SOMO NAMBA 14

Keto Puonj Madongo Onere Ayanga

Jo-Hibrania 8:1

GIMA INYALO TIMO: Kony jowinjo mondo giluwre kodi sama igolo twak, kendo ler kaka puonj madongo miwuoye otudore gi wi twak.

Ng’e gima idwaro chopo. Ber ka ing’eyo ka be twagi onego opuonj jowinjo gimoro manyien, konyogi bedo gadier e wi wach moro, kata jiwogi mondo gikaw okang’. Ng’eyo mano biro konyi golo twak maber. Tem ahinya mondo puonj madongo duto ochop gima idwaro.

Penjri kama: ‘Gin weche mage kata penjo mage ma nyalo bedo ni thago jowinjo e wi wach ma adwaro wuoyoeni? Ka po ni gipenja weche ma thagogigo, ginyalo chako gi mane?’ Kiseng’eyo mano, chan wechegi ka luwore gi gik ma nyalo bedo ni thagogi ahinya mondo ikonygi giluwre kodi, giwinj tiend weche mipuonjo, kendo giyie kodgi.
Jiw wach maduong’ ma twak wuoye. Jiw wi twak e twagi duto kuom nwoyo weche moko madongo kata tiyo gi weche mopogore opogore e lero wach maduong’.
Ket weche madongo onere ayanga kendo ma winjo yot. Yier mana weche madongo motudore gi wi twak minyalo puonjo maber ka luwore kod thuolo momiyi. Weche madongo kik bed mathoth; ler moro ka moro e yo malong’o, ling’ matin sama iwuok e wach moro maduong’ ka idhi e machielo.

Inyalo wacho weche madongo sama ichako twagi mondo ikony jowinjo oluwre kodi kata inyalo nwoyo weche madongogo sama itieko mondo ikony jowinjo parogi.