Tiyo gi Ranyisi Kuom Gik Ma Jowinjo Ong’eyo

DWARORE ni ranyisi moro amora mitiyogo odonj maber gi weche miwuoyoe. Kata kamano, mondo gikony chuth, dwarore bende ni gidonj gi chal mar jowinjo.

Ere kaka chal mar jowinjo nyalo chiko ranyisi miyiero tiyogo sama iwuoyo gi grup? Yesu Kristo notimo nade? Bed ni ne owuoyo gi oganda kata gi jopuonjrene, Yesu ne ok otiyo gi ranyisi kuom kit ngima mag pinje man oko mar Israel. Ranyisi ma kamago ne nyalo bedo mawendo ne jowinjo mage. Kuom ranyisi, Yesu ne ok owuoyo kuom kit ngima mar ruodhi mag Jo-Misri kata timbe mag dinde mag India. Kata kamano, ranyisi mage pod ne wuoyo kuom gik mane ji timo e pinje duto. Ne owuoyo kuom twang’o lewni moyiech, loko ohala, lalo gimoro ma ng’ato ogeno ahinya, koda dhi e nyasi mag kend. Nong’eyo kaka ji winjo e bwo chal mopogore opogore, kendo ne otiyo gi ng’eyono. (Mari. 2:21; Luka 14:7-11; 15:8, 9; 19:15-23) Nikech Yesu ne lendo sie ne Jo-Israel, ranyisi ma notiyogo ne hinyo wuoyo kuom gik ma ne yudore kata tije ma ne itimo e ngima mapile mar Jo-Israel. Omiyo, nowuoyo kuom gik machalo kaka pur, kaka rombe winjo jakwadhgi, koda kaka itiyo gi pien le e kano divai. (Mari. 2:22; 4:2-9; Joh. 10:1-5) Kendo ne owuoyo kuom gik ma ne otimore chon ma ne ging’eyo—chwech mar dichwo gi dhako mokwongo, Ataro mar ndalo Noa, kaka ne oketh Sodom gi Gomora, kaka chi Lut ne otho, to mago gin mana manok. (Math. 10:15; 19:4-6; 24:37-39; Luka 17:32) Sama iyiero ranyisi, be ijanono adimba tije mapile koda chal mar alwora ma jowinjo wuokie kaka Yesu ne otimo?

To nade ka iwuoyo gi ng’ato achiel kata mana gi ji manok to ok grup maduong’? Tem yiero ranyisi mowinjore ahinya gi jowinjo manokgo. Kane Yesu lendo ne chi Jo-Samaria e soko ma ne ni machiegni gi dala mar Sukar, nowuoyo kuom “pi mangima,” ng’at ma ‘riyo ok nomak nyaka chieng’’ koda “soko mar pi . . . mabubni e ngima mochwere”—ma duto ne gin ranyisi motudore achiel kachiel gi tich ma dhakono ne timo. (Joh. 4:7-15) To kane owuoyo kod jolupo ma ne lwoko gogo, ranyisi ma ne oyiero tiyogo ne otudore gi ohand rech. (Luka 5:2-11) Sama Yesu ne wuoyo gi ji tieng’ ariyogi, nonyalo wuoyo kuom pur nikech jogo nodak e alwora ma ji ne gin jopur, kata kamano, mondo oket picha maler e pachgi, nowuoyo kuom tije sie ma ne gitimo, to mano nokonyo ahinya! Be itemo timo kamano?

Kata obedo ni Yesu noketo pache duto kuom “rombe molal mag dhood Israel,” jaote Paulo to ne oor ok mana ir Jo-Israel to bende ir jogo maok ne gin Jo-Israel. (Math. 15:24; Tich 9:15) Be mano nokelo pogruok kuom kaka Paulo ne owuoyo? Ee. Kane ondiko ne Jokristo ma ne ni Korintho, nowuoyo kuom piem mag ng’wech, tim mar chiemo e hekalu mag nyiseche manono, wuoth mitimo sama ji olocho, ma gin weche ma jogo maok gin Jo-Israel nong’eyo.—1 Kor. 8:1-10; 9:24, 25; 2 Kor. 2:14-16.

Be iyiero adimba ngeche koda ranyisi mitiyogo e puonjo mana kaka Yesu kod Paulo notimo? Be itemo ng’eyo chal mar ngima mar jowinjo kaachiel gi tijegi mapile? Onge kiawa ni lokruok osebedoe e piny chakre kinde Jokristo mokwongo. Ji mang’eny yudo weche maoko e televison. Gihinyo ng’eyo gik matimore e pinje maoko. Kapo ni en kamano e alworau, onge rach kata matin kitiyo gi weche ma kamago kaka ranyisi. Kata kamano, gik mamulo ji ahinya gin gik motudore gi ngimagi achiel kachiel—dalagi, joodgi, tijegi, chiemo ma gichamo, kit yamo e alworagi.

Kapo ni ranyisi mitiyogo dwaro weche mang’eny milerego, nyalo bedo ni iwuoyo kuom gima jowinjo ok ong’eyo. Yot mondo ranyisi ma kamano oum puonj midwaro chiwo. Nikech mano, jowinjo nyalo paro ranyisino to ok adiera mag Ndiko mitemo puonjo.

Kar tiyo gi ranyisi ma korgi tek, Yesu notiyo gi weche mapile. Notiyo gi weche matindo mondo olergo weche madongo, gik mayot mondo oketgo gik makorgi tek owinjre maler. Kuom nyiso tudruok ma ne nitie e kind gik ma ne timore pile koda adiera mag Wach Nyasaye ma ne opuonjo, Yesu nokonyo ji winjo tiend wechego mapiyo kendo gikan-gi e pachgi. Mano kaka noketonwa ranyisi maber mondo waluw!