri ane kama: ‘Be wechegi winjore gi gik ma asepuonjora e Muma? Be gibiro ywayo jowinjo ir Jehova, koso giting’o malo rieko mar piny ka gijiwo ji oti gi riekogo?’ Yesu nowacho niya: “Wachni en adiera.” (Joh. 17:17; Rapar 13:1-5; 1 Kor. 1:19-21) Kae to, ti maber gi gik mitimogo nonro ma jatichno mogen kendo mariek osechiwonwa. Magi ok bi konyi mana e winjo tiend ndiko, to bende gibiro konyi tiyo gi ndiko e yo mowinjore maok ikalo tong’. Ka iketo twagi ‘omakre gi wachno maradier’ kendo igeno yo ma Jehova tiyogo e lero kendo nyiso kaka ndiko tiyo, ibiro wacho weche ma gin adier.

Nono Kabe Weche Gin Madier. Gik matimore sani, weche mogol kamoro, koda weche mosene nyalo konyi sama ilero kata inyiso kaka wach moro tiyo. Ere kaka inyalo ng’eyo ka gin adier? Yo achiel en golo wechego kuonde mogen. Ne ni ing’iyo ka wechego gin masani. Kwan nigi kindegi; weche mag jo-sayans bende lokore; kendo kaka dhano medo puonjore kuom histori kod dhok machon, nyalo dwaro ni giwil paro moro mosebedoe. Tang’ ahinya ka weche midwaro tiyogo gin mowuok e gaset maoko, televison, redio, e-mail, kata Intanet. Ngeche 14:15 chiwo siem kama: “Ng’a ma riekone tin oyie ayiea weche duto; to ng’a ma jaterre mos oparo maber yo ma dowuothie.” Penjri ane niya: ‘Be kama agoloe wachni ong’ere kaka kama igeno? Be nitie yo machielo minyalo sirgo wechego?’ Kapo ni in gi kiawa kuom wach moro, kik iti kode.

E wi nono kabe kama igoloe wechego en kama igeno, non malong’o kaka ibiro tiyo gi wechego. Ne ni weche sie mikawo kamoro kod kwan monon mitiyogo, winjore gi weche molworogi. Sama itemo mondo wecheni owuog motegno, tang’ kik ijimb weche, kuom ranyisi: “jomoko” kik bed “ng’enygi;” “ji mang’eny” kik bed “ji duto;” kendo “seche moko” kik bed “kinde duto.” Jimbo gik motudore gi kwan, okang’ ma gimoro otimoree, kata lich mar gimoro miyo ji bedo gi kiawa kabe gigo gin adier.

Ka iwacho adier kinde duto, ji biro kawi ni in ng’at mohero adier. Mano miyo ji neno Joneno mag Jehova duto e yo maber. To moloyo, mano miyo Jehova “Nyasaye wuon adier” luor.—Zab. 31:5.