Ee, Mani en Gocho mar Puonjruok!

Wasetimo lokruok ne gocho mar puonjruok mondo obed malombo wang’, kendo okonyi e puonjruok Wach Jehova, ma en wach majaber mar adiera.—Zab. 1:2; 119:97.

Higini ang’wen osekalo nyaka ne wachak bedo gi gocho ariyo mar Ohinga mar Jarito, moro mar ji duto to machielo marwa—Joneno mag Jehova kod jopuonjrewa mag Muma matimo dongruok.

Kowuoyo e wi gocho mar puonjruok, jal moro mosetiyo ne Jehova kuom higini mogwaro nondiko kama: “Gocho mokwongo mar puonjruok mar Ohinga mar Jarito ne berna sidang’, kendo wechege ne omora ahinya. Yo ma gochono lerogo adiera matut mag Muma nodonjo e chunya. Erokamanouru ahinya kuom chenro manyienni.” Owadwa machielo to nondiko niya: “Amor ahinya tiyo gi sechena mag puonjruok, katiyo gi gocho mar puonjruok kaachiel gi Muma mar Reference Bible.” Wageno ni in bende ineno kamano.

Mana kaka ing’eyo, ne ochak goyo gaset mar Ohinga mar Jarito e higa 1879, ma en gima osenyalore mana kokalo kuom kony mar Jehova kotiyo gi roho mare. (Zek. 4:6) Kuom higini 133 ma gasedno osebetie, nitie lokruok mang’eny mosetim ne toke. Tok gaset ka gaset mar gocho mar puonjruok e higa 2012, biro bedo gi picha manyiso tij lendo, ka mano paronwa tich ma Nyasaye omiyowa mar chiwo neno e okang’ malach e wi Pinyruodh Jehova. (Tich 28:23, New World Translation) E ite mar 2, ibiro yudo picha machal gi me tok gaset kaachiel gi weche machuok malero pichano. Kuom higa mangima, pichego biro paronwa ni oganda Jehova lando wach maber “e pinje duto.”—Math. 24:14.

Gin lokruok kaka mage mabende nie gasedno? Sanduk mar nwoyo puonj koro yudore e chak sula ka sula mar puonjruok. Mano biro konyi ng’eyo weche madongo monego inon sama isomo kendo puonjri sulano. En adier ni, jogo matayo Puonjruok mar Ohinga mar Jarito pod biro dhi nyime tiyo gi penjogo e nwoyo puonjgo e giko puonjruok. Ibiro yudo ni thuolo me bethe paragraf omedore matin, kendo namba mar it gaset koda paragraf koro ondik e yo mong’ong’ore ma wang’ neno piyo.

Mana kaka oler e gocho mar dweni, nitie sula manyien miluongo ni “Moa e Giwa Machon,” kendo omede mondo onyisgo dongruok madongo mosetimore e sigand Joneno mag Jehova mandalogi. Sigand gik mosetimore e ngima owete bende ibiroga ket kadichiel e bwo wich mawacho ni, “Ne Gichiwore gi Mor.” Sulani biroga nyisowa ayanga ilo, chuny mokuwe, kod mor ma owete koda nyiminego osebedogo kuom lando wach Pinyruoth kuonde ma jolendo dwarore ahinya.

We mondo thuolo mibiro tiyogo e puonjruok Wach Nyasaye kitiyo gi gasedni okonyi chuth.

Joma Ogoyo Bugni

[Picha manie ite mar 3]

1879

[Picha manie ite mar 3]

1895

[Picha manie ite mar 3]

1931

[Picha manie ite mar 3]

1950

[Picha manie ite mar 3]

1974

[Picha manie ite mar 3]

2008