Kony Jopuonjre Muma Obed Jolendo mag Wach Maber mar Pinyruoth
1 Tich ma ne Yesu omiyo jopuonjrene kaka onyis e Mathayo 28:19, 20 ne dhi timore kama duong’ ahinya. Jopuonjre Kristo ne ochiki mondo omed timo jopuonjre ma bende bang’e ne dhi tiyo tij timo jopuonjre. E kinde makende mag giko ma sani wadakie, ne idhi ket mise mar lando wach maber mogik mar Pinyruodh Nyasaye e piny mangima.—Math. 24:14.
2 Jopuonjrewa mag Muma nyalo bedo nyithindwa kata jomoko madwaro puonjre kodwa Muma. Kuom adier wadwaro konyo joma kamago mondo okaw ting’gi ng’ato ka ng’ato e konyo jomoko bedo jopuonjre mag Yesu Kristo.—Luka 6:40.
3 Ik Jopuonjre Mondo Ochiw Neno: Jiw joma ipuonjrigo Muma mondo onyis jomoko gik ma gipuonjore. Nyis jopuonjreni gik majipo ma iseneno e tij lendo. Tieg nyithindi ka podi gitindo e timo tij lendo e yo maber kaluwore gi nyalo margi. (Zab. 148:12, 13) Nyis e wecheni kod ranyisi mari ni tij lendo en gima duong’ ahinya e ngimani.—1 Timo. 1:12.
4 Jehova tiyo mana gi jogo ma yie chikene makare kendo luwogi. Kuom adier, jolendo manyien ok ni gi ng’eyo malach kaka jolendo mag Pinyruoth molony, mochiwore, kendo mobatis, to kata kamano jopuonjre manyien nyaka yie kendo bed gi nyalo mar lero puonj mag Muma michakogo. (Ne Tengenezo, ite mag 79-82.) Nikech gise a e “Babulon Maduong’” kendo ok gidonj e weche duto mag siasa, onego obed ni gidhi pile e chokruoge mag kanyakla.— Fwe. 18:2, 4; Joha. 17:16; Hibr. 10:24, 25.
5 Ka iseneno ni achiel kuom joma ipuonjori godo Muma owinjore bedo jalendo ma pok obatisi, onego inyis jarit matayo kanyakla. Obiro chano mondo jodong-kanyakla ariyo orom kodi gi japuonjreni mar Muma mondo gine ka owinjore bedo jalendo ma podi ok obatisi mar wach maber mar Pinyruoth kaachiel gi kanyakla. Mano biro miyi thuolo mar tiego japuonjreni mar Muma e yo malach sama odhi kodi e tij lendo.