Vidio mar Mashahidi wa Yehova—Imani Yenye Matendo, Sehemu ya 2: Nuru na Iangaze
Bang’ ka nosegony Owadwa Rutherford kod jowetene a e tuech e higa mar 1919, ne nitie tich maduong’ ma norito Jopuonjre mag Mumago. Mana kaka inyiso e vidio mar Mashahidi wa Yehova—Imani Yenye Matendo, Sehemu ya 2: Nuru na Iangaze, Jopuonjre mag Mumago ne dhi bedo gi jo akwede mang’eny, ng’eyogi mar Ndiko ne dhi medore, kendo yie margi ne dhi kadho e tem mager. (Nge. 4:18; Mal. 3:1-3; Joh. 15:20) Bang’ neno vidioni, be inyalo dwoko penjo maluwogi?
(1) Gin yore mage ma Jopuonjre Mumago notiyogo e lando wach maber? (2) Gin lendo mage madongo ma notim e chokruoge mag distrikt ma higa 1931 kod 1935? (3) En wach mane maduong’ ma nowuoye e The Watchtower ma Novemba 1, 1939? (4) Ler ane gima ne otimore kane Owadwa Rutherford golo twak ma wiye wacho ni “Be Sirkal Nyalo Kelo Kuwe” e Madison Square Garden. (5) Wach mane ma ne duong’ e twak mar Owadwa Knorr ma wiye ne wacho ni “Kuwe—Be Onyalo Siko?” (6) Gin chenro mage ma Joneno mag Jehova noketo e higa mar 1942 mondo gilend e okang’ momedore? (7) Ler ane moko kuom kes madongo ma noyal e kot e pinje mag Amerka, Kanada, kod Greece. (8) Ere kaka skul mar Gilead nokonyo e kelo dongruok ne tij lendo? (9) En tich mane maduong’ ma nochakore e higa mar 1946, kendo ang’o momiyo nochake? (10) Gin okenge mage ma Joneno mag Jehova nokawo mondo timbegi owinjre gi puonj mag Muma? (11) Ler ane moko kuom lokruok ma notim e higini mag 1970 mondo riwruok mar oganda Jehova otim gik moko kaluwore gi puonj mag Muma. (12) Ere kaka neno vidioni osekonyi bedo gadier chuth ni Jehova ema tayo riwruogni kendo ni en e wuon riwruogni? (13) Ere kaka vidioni osetego yiero misetimo mar dhi nyime lendo gi kinda kata obedo ni inyalo kadho e pek moko? (14) Ere kaka wanyalo tiyo gi vidioni e konyo wedewa, jopuonjrewa mag Muma, kod jomamoko?
Kaka ndalo medo kalo, e kaka weche manyien medo nenore e sigand Joneno mag Jehova. Kinda ma wan wawegi watimo biro medo ang’o e wi siganano? Mana kaka owetewa notimo e kinde mokalo, mad wadhi nyime timo kinda ka ‘ler marwa rieny’! —2 Kor. 4:6.