Nyiso Chuny Madwarore

KAKA ng’ato winjo e chunye en gima duong’ e ngima dhano. Sama ng’ato nyiso kaka owinjo e chunye, gima nie chunye fwenyore, kite ma iye kaachiel gi kaka oneno ji koda gik moko nenore ayanga. Nikech gik malit ma jomoko osekaloe e ngimagi—kata nikech kit oganda ma giwuokie—ji mang’eny pando gima nie chunygi. Kata kamano, Jehova jiwowa mondo wanyag kido mabeyo e dhano ma iye kendo wanyis gima nie chunywa e yo mowinjore.—Rumi 12:10; 1 Thes. 2:7, 8.

Sama wawuoyo, weche ma watiyogo nyalo dimbo kare kaka wawinjo e chunywa. Kata kamano, kapo ni wawuoyo gi chuny maok owinjore ne weche mwawacho, joma winjowa nyalo bedo gi kiawa kabe wechego mulo chunywa gadier. To komachielo, ka wawacho wechego gi chuny madwarore, wechewa biro bedo mamit winjo kendo nyalo mulo chuny joma winjowa.

Wuo e Yo Mang’won. Kinde mang’eny chuny mamor ma ng’ato nigo luwore gi kaka oneno jomoko. Omiyo, sama wawuoyo kuom kido mabeyo mag Jehova, kendo ka wanyiso kaka wamor gi ber mag Jehova, dwondwa onego onyis mor ma wan-go. (Isa. 63:7-9) Kendo sama wawuoyo gi dhano wetewa, yo ma wawuoyogo onego onyis mor mowinjore.

Ja dhoho moro biro ir Yesu kendo osayo Yesu mondo ochange. Tem ane paro dwol ma Yesu wachogo niya: “Ayie; pwodhri.” (Mari. 1:40, 41) Par ane bende kaka dhako ma iye nosebedo kachwer kuom higini 12 lidho mos gi katok Yesu kendo omulo riak lawe. Bang’ ng’eyo ni osefwenye, dhakono wuok e lela kokirni, opodho e tiend Yesu, kendo owacho e nyim ji duto gimomiyo omulo law Yesu kendo kaka ochango gikanyo. Tem paro yo ma Yesu wachonego niya: “Nyarwa, yieni e mokwoyi; dhi gi kuwe.” (Luka 8:42b-48) Chuny mang’won ma Yesu nonyiso e kindego mulo chunywa nyaka chil kawuono.

Mana kaka Yesu, wan bende sama wawinjo ne ji lit kendo wadwaro konyogi gadier, mano nenore e yo mwawuoyogo kodgi. Wuoyo e yo mang’won kamano en mawuok e chunywa to ok mojimb. Wuoyowa mang’won nyalo kelo lokruok maduong’ e yo ma ji kawogo gik mwanyisogi. Thoth gik mwawacho ne ji sama wan e tij lendo miyowa thuolo mar wuoyo e yo ma kamano, to ahinya wuon sama waleronegi wach moro, wajiwogi, koda sama wanyiso ni wadewogi.

Ka imor gi jomoko e chunyi, nyis mano e wang’i. Sama iwuoyo kimor gi ji, jowinjo sudo machiegni kodi mana kaka ginyalo sudo but mach ma gidwaro oyo gotieno. Ka wang’i ok nyis mor, jowinjoni nyalo keto kiawa kabe idewogi gadier. Mor ok en gima irwako kigolo ka ogudu—nyaka owuog e chunywa gadier.

Dwondi bende onego onyis ni imor gi ji. Ka in gi dwol magwagwa, wuoyo gi dwol manyiso ng’wono nyalo bedo matek. Kata kamano kiketo kinda, bang’ kinde, mano biro nyalore. Gimoro achiel manyalo konyo, en ng’eyo ni wacho weche machieko chieko aruya, miyo wuoyoni bedo morungore. Puonjri wuoyo mos kiywoyo kaka dwarore. Timo kamano biro konyi wuoyo e yo manyiso ni imor gi ji.

To gima duong’ie moloyo, en kama pachi nitie. Ka adier iketo pachi duto kuom jogo miwuoyogo kendo in-gi gombo mar nyisogi gimoro mabiro konyogi, kaka iwinjo ei chunyi biro nenore e yo miwuoyogo.

Wuoyo gi jing’o en gima jiwo ji, kata kamano, nyiso muolo bende dwarore. Puonjo ji mondo ong’e weche kende ok oromo; nyaka wamul chunygi bende.

Nyiso Gik Mamoko ma Wawinjo e Chunywa. Ng’at ma nigi chandruok e chunye nyalo nyiso kibaji, luoro, kata chuny monyosore. Mor en kido monego onere ayanga e ngimawa kendo mawuok e yo mayot sama wawuoyo gi jomoko. To komachielo, nitie kido moko maok onego wanyis. Ok giluwre gi kido ma Jakristo owinjore obedgo. (Efe. 4:31, 32; Fili. 4:4) Kaka wawinjo e chunywa nyalo nenore kaluwore gi weche mwayiero tiyogo, kit dwondwa, jing’o mwawuoyogo, wang’wa, koda ranyisi mag del.

Muma wuoyo kuom kit chuny duto ma dhano nyiso. Seche moko Muma hulogi ahula. To seche moko onyiso gik ma ne otimore kata weche ma jomoko nowacho manyiso kaka ne giwinjo e chunygi. Sama isomo wechego gi dwol, keto dwondi oluwre gi kido ma wechego nyiso biro konyi kata konyo joma winji e yo momedore. Mondo itim kamano, dwarore ni iketri e chal mar joma ne wuoyogo. Twak ok en gima inyisruokgo, omiyo tang’ kik ikal tong’. Mi weche misomogo onere maler e pach joma winji.

Wuo gi Chuny Mowinjore ne Gimiwacho. Mana kaka wuoyo gi ilo, mor miketo e weche miwacho kaachiel gi kido mamoko minyiso, luwore ahinya gi gima iwacho.

El Mathayo 11:28-30, kendo ne gima owacho. Kae to som kaka Yesu kwedo jondiko gi Jo-Farisai, e bug Mathayo sula mar 23. Ok wanyal paro ni Yesu ne owacho weche machwopogi e yo mandhem ndhem.

Iparo ni ng’ato onego osom gi chuny machalo nade mondo onyisgo ywak ma Juda noywakgo nikech Benjamin owadgi e Chakruok sula 44? Ne ane chuny minyiso e kwan matindo 13, koda chuny ma Juda nyiso e kwan matindo 16 kuom gimomiyo masirano noyudogi, kendo kaka Josef owuon notimo kaluwore gi Chakruok 45:1.

Omiyo, bed ni wasomo kata wawuoyo, mondo watim kamano e yo maber, nyaka wapar ok mana weche koda paro ma wabiro chiwo kende, to bende onego wang’e ni chuny mane madwarore ni wawachgo wechego.