Wach Maber ne Ji Duto

Chier mar Yesu nomiyo jopuonjrene obedo gi jing’o kod kinda. To moloyo, jaote Paulo nowuotho e Asia Matin nyaka Mediterrania, kochako kanyakla kendo otego Jokristo mondo ochung’ motegno e bwo akwede mager kendo kik gidonj e timbe maricho. Kata obedo ni ne nitie pek kaka mago, din mar Jokristo nolandore kendo kwan Jokristo nomedore.

Paulo owuon bende notwe e jela. Kata mana kuno, ne ondiko barupe mondo ojiw kendo ochiw puonj ne kanyakla mopogore opogore mag Jokristo. Ne osiemogi mondo gitang’ gi wach moro marachie moloyo—puonj mag miriambo. Ka roho maler mar Nyasaye telo ne Paulo, nokoro ni “ondiegi moowore . . . ma puonjo weche ma ketho adiera” ne dhi bedoe kendo ‘ywago jopuonjre bang’gi.’—Tich Joote 20:29, 30.

E giko senchari mokwongo, ng’anjo ma kamano nochakore. Kindeno, Yesu ma ne osechier ne omiyo jaote Johana Fweny, ma ne en ranyisi mar gik ma ne dhi timore e kinde mabiro. Mana kaka Johana ne ondiko, onge ja akwede kata jopuonj mag miriambo ma ne nyalo geng’o Nyasaye kik ochop chuth dwache ne piny koda ne oganda dhano. “Pinje duto, kod dhoudi duto, gi dhok duto, gi ogendini duto” ne dhi winjo wach maber mar Pinyruodh Nyasaye. (Fweny 14:6) Ne idhi duok Paradis e piny, kendo ng’ato ang’ata madwaro timo dwach Nyasaye nyalo dak kuro!

Donge in be iyie ni mano en “wach maber” gadier? Ka en kamano, puonjri wach Nyasaye mayudore e Muma koda kaka wachno nyalo konyi e kindegi koda e kinde mabiro.

Inyalo somo Muma in iwuon e www.jw.org. E Websaitno bende, inyalo somo brosua kaka Biblia—Ina Ujumbe Gani? kod Wach Maber Mowuok Kuom Nyasaye! kod buk miluongo ni Ang’o ma Muma Puonjo Kuom Adier? kaachiel gi buge mamoko manyiso gimomiyo wanyalo geno Muma koda kaka wanyalo tiyo gi puonjne e ngima joot koda e ngimawa wawegi. Kata penj moro amora kuom Joneno mag Jehova penjo mora amora ma in-go.

—Kaluwore gi Tich Joote, Jo Efeso, Jo Filipi, Jo Kolosai, Filemon, 1 Johana, Fweny.