Jodolo ma Igi Owang’ Oyudo Dwoko Mamuol

Jarit-alwora moro ma nyinge Artur ma wuok e piny Armenia ne limo kanyakla moro mar Joneno mag Jehova. E kinde limbeno, nofwenyo ni kanyaklano ne pok ochako chenro mar lendo e lela, tiende ni, lendo mitimo gi mesni kata troli. Kuom mano, nong’ado ni nodhi konyo kanyaklano chako lendo gi yorego. Omiyo, Artur gi jaode ma nyinge Anna, kaachiel gi Janeno moro ma nyinge Jirayr nochungo troli e taon moro matin. Ne giyiero kamoro ma joma kalo ne ng’enyie.

Mapiyo nono, joma ne kalo nochako kawo buge e troli ma ne gichungono. Kata kamano, jo akwede moko bende nochopo kanyo. Jodolo moko ariyo nochopo kanyo, kendo achiel kuomgi nogweyo trolino matek. Kae to nothalo lemb Artur mi angoch Artur olwar. Artur, Anna, kod Jirayr notemo dwoko mamuol mondo gikue weche, kata kamano, mano ne ok onyalore. Jodologo nonyono trolino ma gikeyo buge koni gi koni. Kae to bang’ siemo Jonenogo mager, ne giwuok ma gidhi.

Artur, Anna, kod Jirayr nodhi e stesen mar polis ma ne ni bute kanyo mondo gigo ripot. Ne gindiko stetment, kae to gilendo ne polise buora kod jomamoko ma ne ni kanyo. Joneno adekgo noter e ofis polis ma nochung’ ne stesendno. Ka ne giromo kode, polis maduong’no ne dwaro mana ng’eyo gimomiyo ne gibiro ndiko stetment. Kata kamano, ka ne ofwenyo ni Artur, ma bende en dichwo mojengo, ne ok orakore gi jogo ka ne githale, polisno nowere gi penjo mang’eny e wi kesno, kendo nochako nono puonj ma Joneno mag Jehova oyiego. Mano nomiyo polisno owuoyo gi Jonenogo kuom seche ang’wen! Polisno ne mor ahinya gi gik ma nowinjo mowacho kama: “Ma din maber adier! An be dagomb lemo kodu!”

Odiechieng’ ma luwo, ka ne Artur odok lendo e lela gi troli, ng’at moro ma ne oneno gik ma notimne gi jodoloka nodhi ire. Ng’atno nopwoye kuom dwoko mamuol kendo ling’ ma ok odhawo gi jodologo. Nomedo wachone bende ni gima jodologo notimono nomiyo koro ok omiyogi luor kata matin.

Odhiambono, polis maduong’ noluongo Artur kendo e stesen. Kata kamano, kar mondo ne owuo kode e wi kes, nomedo mana penje penjo mag Muma. Polise moko ariyo bende nomolo e mbakano.

Kinyne, Artur nolimo polisno kendo, mondo onyise vidio moko mag Muma. Polis maduong’no noluongo polise mamoko mondo gin be gibi gine vidiogo.

Polise mang’eny ma ne pok olendnegiga nyaka nene noyudo thuolo mar winjo wach maber mana nikech tim marach ma jodolo ariyoka notimo. Ma nomiyo polisego obedo gi paro maber e wi Joneno mag Jehova.