Ang’o ma Jomoko Puonjore Kuom Ranyisi Miketo?
1. Ang’o ma jopuonjre Yesu nopuonjore kuom ranyisi ma noketo?
1 Yesu nowacho ni: “Rwakuru lota kuomu, kendo puonjreuru kuoma.” (Math. 11:29) Yesu nopuonjo jomoko kuom ranyisi maber ma noketo, to ok kuom wechene kende. Par ane gima jopuonjrene nopuonjore kuom ranyisi ma noketo. Ne omuol, ne ong’won, kendo ne ojahera. (Math. 8:1-3; Mari. 6:30-34) Ne en ng’at mabolore gadier. (Joh. 13:2-5) Seche ma ne gidhi kode e tij lendo, jopuonjre noneno ni ne en ng’at matiyo matek kendo molony e puonjo jomoko adiera. (Luka 8:1; 21:37, 38) Ang’o ma jomoko puonjre kuom ranyisi ma gineno kuomwa seche mwalendo?
2. Ere kaka rwakruok kod timbewa mabeyo e tij lendo nyalo ywayo weg udi?
2 Weg Udi: Rwakruok e yo mowinjore, timbewa mabeyo, kod nyiso ni wadewo jomoko gadier gin gik manyalo miyo weg udi owinjwa. (2 Kor. 6:3; Fili. 1:27) Gineno ni watiyo gi Muma ahinya seche mwapuonjo. Jomoko mor ni wachikonegi itwa e yo manyiso luor seche ma giwuoyo. Ok onego wapar ni ranyisi maber mwaketo kuom wechegi ok nyal ywayo ji mondo owinj wach Pinyruoth.
3. Ere kaka ranyisi maber mwaketo nyalo jiwo owetewa?
3 Owetewa: Par bende kaka ranyisi mwaketo nyalo jiwo owetewa. Kinda mwatimo e lendo nyalo jiwo owetewa bende e tijni. Mana kaka nyinyo piago nyinyo, wechewa mwaiko maber ne tij lendo jiwo jomoko bende mondo omed lonygi e lendo. (Nge. 27:17) Kinda mwaketo e ndiko nying joma orwako wach kendo dok limogi mapiyo, jiwo owetewa bende mondo otim kamano. Wabiro jiwo owetewa gi nyiminewa e yo maber kuom chopo chuth tijwa mar lendo.—2 Tim. 4:5.
4. Ang’o momiyo onego wanonre wawegi kinde ka kinde?
4 Kinde ka kinde inyalo nono gik mitimo kod miwacho mondo ine kaka ranyisi miketo nyalo mulo jomoko. Ranyisi maber mwaketo biro moro Jehova, kendo biro miyo wawach kaka jaote Paulo nowacho ni: “Beduru jo ma luwo timna, kaka an bende aluwo tim Kristo.”—1 Kor. 11:1.